Ɩzayi 60:1 - A SƐB-SÕW

¹ Ìr àr, Zerizalɛm i! Nyɩwrɛ fʋ za. Bʋ̃ʋ n'ʋ vɛ̃, a fʋ cãà waar'a, a Sore yúor-vɩɛlʋ-danʋ pure nɩ a fʋ zu!

Ɩzayi 60:1 Referans Kwoze

Efɛɛzɩ 5:14

Ɛ́ bom za na sãá cãàmɩ́ a ɩ n cãà. Alɛ so bɛ mɩ́ yel: «Ìr, fʋ̃ʋ na gúre a, lɛb ìr a kũuni pʋɔ, ɛ́ a Kɩrɩta na caalɩ fʋ na.»

Efɛɛzɩ 5:8

Nyɩ tɩ dãw na be lige pʋɔ, ƴɛrɛŋa a, nyɩ lãw nɩ nɩ a Sore be cãà pʋɔ, nyɩ ɩrɛ mɛ̃ cãà pʋɔ bibiir a.

Zã 8:12

A Yeezu tɩ lɛb'a ƴɛ̀r a zu-sɛbla zie yel: «Mãa n'ɩ a tẽ-daa cãà, sob nɛ na tuur mɛ̃ a kʋ̃ cere lige pʋɔ ɩ, ʋ na páw nɩ a cãà na tɩrɛ a nyɔ-vʋʋrʋ a.»

Ɩzayi 58:8

Lɛ n'a a fʋ cãà na pur caalɩ mɛ̃ a zi-wɛl-paala a, ɛ́ a fʋ natɩr ɓãa fɔ̃w. A fʋ mɩnʋ na de fʋ nɩ niwn, ɛ́ a Sore yúor-vɩɛlʋ-danʋ pàw a fʋ pùor.

Zã 12:46

A mãa na ɩ a cãà a, ɩ̃ wa n a tẽ-daa zu kɛ́ sob nɛ za na sàw de m a, ta be lige pʋɔ ɩ.

Matie 5:16

Lɛ mɩ̀ n'a, a nyɩ cãà, ʋ caalɛ a nɩsaalbɛ, kɛ̀ bɛ tʋ̃ɔ́ nyɛrɛ a nyɩ ɩ-vɩɛlɩ ɛ́ íre a nyɩ Sãà na be a tẽ-vla pʋɔ a yúor-vɩɛlʋ-danʋ.»

Zã 1:9

A Ƴɛ̀rʋ tɩ n'ɩ a cãà mɩŋa na waar a tẽ-daa zu ɛ́ caalɛ nɩsaal za a.

Yel-wula 22:5

Tɩ̃ɩsɔw kʋ̃ lɛb cãà be ɩ, bɛ kʋ̃ cãà tɛr fɩ̃tɩlɛ cãà nɩ mʋ̃tɔ̃w cãà yel-ɩra ɩ, a Sore Naaŋmɩn na na caalɛ bɛ nɩ a ʋ cãà a ƴãw, ɛ́ bɛ na dɩrɛ nɩ naalʋ yome yome za.

1 Pɩɛr 4:14

Bɛlɛ wa tʋʋr nyɩ zʋmɛ a Kɩrɩta yúor ƴãw a, zu-nʋ̃ɔ̀ dem n'ɩ nyɩ, a Vʋʋrʋ na tɛr danʋ a, a Naaŋmɩn Vʋʋrʋ be n a nyɩ zu.

Filib 2:15

lɛ n'a nyɩ kʋ̃ tɛr sãwna bɛ yere ɩ, ɛ́ vɩɛl ɩ Naaŋmɩn bibiir na bɛ tɛr faalʋ a, vʋʋrɛ nɩ a tẽ-daa zu nɩbɛ sɔgɔ na fa ɛ́ sãw bɛ za a, nyɩwrɛ a bɛ sɔgɔ mɛ̃ ŋmar-bie salom zu a,

Yel-wula 21:23

A tẽw bɛ tɛr a mʋ̃tɔ̃w nɩ a cuw cãà yel-ɩra ɩ, a Naaŋmɩn yúor-vɩɛlʋ-danʋ na caalɛ ʋ a ƴãw, nɩ a Pele na ɩ a ʋ fɩ̃tɩlɛ a ƴãw.

Matie 4:16

A nɩ-bʋʋrɛ bɛl na tɩ be lige pʋɔ a, nyɛ̃ nɩ cãà kpɛ̃ɛ. Cãà caal'ɩ a bɛl na tɩ be a kũu tẽ-lige pʋɔ a.»

Ɩzayi 9:2

Sore e, fʋ ɩ na a cɩlʋ laarɩ bɛ, fʋ ɩ na a bɛ nʋ̃ɔ̀ kpɛ kpɛ̃ɛ. Bɛ cɩlɛ nɩ a fʋ niŋé mɛ̃ kɔb bome bɛ na mɩ́ dier cɩlɛ nɩ a, mɛ̃ dɔ̃ dem na-bome bɛ na mɩ́ pone ŋmɩɛr'ɩ nʋ̃ɔ̀ cɛlsɩ a.

Zã 3:19

A ƴɛ̀rʋ bɛ na na maalɩ a n'ɩ ŋa: a cãà wa n a tẽ-daa zu, ɛ́ a nɩsaalbɛ wa nɔ̃w a lige gãw a cãà, a bɛ ɩ-ɩrɩ na bɛ vɩɛl a zũú.

