Ɩzayi 4:2 - A SƐB-SÕW

² A ʋlɩ bibir nɛ a, a ʋlɩ bom nɛ a Sore na na ɩ ʋ bul a, na ɩ n a ƴãwfʋ nɩ a yúor-vɩɛlʋ-danʋ. Ɛ́ a ʋlɩ bom nɛ a tẽw na na tɩr a, ɩ a Ɩsɩrayɛl nɩbɛ na cɛ a nyʋ̀ʋ́r nɩ a bɛ yúor.

Ɩzayi 4:2 Referans Kwoze

Zakari 6:12

ɛ́ yel ʋ: “À ŋá n'a a Sore, a Kpɛnʋ-za-sob, yere: Nɩr be n a ka, a yúor dɩ kɛ́ “Bʋ̃-bul”, a nyɔ-vʋʋrʋ na búle nɩ a ʋ gbɛ́ɛ bɔwrɩ pʋɔ, ɛ́ ʋlɛ n'ʋ na lɛb mɛ a ɩ̃ yir-kpɛ̃ɛ,

Zeremi 23:5

A Sore yere na: «A bibir vɩɛrɛ na, ɩ̃ na ɩ Daviir bi-mɩŋa dɔw. Ʋ na ɩ n nãà na bãw a naalʋ-dɩb a, ʋ na ɩrɛ nɩ a lɛ-na-tu-sɔr-a, ɛ́ tuur a mɩnʋ a tẽw pʋɔ.

Zakari 3:8

«A na ɩ à ŋá a, bɛrɛ wone Zozue e, fʋ̃ʋ na ɩ a bàwr-maal-kara a, nyɩ mɩ̀ bɛrɛ wone, nyɩɩm bàwr-maalbɛ na ɩ a ʋ taabɛ a, nyɩɩm za na ɩ a faafʋ na waar'a bãwfʋ a. Ɩ̃ na ƴãw nɩ a ɩ̃ tõ-tõ-bie ʋ wa, a ʋl na dɩ kɛ́ Bʋ̃-bul a.

Ɩzayi 27:6

A nɩdaar na waar a, a Zakɔb bʋʋrɛ na tɛ n nyɩgɛ, a Ɩsɩrayɛl bʋʋrɛ na tɛ n pɩrmɛ ɛ́ pu, bɛ na paal'ɩ a tẽ-daa nɩ a bɛ wɔmɛ.

Zeremi 33:15

A daar ʋl wa ta a, ɩ̃ na ɩ na a Daviir bi-mɩŋa dɔw. Ʋ na ɩ na bɛ ɩrɛ a lɛ-na-tu-sɔr ɛ́ tu mɩnʋ a, a tẽw pʋɔ.

2 Korɛ̃tɩ 4:6

Bʋ̃ʋ n'ʋ vɛ̃, a Naaŋmɩn ʋl na yel kɛ́: «A cãà, ʋ caalɩ a lige sɔgɔ a», ʋl mɩŋa n'ʋ caalɩ a tɩ socie pʋɔ, k'ʋʋ ɩ tɩ bãw a ʋ yúor-vɩɛlʋ-danʋ cãà na caalɛ a Kɩrɩta niwn ƴãw a.

Abɩdɩasɩ 1:17

Lɛ n'a a nɩbɛ na cɩ̃ɛ a na nyɛ̃ sɔwlʋ zie a Sɩyɔ̃ tãw na na lɛb lɩɛbɩ tã-sõw a zu. A Zakɔb bʋʋrɛ na lɛb'a de a bɛ tẽw, a bɛlɩ dem na tɩ faa ʋ a zie.

Zeremi 44:14

A Zuda tẽw nɩbɛ bɛl na cɛ, ɛ́ zɔ wa kpɩɛr a naayir a Eziptɩ tẽw ka a, nɩr kʋ̃ tʋ̃ɔ́ zɔ a bɛ pʋɔ ɩ, nɩr bɛ cɩ̃ɛnɛ ɩ, nɩr bɛ lɛb waar a Zuda tẽw bɛ na bɔbr kɛ́ bɛ lɛb wa kpɩɛr a ɩ. Bɛ bɛ lɛbr waar ɛ, alɛ bɛ ɩ nɩbɛ blãlɛ tɛwr nãà wa cɩ̃ɛ a ɩ.”»

