Zeremi 40:8 - A SƐB-SÕW

⁸ A Zɛbr-nɩbɛ nɩ-bɛrɛ bɛ ŋa, nɩ a bɛ nɩbɛ tɩ wa na wa páw a Gedalɩasɩ a Misɩpa: Netanɩahu bidɛb, Yisɩmayɛl, Karea bidɛbr, Yohanan nɩ Yonatan, Tanhumɛtɩ bidɛb, Seraya, Netofa tẽw Ofaɩ bidɛbr, nɩ Maaka bidɛb, Yezanɩahu tɩ nɛbɛ.

Zeremi 40:8 Referans Kwoze

Zeremi 42:1

Lɛ n'a a zɛbr-nɩbɛ nɩ-bɛrɛ za, baa zuo a za, a Karea bidɛb, Yohanan, nɩ a Hosaya bidɛb, Azarɩa, nɩ a bɛlɩ dem za na tɩ be be a, a pʋrmɛ nɩ a bɛrɛ, tɩ taw pɩɛlɩ

Wulu-ayi-sob 3:14

A Manase bidɛb Yayiir bʋʋrɛ tɩ zɛb'a de a Argɔvʋ vuo na be a Basan a, tɩ sãá nɩ a Gesuur bʋʋrɛ nɩ a Maaka bʋʋrɛ tʋr-bɔw ƴãw. Bɛ tɩ por'ɩ a vuo ʋl ziir kɛ́: “Yayiir tẽli”, lɛ n'a bɛ cãà bʋɔlɛ a a dɩ̃a. —

Zeremi 43:2

Lɛ n'a Hosaya bidɛb, Azarɩa, Karea bidɛb, Yohanan nɩ a nɩbɛ bɛl za na ɩrɛ pɔ̀lʋ a, tɩ yel a Zeremi: «Zir-ŋmarɛ nɛ b! A Sore tɩ Naaŋmɩn bɛ tõ fʋ a tɩ zie, kɛ́ fʋ wa yel tɩ à ŋá ɩ: “Nyɩ taa wa cere a Eziptɩ tẽw tɩ kpɩɛr naayir ɛ.”

Zeremi 42:8

Lɛ n'a a Zeremi tɩ bʋɔlɩ a Karea bidɛb, Yohanan, nɩ a zɛbr-nɩbɛ nɩ-bɛrɛ na tɩ lãw nɩ ʋ a, nɩ a nɩbɛ za, a pʋrmɛ nɩ a bɛrɛ.

Zeremi 40:6

Lɛ n'a a Zeremi tɩ cen a Misɩpa a Gedalɩasɩ zie, ɛ́ tɩ lãwnɩ ʋ kpɩɛr a nɩbɛ na tɩ cãà be a tẽw pʋɔ a sɔgɔ.

Neemi 7:26

Bɛtɩlɛm nɩ Netofa ten nɩbɛ: kɔbr ayi vʋ̃ɔ lɩzɛr dɔwlɩ ani (188).

Ɛsɩdɩrasɩ 2:22

Netofa tẽw nɩbɛ: lɩz'a ayi nɩ pie nɩ ayʋɔb.

2 Samɩɛl 10:8

A Amɔ̃ tẽw dem tɩ yi na pɩɛrɩ a zɛbr pɩɛrʋ, a bɛ tẽ-kpɛ̃ɛ dɩ̃dɔr nʋɔr. A Siiri tẽw dem na yi a Sova a, nɩ a Bɛtɩ-Erehovʋ tẽw dem, nɩ a Tɔɔvʋ tẽw nɩ a Maaka sojarɩ tɩ be n bɛ tʋɔra zie a wɩ̀ɛ pʋɔ.

2 Samɩɛl 10:6

A Amɔ̃ tẽw dem tɩ nyɛ̃ na k'aa bɛ ɩb ŋa ɩ na a Daviir bɛ cãà nɔnɛ a bɛ yele towtow ɛ. Lɛ n'a bɛ tɩ dà sojarɩ tùr-lɩzɛr (20 000) a Siiri ten Bɛtɩ-Erehovʋ nɩ Sova pʋɔ, sojarɩ túr (1 000) a nãà Maaka sojarɩ pʋɔ, nɩ sojarɩ tùr-pie nɩ ayi (12 000) a Tɔɔvʋ tẽw pʋɔ.

