Ɩzayi 5:30 - A SƐB-SÕW

³⁰ Ɛcɛ bibir kãw a, a saa na tanɩ nɩ a nɩ-bʋʋrɛ bɛ ŋa ƴãw, mɛ̃ a lɛ a saa-sɛsɛb na mɩ́ wa cɛ̀r a kʋ̃ɔ-kpɛ̃ɛ ɩrɛ gɔmɛ a. Bɛ na mɩ́ jɩ́r'ɩ a tẽw, ɛcɛ lige nɩ kpɩɛrʋ n'a na pili pàw ʋ. Zũzu-sɛblɛ na ɩ na a bibir liw.

Ɩzayi 5:30 Referans Kwoze

Ɩzayi 8:22

al pùorí bɛ jɩ́r a tẽw nyɛ̃ a ɩ kpɩɛrʋ tɛwr, lige, lige na vʋ̃ɔnɛ pʋ̀lá a, tɩ̃ɩsɔw-varkpara.

Zowɛl 2:10

Alɛ wa tarɛ a, a tẽsɔw mɩ́ dam'a, ɛ́ a salom ɩ mɛ̃ ʋ lore na a, a mʋ̃tɔ̃w nɩ a cuw bɛ mɩ́ cãà caalɛ ɩ, ɛ́ a ŋmar-bie bɛ cãà nyɩwrɛ ɩ.

Yel-wula 6:12

Al pùorí, ɩ̃ tɩ nyɛ̃ nɩ a Pele ʋ 'law a sɩ-suur ayʋɔb sob. Lɛ n'a a tẽsɔw-kɔbr tɩ dam kpɛ̃w kpɛ̃w za! A mʋ̃tɔ̃w tɩ lɩɛb'a sɔb mɛ̃ pɛn-sɛbla kpirkpir a, ɛ́ a cuw lɩɛbɩ ʋ za, mʋ̃ɔ mɛ̃ zɩ̃ɩ a.

Matie 24:29

«Daadaalɛ, a kpɩɛrʋ á ŋá pùorí, a mʋ̃tɔ̃w na liw na, a cuw kʋ̃ lɛb pɛlɩ ɛ, a ŋmar-bie na yi n a salom zu pɔrɛ lore, ɛ́ a saa-zu kpɛnʋ bʋʋrɛ za na dam'a.

Zeremi 6:23

A ʋ zɛbr-nɩbɛ zɛw nɩ tamɛ nɩ kafin-ŋmali, bɛ kpɛ n po-tuo ɛ́ bɛ zɔrɛ nɩbaalʋ ɛ. A gɔmɛ bɛ na ɩrɛ a, ɩ na mɛ̃ a kʋ̃ɔ-kpɛ̃ɛ kʋ̃ɔ na damnɛ a. Bɛ zɔm'ɩ wie, bɛ pɩɛr'ɩ nɩ vla vla kɛ́ bɛ zɛb'ɩ fʋ, Sɩyɔ̃ tẽw i!»

Ɩzayi 13:10

A saa ŋmar-bi-beƴeni nɩ a al na mɩ́ ɓã taa a kʋ̃ cãà nyɩwrɛ ɩ. A mʋ̃tɔ̃w na mɩ́ pure na wa báarɛ ɛ́ liw, ɛ́ a cuw cãà kʋ̃ cãà caalɛ ɩ.

Amɔsɩ 8:9

À ŋá n'a a Sore ɩ̃ Naaŋmɩn yere: a ʋlɩ bibir a, mʋ̃tɔ̃-tuo n'a ɩ̃ na ɩ a mʋ̃tɔ̃w kpɛ, mʋ̃tɔ̃-tuo, ɩ̃ na ɩ na a tẽw be lige pʋɔ.

A Lãw-mʋɔlɛ 3:2

Ʋ dáa mɛ̃ na ƴãw niŋé ɩ ɩ̃ cere lige pʋɔ ɛ́ bɛr a cãà.

Zeremi 50:42

A bɛ zɛbr-nɩbɛ tɛrɩ tamɛ nɩ kafine, bɛ kpɛ n po-tuo ɛ́ bɛ zɔrɛ nɩbaalʋ ɛ. A gɔmɛ bɛ na ɩrɛ a, ɩ na mɛ̃ a kʋ̃ɔ-kpɛ̃ɛ gɔmɛ a. Bɛ zɔm'ɩ wie, bɛ pɩɛrɩ na tu taa vla vla kɛ́ bɛ zɛb'ɩ fʋ, Babɩlɔn i.