Ɩzayi 60:21

A fʋ nɩbɛ za na ɩ n nɩ-mɩn, bɛ na so nɩ a tẽw ŋa kʋralɛ. Ɩ̃ ír bɛ na nɩ a ɩ̃ nuru kɛ́ bɛ wule a ɩ̃ yúor-vɩɛlʋ-danʋ. Bɛ ɩ na mɛ̃ tɩɩr mãa mɩŋa na sɛl a.

Ɩzayi 53:2

A Sore niŋé a, a tõ-tõ-bie tɩ bàa na mɛ̃ vale a, mɛ̃ va-kũule na tɛ̀ nyɩgɛ tẽ-kõw pʋɔ a. A sãáfʋ nɩ a vɩɛlʋ al bʋʋrɛ a nɩbɛ na mɩ́ jɩ́rɛ a, ʋ bɛ tɩ tɛr a ɩ. A ʋ ŋmɛ̃a bɛ tɩ ɩrɛ tɩ nʋ̃ɔ̀ ɛ.

Sɛb-sõw yielu 72:16

Ble na ʋr'ɩ a tẽw pʋɔ, a bʋ̃-kʋ́ɔrɩ zuru na zaalɛ a tan zu a na ɩ na mɛ̃ a Libã tẽw tãw tɩɩr na zaalɛ a, ɛ́ a tẽ-bɛrɛ pʋɔ a, a nɩbɛ na vɩɛl'a mɛ̃ a póru pʋɔ mʋ̃ɔ a.

2 Pɩɛr 1:16

A tɩ Sore Yeezu Kɩrɩta kpɛnʋ nɩ a ʋ lɛb-waa tɩ na ɩ nyɩ bãw a, suolu bɛ n'a tɩ suoli vla za kʋ̀ nyɩ ɛ. Tɩ nyɛ̃ nɩ a ʋ yúor-vɩɛlʋ-danʋ za nɩ mimir sɩza.

Zã 1:14

A Ƴɛ̀rʋ lɩɛb'ɩ nɩsaal, ʋ wa na wa kpɛ a tɩ sɔgɔ, ɛ́ tɩ nyɛ̃ nɩ a ʋ yúor-vɩɛlʋ-danʋ, a Sãà Bi-been yõ yúor-vɩɛlʋ-danʋ na yi a Sãà zie a, ʋ paal'ɩ nɔ̃wfʋ nɩ yel-mɩŋa.

Luka 21:36

Nyɩ bɛr gʋ̃ɔ ɛ́ puore kʋralɛ: lɛ n'a bɛ na nyɛ̃ nyɩ bɛ sɛwnɩ a yel-tuor á ŋá za na waar a ɩ, ɛ́ nyɛ̃ nyɩ sɛwnɩ saaƴẽwn àrʋ a Nɩsaal Bie niŋé.»

Matie 24:22

A Naaŋmɩn bɛ tɩ ŋmãa a bibie a mɩnɛ bɛr a, nɩr kʋ̃ʋ tɩ cɛ ɩ. Ɛcɛ ʋ ŋmãa nɩ a bibie a mɩnɛ bɛr a ʋ nɩ-kaa-íri zũú.

Zakari 9:17

Nyɛ̃ nʋ̃ɔ̀ na na ɩrɛ bɛ a! Nyɛ̃ bɛ na na vɩɛl a! A ble na mɩ́ kʋ̀ n fãw a pɔlbili ɛ́ a divɛ̃-paala kʋ̀ fãw a pɔwsɩrali.

Ezekɩɛl 7:16

A bɛl na na cãà vʋʋrɛ a na zɔ na kpɛ a tan pʋɔ. Bɛ na kone nɩ a bɛ yel-bebe ƴãw mɛ̃ naŋmamɛ na kone nɩbaal-kon a.

Zeremi 44:28

Nɩbɛ blãlɛ tɛwr'a na tʋ̃ɔ́ cɩ̃ɛ a zɛbr pʋɔ, ɛ́ bɛ na yi n a Eziptɩ lɛb wa a Zuda tẽw. A lɛ pʋɔ a, a nɩbɛ bɛl na cɛ yi a Zuda tẽw wa wa kpɩɛr a Eziptɩ tẽw a, na bãw nɩ sob nɛ ƴɛ̀rʋ na tu a: a mãa dem'a bɩɩ a nyɩɩm dem'a a.

Ɩzayi 45:8

Salom i, bɛr a mɩnʋ ʋ yi a saa-zu be siw mɛ̃ ɓɩɛlʋ a. A zũzuwe, a ɩ ʋ cir mɛ̃ a saa a! A tẽw, ʋ yuo, a faafʋ nyɛ̃ maalʋ ɛ́ a mɩnʋ bul! A mãa, a Sore, mãa n'ʋ ír a bome á ŋá za.»