Zozue 12:5

Ʋlɛ tɩ so a Hɛrmɔ̃ tãw, a Salka nɩ a Basan tẽw za, tɩ tɔ n a Gesuur tẽw dem nɩ a Maaka bʋʋrɛ tʋr-bɔw. Ʋlɛ mɩ̀ tɩ cãà so a Galaadɩ põ-zɛ̃-taa, tɩ tɔ a Hɛsɩbon nãà Sihon naalʋ-tẽw.

Zeremi 43:5

Lɛ n'a a Yohanan nɩ a zɛbr-nɩbɛ nɩ-bɛrɛ tɩ tɛr a nɩbɛ bɛl na cãà vʋʋrɛ, ɛ́ kpɩɛr a Zuda tẽw pʋɔ a, cen nɩ. A tɩ ɩ n a bɛlɩ dem bɛ na tɩ dãw diw yaarɩ a ziir za a tẽ-kpɔwlɩ pʋɔ, ɛ́ bɛ lɛb wa kpɩɛr a Zuda tẽw pʋɔ a:

Zeremi 40:11

Lɛ mɩ̀ n'a, a Zuda tẽw nɩbɛ na tɩ be a Mowab, a Amɔ̃, a Edɔm ten pʋɔ nɩ a ziir za a, tɩ wõ na k'aa Babɩlɔn tẽw nãà tɩ bɛr'ɩ nɩbɛ ŋmãa a Zuda tẽw, ɛ́ ƴãw Ahikam bidɛb, Gedalɩasɩ, na ɩ Safan yãw a, ʋ kaarɛ a bɛ zie.

Zeremi 38:26

Fʋ na sɔw bɛ nɩ à ŋá: “Nuru n'a ɩ̃ tɩ lɔbr zɛlɛ nɩ a nãà, k'ʋʋ ta lɛb bɛr mɛ̃ ɩ̃ cen tɩ kpi a Yehonatan yir ɛ.”»

Zeremi 37:20

A Zeremi pãa lɛb tɩ yel'a ƴãw pʋɔ: «Ƴɛrɛŋa a, ɩ̃ sore, ɩ̃ nãà a, bɛr wõ mɛ̃. Sàw de a ɩ̃ yãayãa zɛlʋ. Ta ƴãw ɩ̃ lɛb cen a sɛ-sɛbrɛ Yehonatan yir ɛ, alɛ bɛ ɩ lɛ, ɩ̃ na tɩ kpi n a be.»

Zeremi 37:15

A nɩ-bɛrɛ tɩ nyɛ̃ nɩ nɩ a Zeremi suur ɛ́ pɔb ʋ. Al pùorí bɛ pàw ʋ a sɛ-sɛbrɛ Yehonatan yir bɛ na tɩ nyɔw lɩɛbɩ ʋ ɩ gaso a pʋɔ.

Ɛsɩdɩrasɩ 2:2

Bɛlɛ nɩ Zorobabɛl nɩ Zozue nɩ Neemɩa nɩ Seraya nɩ Erelaya nɩ Mɔrdokaɩ nɩ Bilsan nɩ Misɩpaar nɩ Bigɩwaɩ nɩ Erehum nɩ Baana nɛbɛ tɩ lɛb wa. A bɛ yée nɩ a Ɩsɩrayɛl nɩbɛ nʋɔr na sɛb tu taa a n'ɩ á ŋá:

1 Bibie za yel-manɩ 11:30

Netofa tẽw Maraɩ, Netofa tẽw Baana bidɛb Helɛdɩ,

1 Bibie za yel-manɩ 2:54

A Salma bʋʋrɛ: a Bɛtɩlɛm tẽw dem, a Netofa tẽw dem, a Atɩrɔtɩ-Bɛtɩ-Yowavʋ tẽw dem, nɩ a Manahatɩ nɩ Sorea tẽw dem põ-zɛ̃-taa,

1 Bibie za yel-manɩ 2:48

A Kalɛb pɔw-bile kãw, Maaka, tɩ dɔw nɩ Sevɛɛr nɩ Tirana kʋ̀ ʋ.