Ekilezɩasɩ 12:2

Lɛ n'a a mʋ̃tɔ̃w nɩ a cãà mɩ́ liw, a cuw nɩ ŋmar-bie mɩ̀, ɛ́ a zũzuwe mɩ́ lɛb wa a saa na mĩ baar'a.

Ɩzayi 13:4

Nyɩ bɛrɛ wone a gɔmɛ á ŋá a tan pʋɔ, a ɩ na mɛ̃ zu-sɛbla na bɛ dɩ vuo a nɛbɛ a. Nyɩ bɛrɛ wone a naalʋ-ten damnʋ ŋa, nɩ-bʋʋrɛ na ɓã taa a. A Sore, a kpɛnʋ-za-sob'ʋ jɩ́rɛ a zɛbr-nɩbɛ kaar a zɛbr ƴãw.

Ɩzayi 17:12

Nyɛ̃ baw-bio a! Nɩ-bʋʋrɛ na yãwmɛ bɛ tɛr nʋɔr a gɔmɛ n'a, gɔmɛ na ɩ mɛ̃ a kʋ̃ɔ-kpɛ̃ɛ gɔmɛ a, nɩ-bʋʋrɛ damnʋ na ɩ mɛ̃ a kʋ̃ɔnɩ na damnɛ nɩ suur a.

Ɩzayi 30:6

Dʋn na tuo tuor a tɔlɛ nɩ a Negɛɛvʋ wɛja-kpalɛ pʋɔ. Kpɩɛrʋ zie na ɩrɛ dɛ̃bɩ̃ɛ nɩ pʋl-vʋ̃ɔ a n'ʋ, wɛ-narʋ, bʋ̃-daar nɩ bʋ̃-pɔwbɛ, dɔpamɛ nɩ wa-bɩɩr na ƴawr a kpɛb zie n'a. Nɩbɛ tuo nɩ a bɛ na-bome nɩ a bɛ na-bʋ̃-tuor bòn zu nɩ nyɔ̃wmɩ zɩgɛ zu. Nɩ-bʋʋrɛ kãw, na kʋ̃ tɛr yel-ɩra kãw za a bɛ zie a, so a.

Ɩzayi 59:9

Alɛ n'a so a Naaŋmɩn bɛ ɩrɛ bom a tɩ ƴãw ɛ, ɛ́ bɛ wule a tɩ mɩnʋ ɛ. Tɩ tɩ tɩɛrɛ nɩ a cãà, ɛ́ a wa ɩ a lige. Tɩ tɩ gùre nɩ a zi-cãà, ɛ́ wa cere lige pʋɔ.

Zeremi 13:16

Nyɩ ɩ a Sore nyɩ Naaŋmɩn nyɛ̃ a yúor-vɩɛlʋ-danʋ, ɛ́ a zie wa bãw sɔb, ɛ́ nyɩ wa bãw ŋmɩɛr a gbɛ́ɛ a tan a tɩ̃ɩsɔw lige na pili páw a zu. Nyɩ tɩ gùre nɩ a cãà, ʋʋ wa lɩɛbɛ ʋ ʋ ɩrɛ lige, ʋ ɩ zũzuwr sɛbla.

Ezekɩɛl 26:3

A na ɩ à ŋá a, a mãa Sore Naaŋmɩn yere na: Ɩ̃ waar'ɩ a fʋ ƴãw, Tɩ́ɩ̀r tẽw i. Ɩ̃ na ɩ n nɩ-bʋʋr-yaga ìr a fʋ ƴãw mɛ̃ kʋ̃ɔ-kpɛ̃ɛ na mɩ́ ɩ a ʋ kʋ̃ɔ mie ìr a.

Amɔsɩ 5:18

Zu-bio dem'ɩ a bɛlɩ dem na ƴãw a bɛ tɩɛrʋ za a Sore waa bibir ƴãw a! A Sore bibir ŋa wa vɩɛ a, bʋ̃ʋ n'ʋ nyɩ na páw? A bibir ŋa na ɩ n lige bibir, ʋ kʋ̃ ɩ cãà bibir ɛ.