Ɩzayi 37:16 - A SƐB-SÕW

¹⁶ «Sore kpɛnʋ-za-sob, Ɩsɩrayɛl Naaŋmɩn i, fʋ̃ʋ na zɩ̃ a seribɛ̃ mɩnɛ zu-sɔw a, fʋ̃ʋ n'ɩ a tẽ-daa naalʋ-ten za Naaŋmɩn-been yõ, fʋ̃ʋ n'ʋ maalɩ a salom nɩ a tẽw.

Ɩzayi 37:16 Referans Kwoze

Sɛb-sõw yielu 99:1

A Sore ɩ n nãà, a nɩ-bʋʋrɛ màwr'a. A ʋ naalʋ-dà-kɔw bin nɩ a seribɛ̃ mɩnɛ zu-sɔw, a tẽw damnɛ na.

Eziptɩ tẽw yib 25:22

A daw-pàwra zu ka n'a ɩ̃ na mɩ́ ɩ fʋ nyɛ̃ m, a seribɛ̃ ayi cara pʋɔ. A ka n'a ɩ̃ na mɩ́ be, ɛ́ ƴãw a nɛ́ɛ za kʋ̀ b a Ɩsɩrayɛl nɩbɛ ƴãw.»

Sɛb-sõw yielu 86:10

Bʋ̃ʋ n'ʋ vɛ̃, fʋ ɩ n kpɛ̃ɛ ɛ́ maalɛ nɔ-ɓãa-yele, fʋ̃ʋ yõ tẽtẽ n'ʋ ɩ Naaŋmɩn.

Sɛb-sõw yielu 80:1

Yiel-yielbɛ nɩ-kpɛ̃ɛ sɛbɛ pʋɔ yielu. Sɛb-sõw yielu Asafʋ na maalɩ a. Fomie bʋ̃-ŋmɩɛrɩ n'a bɛ mɩ́ ŋmɩɛr ƴãwn.

1 Samɩɛl 4:4

Lɛ n'a bɛ tɩ tõ nɩbɛ a Silo bɛ tɩ de a Sore, a Kpɛnʋ-za-sob na zɩ̃ a seribɛ̃ mɩnɛ zu-sɔw a, wõ-taa daga wa n. A Eli bidɛbr ayi, a Hɔfɩnɩ nɩ a Pɩnasɩ, tɩ bɩɛl'ɩ a wõ-taa daga.

Ebre 4:16

A na ɩ lɛ a, nyɩ ɩ tɩ bɛr tɩɛrʋ ɛ́ taw ta a Naaŋmɩn naalʋ-dà-kɔw pɛr maalʋ na ʋr a. Tɩ na páw nɩ su-ɓaarʋ ɛ́ nyɛ̃ maalʋ a be, k'aa daar wa ta a, tɩɩm nyɛ̃ sõwfʋ.

Kɔlɔsɩ 1:16

Bʋ̃ʋ n'ʋ vɛ̃, ʋlɛ n'ʋ a Naaŋmɩn ƴãw k'ʋ ír a bome za, a saa-zu nɩ a tẽw zu, a bʋ̃-nyɛrɩ nɩ a bʋ̃-bɛ-nyɛrɩ, a al na zɩnɛ naalʋ-dà-kɔwr zuru a, nɩ a al na so a ziir a, a naalʋ-dɩb bʋʋrɛ nɩ fãw bʋʋrɛ za. Ʋlɛ n'ʋ Naaŋmɩn ƴãw ʋ ír a za a ʋl mɩŋa ƴãw.

Zã 1:3

Ʋlɛ n'ʋ so kɛ̀ bom za be, ɛ́ ʋl ƴãw bɛ tɩ n'a a, bom za kʋ̃ʋ tɩ be ɩ.

Ɩzayi 44:24

Ɩsɩrayɛl i, a Sore, a fʋ ya-diere na cɔbrɩ fʋ a fʋ mã puori a, ƴɛ̀rɛ nɩ a fʋ zie à ŋá: «Mãa n'ɩ a Sore na maalɛ bom za a. Mãa n'ʋ dɔl a salom, mãa ɩ̃ yõ tẽtẽ, ɩ̃ yɛ́r'ɩ a tẽw ɛ́ nɩr za bɛ sõw mɛ̃ ɩ.

