A Sore yere na: Nyɛ̃ a ɩ̃ tõ-tõ-bie ɩ̃ na tɩ̀ɛ a, a ɩ̃ nɩ-kaa-íra na pɛlɩ a ɩ̃ pʋɔ a. Ɩ̃ ƴãw nɩ a ɩ̃ Vʋʋrʋ a ʋ zu, k'ʋʋ ɩ a nɩ-bʋʋrɛ bãw a lɛ-na-tu-sɔr-a.
Ɩ̃ bɛ zɔrɛ vĩ a Yel-nʋ̃ɔ̀ hieru ƴãw ɛ: bʋ̃ʋ n'ʋ vɛ̃, ʋ ɩ n Naaŋmɩn kpɛnʋ na faarɛ nɩr za na sàw de a, a Zifʋ mɩnɛ n'ɩ a dãw-niwn dem, al pùorí a bɛl na bɛ ɩ Zifʋ mɩnɛ a.
A na ɩ à ŋá a Kɩrɩta wõ a tuo a ʋ ƴã-gan pʋɔ a, a nyɩɩm mɩ̀, nyɩ tɛr a tɩɛrʋ ŋa kpɛ̃w za mɛ̃ zɛbr bom a: nɩr na wõ tuo a ʋ ƴã-gan pʋɔ a, ʋ ír'ɩ nũu a yel-bier pʋɔ,
À ŋá n'a a Sore yere: «A daar na wa ta a, ɩ̃ sɔw fʋ na. A faafʋ bibir na wa vɩɛ a, ɩ̃ sõw fʋ na. Ɩ̃ cɔbrɩ fʋ na k'ɩ̃ɩ ɩ fʋ ɩ a wõ-taa bom mãa nɩ a ɩ̃ nɩbɛ cará. Ɩ̃ na ɩ n a Ɩsɩrayɛl tẽw ʋ lɛb ìr, ɩ̃ɩ lɛb põ a tẽw ŋa na sãw gã a ziir.
A na tĩ a dɩ̃a a, ɩ̃ na ɩ na fʋ kpɛmɛ mɛ̃ tẽ-kpɛ̃ɛ bɛ na cɔbrɩ ʋ kpɛmɛ a zɛbr ƴãw a. Fʋ na ɩ na mɛ̃ kure kpul a, mɛ̃ kur-zɩɛ dacin a, a tẽw za niŋé, a Zuda tẽw na-mɩnɛ, a tõ-tõ-bi-bɛrɛ, a bàwr-maalbɛ nɩ a naalʋ-tẽw tẽ-biir za niŋé.
Alɛ n'a so, ƴɛ̀rʋ ŋa n'ʋ a Sore, a ʋl na faa a Abraham a, ƴɛ̀rɛ kʋ̀rɛ a Zakɔb bʋʋrɛ: «Dɩ̃a na ta a, a Zakɔb bʋʋrɛ kʋ̃ lɛb nyɛ̃ vĩ ɛ, vĩ kʋ̃ lɛb nyɔw bɛ bɛ su zuru ɛ.
Nyɩɩm nɩ-bʋʋrɛ za a, nyɩ bɛrɛ wone. Tẽw i, cɛlɛ vla, fʋ̃ʋ nɩ bom za na paalɩ fʋ a! A Sore Naaŋmɩn na be n a ʋ kpɛb zie na ɩ sõw a pʋɔ, ɛ́ yere a nyɩ sãwna.
Na-mɩnɛ nɛbɛ na guole a fʋ bibiir, ɛ́ na-mɩnɛ pɔwyaar ɩ a bɛ bɩyaalbɛ. Bɛ na mɩ́ vɔblɩ muru a fʋ niŋé. Bɛ na mɩ́ lɛnɩ nɩ a fʋ gbɛ́ɛ uuru. Lɛ n'a fʋ na bãw kɛ́ mãa n'ɩ a Sore, nɩ kɛ́ bɛlɩ dem na ƴãw a bɛ tɩɛrʋ a ɩ̃ ƴãw a bɛ nyɛrɛ vĩ ɛ.»