Isaya 3:14 - Digo Bible

¹⁴ Mwenyezi Mlungu andalavya uamuli chinyume cha atumia na vilongozi a atue aambe, “Mwimwi ndimwi mchiobananga munda wangu wa mizabibu! Nyumba zenu mkaziodzaza vitu murivyofuta achiya.

Isaya 3:14 Referans Kwoze

Ayubu 22:4

Dze, Mlungu anakudemurira na kukuamula kpwa kukala unamuogopha?

Jakobo 2:6

Ela mwabera achiya. Mmanye kala matajiri ndio ambao nkukuonerani na kukuphirikani kotini.

Amosi 4:1

Phundzani higa, mwi achetu a Samariya, mnonao dza ngʼombe ziriswazo vinono za Bashani, muonerao achiya na kutesa agayi, ambao mkuambira alume enu, “Haya reheni uchi hunwe!”

Jeremia 5:27

Dza bweko ririro tele nyama a mapha, nyumba zao zi tele handzo, kpwa vivyo akakala akulu na matajiri,

Isaya 5:7

Mana munda wa mizabibu wa Mwenyezi Mlungu, Mlungu wa majeshi ni nyumba ya Aiziraeli na atu a Juda, ndio mbeyu yomhamira. Iye walola aone uamuli wa haki ela achiona uolagadzi, badala ya haki, achiona chiriro!

Zaburi 143:2

Usiniamule mimi mtumishio, mana takuna mutu ariye na haki mberezo.

Zaburi 14:4

Dze, ano ahendao mai, ni taaelewa? Aho aryao atu angu dza aryavyo mkpwahe, na taamuiha Mwenyezi Mlungu.

Ayubu 24:9

(Kuna atu ambao anahala kpwa nguvu anachiya asiokala na ise zao kula nyahoni mwa nine zao, na kuhala mzamana ana atsanga a achiya.)

Mathayo 21:33

Jesu achiamba, “Phundzani ndarira yanjina. Kpwakala na mutu mmwenga yephanda mizabibu mwakpwe mundani. Achiizungulusira lichigo, achitsimba phatu pha kuminyira zabibu, na piya achidzenga uringo. Chisha hura munda achiukodishira akurima, naye mwenye achiphiya tsi yanjina.

Mika 6:10

Uwe nyumba ya uyi, siweza kuyala hazinayo uriyoiphaha kpwa handzo na vipimo vya handzo ambavyo navizira.

Mika 2:2

Nkuaza minda na akaihala, akaaza nyumba na akazihala. Nkumuonera mutu na atu a nyumbaye, na nkufuta mutu urisiwe.

Ayubu 34:23

Mana Mlungu kana haja ya kuchunguza mutu zaidi, napho ni edze mbereze ahukumiwe.

Ayubu 24:14

Muolagadzi nkulamuka chimirimiri, ili aweze kuolaga achiya na agayi, na usiku akakala dza muivi.

Zaburi 10:9

Nkudzifwitsa na kumuoteya dza simba. Nkugodza ili amgbwire mchiya. Iye nkumgbwira mnyonje na kumguruta kpwenye nyavuye.

Misemo 30:14

Kuna atu anjina meno gao ni dza panga, na majego gao ni dza marumu, ambao a tayari kuafuna achiya na agayi ario duniani.

Isaya 10:1

Shaka hiro kpwa hinyo atengezao shariya zisizo za haki, na aandikao amuri za kuonera atu

Isaya 10:2

ili kualafya achiya haki zao na kuonera atu angu kufuta magungu vitu vyao, na kuiyira anachiya.

Isaya 11:4

Achiya na agayi andalamulwa na haki. Dunia indatiywa adabu kpwa nenore na atu ayi andaaolaga.

Isaya 14:30

Mwenyezi Mlungu andahakikisha achiya a mwisho anaphaha marya na agayi anasagala salama. Ela atuo ndaaolaga na ndzala, achache ndiosala indaamarigizwa.

Isaya 26:6

Achiya na agayi, nkuuvyoga-vyoga.

Isaya 29:19

Anyenyekevu andahamirwa tsona ni Mwenyezi Mlungu na achiya andahamirwa ni Mtakatifu wa Iziraeli.

Isaya 30:12

Phahi dzulu ya higo, Mtakatifu wa Iziraeli anaamba hivi: “Kpwa sababu mkarema ujumbe huno, namwi mkaadamira kuonera na kuchenga,

Isaya 58:4

Saumu zenu zinasirira na kukosana, kuzirana, na kupigana ngumi. Kufunga kuku, mufungako, takundakuhendani musikirwe ko dzulu.

Ezekieli 18:12

Piya nkuonera achiya na agayi na nkufuta atu mali zao kpwa nguvu. Nkukala kauyiza choikpwa mzamana ni myawe, nkuabudu vizuka, nkuhenda mambo ga kutsukiza,

Ezekieli 20:35

Nindakuphirikani jangbwa ra mataifa na kuko ndakuamulani uso kpwa uso.

Ezekieli 20:36

Ndakuamulani dza nrivyoamula akare enu ko jangbwa ra Misiri, Mwenyezi Mlungu anaamba.

Mika 3:3

Mwimwi mryao nyama za atu angu, na kuyula ngozi zao. Na kuvundza mifupha yao vipande-vipande na kuakata dza nyama ndizojitwa, dza nyama ndizotiywa nyunguni.”

Alawi 25:14

Unaphogula au kuguzira myao munda usimuonere.

Alawi 25:17

Msionerane, ela muogopheni Mlungu wenu. Mimi, ndimi Mwenyezi Mlungu, Mlungu wenu.

Jeremia 12:10

Arisa anji akabananga minda yangu ya mizabibu akavyoga-vyoga munda wangu, akahenda munda wangu mnono ukakala litsapi usiomera chochosi.

Amosi 2:7

Anaonera sana achiya hata taana pha kuphumira anaalafya haki atu asiodziweza. Mutu na ise analala mchetu mmwenga na kpwa njira iyo ananajisi dzina rangu takatifu.

Mika 2:1

Shaka hiro kpwa apangao kuhenda mai, anaopanga uyi mwao vitandani, ligundzu kunaphocha anagahenda kpwa sababu ana uwezo.