Ɩzayi 54:5

Bʋ̃ʋ n'ʋ vɛ̃, a sob nɛ na ír fʋ a n'ʋ na ɩ a fʋ sɩr, a sob nɛ a yúor na dɩ k'aa Sore, a kpɛnʋ-za-sob a. A sob nɛ na yarɛ dier fʋ a, a Ɩsɩrayɛl Naaŋmɩn na ɩ sõw a n'ʋ, a sob nɛ bɛ na bʋɔlɛ a “tẽ-daa Sore” a.

Ɩzayi 45:22

Nyɩɩm na wɩɛr tɩ kpɩɛr a tẽw baarʋ zie a, nyɩ lɩɛbɩ cɔw mɛ̃, ɛ́ nyɩ na nyɛ̃ nɩ a faafʋ. Bʋ̃ʋ n'ʋ vɛ̃, mãa n'ɩ a Naaŋmɩn, kãw bɛ lɛb ka be ɩ.

Ɩzayi 44:6

À ŋá n'a a Sore, a Ɩsɩrayɛl Nãà, a ʋl na yarɛ dier ʋ a, a Sore kpɛnʋ-za-sob, yere: «Mãa n'ɩ a niw-diere, mãa n'ɩ a po-pàwrɛ. Mãa bɛ wa n'ʋ a, Naaŋmɩn bɛ ka be ɩ.

Ɩzayi 40:28

Fʋ bɛ bãwnɩ a ɩ? Fʋ bɛ wõ a ɩ? A Sore ɩ n a Naaŋmɩn na be kʋralɛ a. Ʋ ír'ɩ a tẽw za. A ʋ fãw bɛ síwre ɩ, ʋ bɛ bàlɛ ɩ. Nɩr kʋ̃ tʋ̃ɔ́ manɩ a ʋ yã zulu ɛ.

Ɩzayi 37:20

Ɛcɛ fʋ̃ʋ a, Sore tɩ Naaŋmɩn i, faa tɩ a Senakerib nuru pʋɔ. Lɛ n'a a naalʋ-ten za pʋɔ bɛ na bãw kɛ́ fʋ̃ʋ yõ n'ʋ ɩ Naaŋmɩn.»

Ɩzayi 8:13

A Sore, a kpɛnʋ-za-sob'ʋ nyɩ na bãw k'ʋʋ ɩ n sõw. Ʋlɛ n'ʋ a fɛr kɛ́ nyɩ zɔrɛ, ʋlɛ n'ʋ a sɛw k'ʋʋ ɩrɛ nyɩ dɛ̃bɩ̃ɛ.

Ɩzayi 6:3

Bɛ tɩ cɩɩrɛ na yere kʋ̀rɛ taa: «Sõw, sõw, sõw, a Sore, a kpɛnʋ-za-sob! A ʋ yúor-vɩɛlʋ-danʋ paal'ɩ a tẽw za!»

Sɛb-sõw yielu 146:6

A Sore n'ʋ ír a salom nɩ a tẽw, a kʋ̃ɔ-kpɛ̃ɛ nɩ bom za na be a pʋɔ a. Ʋlɛ n'ɩ a yel-mɩŋa gure kʋralɛ.

Sɛb-sõw yielu 46:11

Ʋ cɩɩrɛ na yere: «Nyɩ zɩ̃ zoom, ɛ́ bãw kɛ́ ɩ̃ ɩ n Naaŋmɩn! Ɩ̃ tʋ̃ɔ́ nɩ a nɩ-bʋʋrɛ za, ɩ̃ tʋ̃ɔ́ nɩ a tẽw za.»

Sɛb-sõw yielu 46:7

Nɩ-bʋʋrɛ ɩrɛ nɩ gɔmɛ, naalʋ-ten lore, ɛcɛ Naaŋmɩn ƴɛ̀r'a, a kɔkɔr yi, a tẽw nyɩl.

2 Na-mɩnɛ 5:15

Ʋ tɩ lɛb'a wa daadaalɛ a Naaŋmɩn nɩr zie, ʋlɛ nɩ a ʋ pùor-dem za, wa kpɛ àr a ʋ niŋé ɛ́ yel à ŋá: «Ƴɛrɛŋa a, ɩ̃ pãa bãw na k'aa tẽw za zu a, Naaŋmɩn bɛ lɛb ka be a bɛ ɩ a ʋl na be a Ɩsɩrayɛl tẽw a ɩ. A lɛ pʋɔ a, sàw de a bom ɩ̃ na kʋ̀rɛ fʋ a.»

