Nehemia 6:13 - Digo Bible

¹³ Iye kala akakodishwa anitiye wuoga, nami ningedzifwitsa ndani ya nyumba ya kuvoya Mlungu, ningekala nkahenda dambi na angephaha chizigbwa cha kunibanangira dzina chisha anifyorere.

Nehemia 6:13 Referans Kwoze

Jeremia 20:10

Násikira anji achigomba pokopoko kunihusu, nao ananiogofyera chila uphande, aho anaamba “Mshitakini, nahumshitaki!” Asena angu a kurya na kuusa, ananiazira mai. Aho anaamba, “Mendzerepho andachengeka, ndipho humturye na hudziriphize.”

Jakobo 4:17

Phahi, mutu yeyesi ambaye anamanya rira ra sawa na asirihende, amanye anahenda dambi.

2 Timothi 1:7

Mana Mlungu wahupha roho wa kuhuhenda hukale na nguvu, kumendzana na kudzikanya, ela kayahupha roho wa kuhuhenda hukale aoga.

Jeremia 18:18

Chisha nyo atu achiamba, “Ndzoni humpangire njama Jeremia, mana go mafundzo ga shariya kula kpwa alavyadzi-sadaka tagandaangamika, wala ushauri wa atu a ikima, wala neno ra Mlungu kutsupira manabii. Ndzoni hugombe vii kumuhusu na husigatiye manani gosi agombago.”

Misemo 29:5

Mutu adzipendekezaye kpwa jiraniwe anadziikira chimia cha kudzigbwira mwenye magulu.

Nehemia 6:6

Baruwa yenye kala inaamba, “Kuna ndziyendziye kahi za mataifa na hata Geshemu naye anaamba vivyo, kukala uwe phamwenga na nyo Ayahudi munapanga kuasi, ndiyo mana munarekebisha nyo ukuta. Chisha inaambwa, uwe unalonda ukale mfalume wao.

Maono 21:8

Ela phahi aoga, asiomkuluphira Mlungu, akora, aolagadzi, adiya, atsai, aabuduo vizuka, na a handzo, aho osi phatu phao ni ziya ra moho mkali wa chibiriti. Na chicho ndicho chifo cha phiri.”

Tito 2:8

tsona gasionekane na makosa, ili maaduigo gagbwirwe ni waibu kpwa kukosa neno rorosi ra kugomba dzulu yehu.

1 Timothi 5:14

Phahi nalonda magungu anache alólwe, avyale ana aho na aarereto ili adui wehu Shetani asiphahe nafwasi ya kugomba mai kuahusu.

2 Akorintho 11:12

Nami nindaenderera kuhenda nihendago ili niangamize hara “mitume” anjina anaoendza nafwasi ya kuolangbwa sawa na swiswi kpwa mambo anagodzikarya nago.

Mahendo 6:13

Achireha mashaidi a handzo achiamba, “Chila wakati mutu hiyu anagomba mai kuhusu Nyumba ya Kuvoya Mlungu na Shariya za Musa.

Mathayo 26:59

Phahi akulu a alavyadzi-sadaka na ngambi yosi yaendza ushaidi wa handzo, wa kutosha wa kumshitakira Jesu ili aphahe kumuolaga,

Mathayo 22:15

Chisha Mafarisayo aphiya njama, achendapanga njira ya kumgbwira Jesu kpwa sababu ya manenoge.

Mathayo 10:28

Msiogophe atu aolagao mwiri bahi, ela taaweza kuolaga roho. Baha kumuogopha Mlungu awezaye kubananga mwiri phamwenga na roho mohoni.

Ezekieli 2:6

Nawe uwe mwanadamu, usiaogophe, wala usitishirwe ni maneno gao. Dzagbwe vitisho vyao vikakuzunguluka dza vitsaka vya miya, avi u kahi-kahi ya visuse, ela usitishirwe ni maneno gao wala matso gao kpwa kukala ni aasi.

Jeremia 1:17

“Funga nguwo zidine Jeremia! Unuka uaambire mambo gosi nikulagizago. Usiaogophe, sedze nikakuhenda ukakame kpwa wuoga mbere zao.

Isaya 57:11

Kala unamuogopha ani ariyekuhenda ukakame hadi uchigomba handzo, bila kunitambukira wala kuniaza? Dze, tamniogopha kpwa kukala nákunyamarirani hangu kare?

Isaya 51:7

Niphundzani mwimwi mmanyao haki, mwimwi mmanyao shariya yangu mwenu mioyoni, msiogophe kulaphizwa ni atu, chisha msitishirwe ni chibero chao.

Muhubiri 7:1

Baha nguma nono kuriko marashi ga gali. Baha siku ya kufwa kuriko siku ya kuvyalwa.

Misemo 22:1

Baha mutu atsambule kukala na sifwa nono kuriko utajiri, mana kukala na chibali ni bora kuriko feza au zahabu.

Nehemia 6:12

Námanya kukala kala kahumirwe ni Mlungu, ela walavya unabii chinyume changu, mana kala akakodishwa ni Tobia na Sanibalati.