Ƴɛrɛŋa a, à ŋá n'a a Sore na ír fʋ a, Zakɔb i, ʋl na mɛ b'a, Ɩsɩrayɛl i, à ŋá n'a ʋ ƴɛ̀rɛ: «Ta zɔrɛ dɛ̃bɩ̃ɛ ɩ, ɩ̃ ya na de fʋ, a fʋ yúor'ʋ ɩ̃ bʋɔlɩ, mãa so fʋ.
A nɩ-faa, ʋ bɛr a ʋ ɩb! A yel-fa-maalɛ, ʋ bɛr a ʋ tɩɛr-faar! Bɛ lɛb wa a Sore zie bɛ za, bʋ̃ʋ n'ʋ vɛ̃, ʋ na zɔ n bɛ nɩbaalʋ! Bɛ lɛb wa a tɩ Naaŋmɩn zie, ʋ mɩ́ dɩ n suur yaga za!
Nyɩ yi a Babɩlɔn tẽw pʋɔ, nyɩ yi a tẽw ŋa pʋɔ zɔ. Nyɩ ŋmɩɛr nʋ̃ɔ̀ cɛlsɩ yere nɩ a yel ŋa, nyɩ ɩ bɛ wõ ʋ, nyɩ ŋmɛ ʋ yaarɩ tɩ tɔ a tẽw baarʋ zie. Nyɩ yel: «A Sore ya na de a ʋ tõ-tõ-bie Zakɔb!»
A nɩbɛ a Sore na na ɩ bɛ lɛb so bɛ tʋɔra a na lɛb'a wa. Bɛ na cáarɛ na wa kpɛ n a Sɩyɔ̃ tẽw pʋɔ. Nʋ̃ɔ̀ na bɛ tɛr baarʋ a na caal'ɩ a bɛ niŋe, cɩlʋ nɩ nʋ̃ɔ̀ cɛlsɩ na paalɩ bɛ na, ɛ́ kpɩɛrʋ nɩ kon bɔr.
A Sore yel'a: A ɩ mɛ̃ dɛb zawr'ɩ a ʋ pɔw bɛr, ʋ yi a ʋ zie tɩ kul dɛb-yũo a, ʋ tɛr'ɩ sɔ́r na lɛb kul a pɔw ŋa a? Ʋ̃ʋ'hʋ̃! A tẽw na dɛw nɩ ʋ za. Ɛcɛ a fʋ̃ʋ a, Ɩsɩrayɛl i, fʋ tõ n pɔw-yɛm tome nɩ nɩ-yaga ɛ́ bɔbr kɛ́ fʋ lɛb wa a ɩ̃ zie! A Sore n'ʋ yel.
“A Sore yere na: «Nyɩ wa tɩ ŋmɛ nɔkpɛn. A nyɩ yel-bebe wa mʋ̃ɔ̀ ɓõɓõ a, a na lɩɛb'a pɛlɩ parpar. Alɛ wa mʋ̃ɔ̀ cõcõ a, a na lɩɛb'a pɛlɩ mɛ̃ pi-kɔblʋ pɛn-pla a.
Ɛ́ a fʋ̃ʋ, Sore e, fʋ bãw nɩ a bɛ nɩ-kʋ yele al za bɛ na cɔbrɛ a ɩ̃ ƴãw a. Ta dɩ a bɛ yel-bier suur ɛ, ta ír a bɛ sãwna bɛr ɛ. Bɛ lo a fʋ niŋé! Ɩ ɩb kãw a bɛ ƴãw a fʋ suur daar!
Mɩ́ bɛr wõ mãa nɩ a fʋ nɩ-bʋʋrɛ Ɩsɩrayɛl yãayãa zɛlʋ, tɩmɛ mɩ́ wa puore fʋ a ka a. Sore e, mɩ́ bɛr wõ a salom zu be fʋ na kpɩɛr a, mɩ́ bɛr wõ ɛ́ dɩ suur kʋ̀ tɩ.
Ta zɔrɛ dɛ̃bɩ̃ɛ ɩ, Zakɔb i, fʋ̃ʋ zãzul-cãpile e, fʋ̃ʋ Ɩsɩrayɛl na cɛ bɛ tɛr fãw a. A Sore yere na: Ɩ̃ waar'ɩ a fʋ sõwfʋ. A sob nɛ na yarɛ dier fʋ a, mãa n'ʋ, a Ɩsɩrayɛl Naaŋmɩn na ɩ sõw a.
Salom i, cɩlɛ lãwnɩ a Sore! A salom zu dem za, bɛ puore ʋ nɩ bɛ tʋɔra-siwru! A Sore na yáa nɩ a ʋ bibiir kũu san. Ʋ na yáa nɩ a san a ʋ dɔ̃ dem zu. Ʋ na kʋ̀ n a bɛlɩ dem na hɩ̃ɛn ʋ a, a ʋlɩ bom nɛ bɛ na sɛw taa nɩ a, ɛcɛ ʋ na lɛb'a ɩ a ʋ nɩ-bʋʋrɛ tẽw ʋ vɩɛl.»
Lɛ n'a a Daviir tɩ yel a Natan: «Ɩ̃ maal'ɩ yel-bier sãw a Sore.» A Natan tɩ sɔw nɩ a Daviir à ŋá: «A Sore mɩ̀ dɩ n a fʋ yel-bier suur kʋ b, fʋ kʋ̃ kpi ɛ.
A mãa, a Sore, mãa n'ʋ yere: A lɛn daar a, bɛ na bɔ n a Ɩsɩrayɛl sãwna, ɛ́ kʋ̃ nyɛ̃ ʋ ɛ. Bɛ na bɔ n a Zuda yel-bebe, ɛ́ kʋ̃ nyɛ̃ a ɩ. Bʋ̃ʋ n'ʋ vɛ̃, ɩ̃ na dɩ n suur kʋ̀ a bɛlɩ dem ɩ̃ na na bɛr bɛ cãà vʋʋrɛ a.
Lɛ n'a fʋ na cãà bãwnɩ a koro, vĩ na paalɩ fʋ na fʋ bɛ cãà tɛr nʋɔr ɛ, fʋ na bɛ cãà tɛr yúor a zũú. Ɛcɛ mãa a, ɩ̃ na dɩ n a sãwna al za fʋ na maalɩ a suur kʋ̀ b. A mãa Sore Naaŋmɩn n'ʋ yel.»
Sore e, ŋmɩn kãw bɛ ŋmɛ̃ taa nɩ fʋ ɛ, fʋ mɩ́ de nɩ a sãwna bɛr a baarɩ, ɛ́ dɩ a yel-bebe suur kʋ̀ a fʋ nɩ-bʋʋrɛ na cɛ bɛ kpi a. Fʋ bɛ mɩ́ nyɛ̃ a suur ʋ ka baarʋ ɛ, a na nʋmɛ a fʋ zie kɛ́ fʋ mɩ́ wul tɩ a fʋ nɔ̃wfʋ a ƴãw.