1 Na-mɩnɛ 18:32

A Eli tɩ lɛb'a mɛ a bàwr-maal-kuur a Sore ƴãw nɩ a kʋsɛbɛ á ŋá. Ʋ tɩ wɛ̀r'ɩ bɔw na na tʋ̃ɔ́ de ta litɩr lɩzɛr'ɩ pie kʋ̃ɔ a, viiri koli a bàwr-maal-kuur.

2 Samɩɛl 7:26

Lɛ n'a a fʋ yúor na yi kʋralɛ, ɛ́ a nɩbɛ yere: “A Ɩsɩrayɛl Naaŋmɩn n'ɩ a Sore Kpɛnʋ-za-sob!” Ɩ a ɩ̃ yir dɩrɛ a naalʋ kʋralɛ.

Wulu-ayi-sob 10:17

Bʋ̃ʋ n'ʋ vɛ̃, a Sore nyɩ Naaŋmɩn n'ɩ a ŋmɩmɛ za Naaŋmɩn, a sorbɛ za Sore, a Naaŋmɩn na ɩ kpɛ̃ɛ a, na kpɛmɛ ɛ́ bɛ tɛr dɩ̃ɛnʋ a. Ʋ bɛ owre ɩ, ɛ́ bɛ sàwr bɛ ŋmɩɛr ʋ nʋɔr ɛ.

Yele-za-pɛr-tib 1:1

A yele-za-pɛr-tib daar, Naaŋmɩn tɩ ír'ɩ a salom nɩ a tẽw.

Ɛsɩdɩrasɩ 1:3

A nyɩ pʋɔ a, a bɛlɩ dem za na pʋɔ a ʋ nɩ-bʋʋrɛ pʋɔ a, bɛ lɛb cen a Zerizalɛm, a Zuda tẽw, tɩ lɛb mɛ a Sore, a Ɩsɩrayɛl Naaŋmɩn na be a Zerizalɛm a, Ŋmɩn-yir-kpɛ̃ɛ. Ɛ́ a bɛ Naaŋmɩn be a bɛ zie!

Ɩzayi 37:15

Al pùorí ʋ puori à ŋá:

Ɩzayi 40:22

A Sore naalʋ-dà-kɔw be n a tẽw tʋra zu-sɔw, ɛ́ a nɩsaalbɛ mɩ́ sãá a ʋ zie ɩ mɛ̃ sãsowe a. Ʋ yɛ́r'ɩ a salom mɛ̃ pɛn-kpɛ̃ɛ a, ʋ dɔl ʋ na mɛ̃ pɛn-sɛw a, a ʋ kpɛb ƴãw.

Ɩzayi 42:5

A Naaŋmɩn, a Sore, na ír a salom nɩ a ʋ yɛ̀lʋ za a, na yɛ́r a tẽsɔw nɩ a ʋ bʋ̃-buli a, na kʋ̀ a nyɔ-vʋʋrʋ a nɩ-bʋʋrɛ na kpɩɛr a ʋ zu a, nɩ a vʋʋrʋ a bɛlɩ dem na dɛnɛ a ʋ zu a, ƴɛ̀rɛ nɩ à ŋá a ʋ tõ-tõ-bie zie:

Ɩzayi 45:12

Mãa n'ʋ maalɩ a tẽw, ɛ́ ír a nɩsaalbɛ na kpɩɛr ʋ a. Mãa n'ʋ dɔl a salom nɩ a ɩ̃ nuru, ɛ́ mɩ́ yel a ŋmar-bi-pɩlwɩlɩ a lɛ a na fɛr k'aa ɩrɛ a.

1 Na-mɩnɛ 8:6

Al pùorí, a bàwr-maalbɛ tɩ kpɛ n nɩ a Sore wõ-taa daga, a zie ʋl na tɩ be be a ʋ ƴãw, a dĩo ʋl bɛ na bʋɔlɛ a zi-sõw-za-zi-sõw a pʋɔ, a seribɛ̃ pɩgɛ pile.