Ɩzayi 30:23

A Sore na kʋ̀ nyɩ nɩ a saa a bʋ̃-bʋʋrɛ nyɩ na bʋ̀r a ƴãw. A bʋ̃-dɩrɩ a tẽsɔw na na kʋ̀ nyɩ a na ʋr'a ɛ́ nʋmɛ nʋmɛ. A ʋlɩ bibir nɛ a, a dʋn na 'wɔbr'ɩ mʋ̃ɔ mʋ̃ɔ 'wɔbrʋ ziir na yɛlmɛ yɛlmɛ a pʋɔ.

Ɩzayi 11:4

Ʋ na mɩ́ dɩ n a ƴɛ̀rʋ nɩ mɩnʋ kʋ̀ a bãbàalbɛ, ʋ na mɩ́ yel'ɩ a lɛ-na-tu-sɔr-a kʋ̀ a tẽw nan dem. A ʋ ƴɛ̀rʋ na mɩ́ va n a tẽw mɛ̃ dabɔl a, a ʋ nʋɔr pɩɛlʋ na mɩ́ kʋ n a nɩ-faa.

Sɛb-sõw yielu 67:6

A nɩ-bʋʋrɛ, bɛ danɛ fʋ, Naaŋmɩn i, a nɩ-bʋʋrɛ za, bɛ danɛ fʋ!

Eziptɩ tẽw yib 28:2

Bɛ na sɛ n dɛpaal-kpar-son kʋ̀ a Aarɔ̃.

Ɩzayi 26:1

A ʋlɩ bibir nɛ a Zuda tẽw pʋɔ a, a nɩbɛ na yiele nɩ yielu ŋa: «Tɩ tɛr'ɩ tẽ-kpɛ̃ɛ na kpɛmɛ a. A ʋ gub ƴãw a, a Sore ƴãw nɩ dacine ayi viiri koli ʋ.

Ɩzayi 60:15

A nɩbɛ tɩ zawrɩ fʋ na bɛr, bɛ bɛ tɩ nɔnɛ fʋ ɛ, ɛ́ nɩr za bɛ tɩ tuur yire a fʋ zie ɩ. Ƴɛrɛŋa a, ɩ̃ na maalɩ fʋ na fʋ vɩɛl kʋralɛ, mɩ́ ƴãw a nɩbɛ cɩlɛ yome yome za.

Ɩzayi 61:11

Mɛ̃ a lɛ a tẽsɔw na mɩ́ bɛr a ʋ bʋ̃-bule a yi a, ɛ́ a zaadɛ̃ bɛr a bʋ̃-bʋʋrɛ bɛ na bʋ̀r ʋ a bul a, lɛ n'a a Sore Naaŋmɩn na ɩ a mɩnʋ nɩ a danʋ a bul a nɩ-bʋʋrɛ za niŋé.

Ezekɩɛl 34:29

Ɩ̃ na kʋ̀ bɛ nɩ póru na tɛr pʋɔrʋ nɩr za bãwnɩ a, bɛ kʋ̃ lɛb kone kɔ̃ a bɛ tẽw pʋɔ ɩ. A nɩ-bʋʋr-yoru kʋ̃ cãà kpɔwrɛ bɛ ɩ.

Ezekɩɛl 36:8

A lɛn daar a, a Ɩsɩrayɛl tẽw tan zu a, a tɩɩr na tɛr'ɩ a wuli, ɛ́ wɔ̃ wɔmɛ a nyɩ ƴãw, Ɩsɩrayɛl nɩbɛ ɩ̃ nɩ-bʋʋrɛ ɛ. Bʋ̃ʋ n'ʋ vɛ̃, nyɩ kʋ̃ yaa kɛ́ lɛb cen a nyɩ tẽw ɛ.

Malasɩ 3:17

Al pùorí, a Sore kpɛnʋ-za-sob tɩ yel: «A bibir ʋl ɩ̃ na cɔbrɛ a vɩɛfʋ daar a, bɛ na ɩ n a ɩ̃ nɩ-sori, a ɩ̃ nɩ-bʋʋrɛ ɩ̃ na so a. Ɩ̃ na zɔ n bɛ nɩbaalʋ, mɛ̃ sãà na zɔrɛ a ʋ bie, na tone a ʋ tome a, nɩbaalʋ a.