2 Na-mɩnɛ 25:25

Ɛcɛ a ʋlɩ yũon nɛ, a cuwr ayopõi sob a, Netanɩa bidɛb, Yisɩmayɛl, na ɩ Elisama yãw, ɛ́ yi a Zuda tẽw nãà yir a, tɩ tɛr'ɩ nɩbɛ pie wa n a Misɩpa wa kʋ n a Gedalɩasɩ nɩ a Zuda tẽw dem nɩ a Babɩlɔn tẽw dem na tɩ be a ʋ zie a Misɩpa a.

2 Na-mɩnɛ 25:23

A Zuda tẽw sojarɩ nɩ-bɛrɛ nɩ a sojarɩ bɛl, na bɛ tɩ de bɛ tʋɔra kʋ̀ a Babɩlɔn tẽw dem a, na tɩ wõ a yel ŋa a, bɛ cen nɩ a Misɩpa tɩ páw a Gedalɩasɩ. A sojarɩ nɩ-bɛrɛ tɩ n'ɩ Netanɩa bidɛb, Yisɩmayɛl, Karea bidɛb, Yohanan, Tanhumɛtɩ na yi Netofa a bidɛb, Seraya, nɩ Maaka bidɛb, Yaazaniyahu.

2 Samɩɛl 23:34

Ahasɩbaɩ bidɛb Elifelɛtɩ na ɩ Maaka tẽw nɩr kãw yãw a, Gilo tẽw Ahitofɛl bidɛb Eliyam,

Zeremi 40:13

Bɛ na wa tɩ ta a Gedalɩasɩ zie, a Misɩpa a, a Karea bidɛb, Yohanan, nɩ a zɛbr-nɩbɛ nɩ-bɛrɛ bɛl na tɩ cãà be a kura pʋɔ a,

Zeremi 40:14

tɩ yel ʋ na: «Fʋ bɛ bãw k'aa Amɔ̃ tẽw nãà, Baalisɩ, ƴãw na kɛ́ Netanɩa bidɛb, Yisɩmayɛl, kʋ b ɛ?» Ɛcɛ, a Ahikam bidɛb, Gedalɩasɩ, bɛ tɩ sàw a bɛ ƴɛ̀rʋ ɛ.

Zeremi 40:15

Ɛcɛ, a Yohanan tɩ wa na wa sɔwlɩ páw a Ahikam bidɛb, Gedalɩasɩ, a Misɩpa, yel ʋ: «Kʋ̀ m sɔ́r ɩ̃ cen tɩ kʋ a Netanɩa bidɛb, Yisɩmayɛl, ɛ́ nɩr za ta bãwnɩ a ɩ. Fʋ sɩrɩ na bɔbr k'ʋʋ kʋ b bɩɩ? Ʋlɛ wa kʋ b a, a Zuda tẽw dem na ɓã taa a fʋ zie a na lɛb'a zɔ yaarɩ, ɛ́ a ʋlɩ bom nɛ na cãà cɛ a Zuda naalʋ-tẽw a na bɔr a.»

Zeremi 41:1

Zɩ̃ k'aa ʋlɩ yũon nɛ, a cuwr ayopõi sob a, a Netanɩa bidɛb, Yisɩmayɛl, na ɩ Elisama yãw, ɛ́ yi a Zuda tẽw nãà yir a, ɛ́ ɩ a nãà yir nɩr kãw nɩ a nãà yir tõ-tõ-bi-kpɛ̃ɛ kãw a, tɩ tɛr'ɩ nɩbɛ pie wa n a Gedalɩasɩ zie a Misɩpa. Bɛ tɩ lãw na dɩrɛ,

Zeremi 41:2

wa bere, a Yisɩmayɛl nɩ a nɩbɛ pie bɛl na bɩɛl'ʋ a, lãw ìr, gɔr gɔr a Gedalɩasɩ nɩ zɛbr-sɔ-bɛrɛ kʋ. À ŋá n'a bɛ tɩ kʋ a nɩr nɛ a Babɩlɔn tẽw nãà na tɩ kaa ír ƴãw ʋ kaarɛ a Zuda tẽw a.

Zeremi 41:11

A Karea bidɛb, Yohanan, nɩ a zɛbr-nɩbɛ nɩ-bɛrɛ bɛl za na tɩ be a ʋ zie a, tɩ wõ n a faa al za a Netanɩa bidɛb, Yisɩmayɛl, na tɩ maalɩ a.