Luka 2:32

ʋ ɩ n cãà na na ɩ a tẽ-daa nɩ-bʋʋrɛ za bãw fʋ a, ɛ́ ɩ a fʋ nɩ-bʋʋrɛ Ɩsɩrayɛl yúor-vɩɛlʋ-danʋ.»

Yel-wula 21:11

Ʋ tɩ nyɩwrɛ na nɩ a Naaŋmɩn mɩŋa yúor-vɩɛlʋ-danʋ, ʋ tɩ nyɩwrɛ na mɛ̃ kʋsɛ-bi-nyɩla a, mɛ̃ zasɩpʋ kʋsɛ-bi-nyɩla na cuoli mɛ̃ kʋ̃ɔ-kuur a.

Sɛb-sõw yielu 87:3

Naaŋmɩn tẽ-kpɛ̃ɛ ɛ, yel-vɩɛlɩ n'a ʋ manɛ a fʋ ƴãw: Tɛw-àrʋ

Sɛb-sõw yielu 102:16

A nɩ-bʋʋr-yoru na ƴãwnɛ fʋ na, Sore e, a tẽw zu na-mɩnɛ za na ƴãwnɛ nɩ a fʋ yúor-vɩɛlʋ-danʋ.

Ɩzayi 2:5

Nyɩ wa, Zakɔb yir dem i! Nyɩ ɩ tɩ cere a Sore cãà pʋɔ.

Ɩzayi 4:5

a lɛn daar a, ʋ na ɩ na zũzuwr mɩ́ sãá a mʋ̃tɔ̃w, ɛ́ zʋ̀ʋ́r nɩ vũu-zɛlɛ sãá a tɩ̃ɩsɔw a Sɩyɔ̃ tãw zu ziir za, nɩ a bɛlɩ dem za na na ɓã taa a ʋ zu a zu. A Sore yúor-vɩɛlʋ-danʋ na pàw nɩ bom za mɛ̃ pɛn-sɛw-kpɛ̃ɛ a,

Ɩzayi 24:23

Vĩ na ɩrɛ nɩ a cuw, a mʋ̃tɔ̃w na nyɛ̃ nɩ vĩ. Bʋ̃ʋ n'ʋ vɛ̃, a Sore, a kpɛnʋ-za-sob, na dɩrɛ nɩ naalʋ a Zerizalɛm nɩ a Sɩyɔ̃ tãw zu. A ʋ yúor-vɩɛlʋ-danʋ na nyɩwrɛ nɩ a nɩ-kore niŋé.

Ɩzayi 28:5

A ʋlɩ bibir nɛ a, a Sore, a kpɛnʋ-za-sob, na ɩ n a ʋ nɩ-bʋʋrɛ na cɛ a nãà-kpawɔ-yúor nɩ kɔkɔrɩ́ bãzɔl-vla vla.

Ɩzayi 35:2

A póru pʋɔ mɔ̃-puuru, a pu pàw ʋ, ʋ cɩlɛ ƴawr'ɩ, ŋmɩɛr'ɩ nʋ̃ɔ̀ cɛlsɩ! A Sore kʋ̀ ʋ nɩ a Libã tan vɩɛlʋ, a Karmɛl tãw nɩ a Saron tɩ̃tal dɛpaalʋ. Lɛ n'a bɛ na nyɛ̃ a Sore yúor-vɩɛlʋ-danʋ, a tɩ Naaŋmɩn dɛpaalʋ.

Ɩzayi 42:6

«A mãa, a Sore, ɩ̃ bʋɔlɩ fʋ na mɛ̃ a lɛ-na-tu-sɔr-a, ɩ̃ nyɔw fʋ nɩ nũú, ɩ̃ mɛ b'a, ɛ́ ƴãw kɛ́ fʋ wa ɩ mãa nɩ a ɩ̃ nɩbɛ wõ-taa, kɛ́ fʋ wa ɩ a tẽ-daa nɩbɛ cãà.

Ɩzayi 66:11

Lɛ n'a ʋ na lɛb ƴãw nyɩ kanyir. Nyɩ na tɩw na mɛ̃ bi-pɩɩlɛ na ƴɛnɛ a bɛ mã bɩrɛ na paalɩ bʋ̀r-kʋ̃ɔ wone nɩ nʋ̃ɔ̀ a.

Ɩzayi 62:1

A nɔ̃wfʋ ɩ̃ na nɔnɛ fʋ a ƴãw a, Zerizalɛm i, ɩ̃ bɛ ɩrɛ gbili ɛ. A nɔ̃wfʋ ɩ̃ na nɔnɛ fʋ a ƴãw a, Sɩyɔ̃ i, ɩ̃ bɛ zɩnɛ zoom ɛ, ɛ́ gù a fʋ mɩnʋ tɩ sãá mɛ̃ cãà a, ɛ́ a fʋ faafʋ 'lere mɛ̃ mɔ̃-'lena vũu a.

Ɩzayi 62:2

A nɩ-bʋʋrɛ na nyɛ̃ nɩ a fʋ mɩnʋ, ɛ́ a na-mɩnɛ za nyɛ̃ a fʋ yúor-vɩɛlʋ-danʋ. Fʋ na tɛr'ɩ yo-paala a Sore na na por a.

Ezekɩɛl 43:4

A Sore yúor-vɩɛlʋ-danʋ tɩ tu n a dɩ̃dɔr na be a saa-pɛrɩ́ a kpɛ a Ŋmɩn-yir-kpɛ̃ɛ pʋɔ.