Ɩzayi 24:6 - A SƐB-SÕW

⁶ Alɛ so a Naaŋmɩn ŋmɛ-ƴãw báarɛ a tẽw, ɛ́ a nɩbɛ na kpɩɛr ʋ a nyɛ̃ a dɔwrʋ. Bɛ kpi na ɛ́ tɩ cɛ zaa pʋrɩ.

Ɩzayi 24:6 Referans Kwoze

Matie 7:14

Ɛcɛ a nyɔ-vʋʋrʋ dɩ̃dɔr ɩ n fɩɩra, ɛ́ a ʋ sɔ́r kpɛmɛ, ɛ́ nɩbɛ blãlɛ n'a mɩ́ nyɛ̃ ʋ.»

Ʋrɔm 9:27

Naaŋmɩn-ƴɛ̀r-manɛ Ɩzayi n'ɩ ŋan ka lowr mɩ̀ yere kpɛ̃w za a Ɩsɩrayɛl nɩbɛ ƴãw: «A Ɩsɩrayɛl bibiir mɩ̀ saa tɩ yãwmɛ man a kʋ̃ɔ-kpɛ̃ɛ nʋɔr biire a, a bɛ ŋmãa na cɛ a tɛwr'a nãá nyɛ̃ a faafʋ.

Levitɩ mɩnɛ 26:22

Ɩ̃ na ƴãw na wɛ-dʋn wa a nyɩ ƴãw, wa kʋ a nyɩ bibiir, kʋ a nyɩ dʋn pàw pɛr, ɛ́ baarɩ nyɩ, bɛ bɛ mɩ́ cãà nyɛ̃ nɩr sɔ́r zu ɛ.

2 Pɩɛr 3:10

A Sore waa bibir na vɩɛ na mɛ̃ nyãnyuge a. A ʋlɩ bibir nɛ a, a salom na dam'a ɩ gɔmɛ tɛwr ɛ́ bɔr. A salom zu bʋ̃-íri na nyɔw nɩ vũu dɩ nyɩl, a tẽw nɩ a bome al za na be a ʋ zu a kʋ̃ cãà ɩ.

Malasɩ 3:9

Ŋmɛ-ƴãw tuur nyɩ na, nyɩ na bɛlɛ mɛ̃ a ƴãw, nyɩɩm ɩ̃ nɩ-bʋʋrɛ za a.

Ezekɩɛl 5:3

Ɛcɛ, fʋ na tɛr'ɩ a kɔblʋ zaa pʋrɩ ƴãw a fʋ kparʋ pʋɔ.

Ɩzayi 1:31

A nɩr na tɛr fãw a na lɩɛb'a ɩ mɛ̃ mʋ̃ɔ a, ɛ́ a ʋ ɩ-ɩrɩ ɩ vũu-zele. Bɛ za ayi na lãw na dɩrɛ, ɛ́ nɩr kʋ̃ tʋ̃ɔ́ kpiiri a vũu ŋa ɩ.

Wulu-ayi-sob 28:62

Nɩbɛ blã lɛ tɛwr'a na cɛ a nyɩ pʋɔ, nyɩɩm na tɩ yãwmɛ mɛ̃ a saa ŋmar-bie a. Bʋ̃ʋ n'ʋ vɛ̃, a nyɩ na kʋ̃ bɛr wõ a Sore nyɩ Naaŋmɩn ƴɛ̀rʋ a ƴãw n'a.

Wulu-ayi-sob 4:27

A Sore na diw nyɩ na yaarɩ a nɩ-bʋʋr-yoru pʋɔ. Nɩbɛ blãlɛ tɛwr'a na cɛ a nyɩ pʋɔ, a ten al pʋɔ ʋ na na diw nyɩ cen nɩ a gbãgbaalʋ pʋɔ a.

Matie 27:25

A zu-sɛbla za tɩ sɔw na yel: «A yele a ʋ kũu na na wa n a, a lɛb lo a tɩɩm nɩ a tɩ bibiir zu!»

Ɩzayi 5:24

Alɛ so bɛ na ɩ mɛ̃ mʋ̃ɔ vũu na dɩ a, bɩɩ mɛ̃ a mɔ̃-kon na bɔr vũu-zɛlɛ pʋɔ a. A nyɩgɛ ƴãw n'a bɛ na tĩ pʋ̃ɔ́, ɛ́ a bɛ puuru lɩɛbɩ uuru ìr do. Bʋ̃ʋ n'ʋ vɛ̃, bɛ zawr'ɩ a Sore, a kpɛnʋ-za-sob, wulu bɛr, bɛ bɛ ŋmɛlɩ kaa a Ɩsɩrayɛl Naaŋmɩn na ɩ sõw a ƴɛ̀rʋ ɛ.

Ɩzayi 9:19

A nɩbɛ mɩ́ ŋmãa nɩ a dʋrʋ lowr, ɛ́ a kɔ̃ cãà kʋrɛ. Bɛ mɩ́ vɔl'ɩ a gʋba lowr ɛ́ bɛ tɩw ɛ. Ŋa za mɩ́ ìr'ɩ a ʋ tɔ sob ƴãw:

Ɩzayi 34:5

A Sore zɛbr-sɔ-kpɛ̃ɛ ɩ n zɩ̃ɩ a salom zu. Ʋlɛ n'ɩ ŋan siwr a Edɔm tẽw dem zu, nɩbɛ ʋ na yel kɛ́ bɛ kʋ pàw pɛr a.

Ɩzayi 43:28

Lɛ n'a ɩ̃ ír a nɩ-bɛrɛ ɩ̃ na tɩ ƴãw a bɛr a nɩ-kpɛ̃ɛnʋ pʋɔ. Ɩ̃ bɛr'ɩ a Zakɔb nɩbɛ kɛ́ bɛ sãw bɛ bɛr, ɛ́ bɛr a Ɩsɩrayɛl nɩbɛ kʋ̀ a bɛ dɔ̃ dem bɛ tʋʋr bɛ.

Zeremi 5:14

A na ɩ à ŋá a, à ŋá n'a a Sore, a Naaŋmɩn kpɛnʋ-za-sob, yere: «Bɛ na faa ƴɛ̀rɛ à ŋá a, Zeremi i, a ƴɛ̀rʋ ɩ̃ na ƴãwnɛ a fʋ nʋɔrɩ́ a na ɩ na mɛ̃ vũu a. A nɩbɛ bɛ ŋa na ɩ na mɛ̃ dàar a vũu na na dɩ a.»

2 Na-mɩnɛ 24:12

Lɛ n'a a Zuda tẽw nãà, Yoyakin, tɩ ƴãw ʋ tʋɔra a Babɩlɔn tẽw nãà nuru pʋɔ, lãwnɩ a ʋ mã, a ʋ sojarɩ nɩ-bɛrɛ, a ʋ nɩ-yée nɩ a ʋ tõ-tõ-bi-bɛrɛ. A Nabikodonozɔɔr tɩ nyɔw bɛ na bɛ ɩ gaso nɩbɛ. A ʋ naalʋ-dɩb yome ani sob tɩ n'a.

2 Na-mɩnɛ 25:12

Ɛcɛ ʋ tɩ bɛr'ɩ a tẽw pʋɔ nan dem bɛ mɩnɛ, kɛ́ bɛ kʋɔr a divɛ̃ tɩɩr póru nɩ a póru.

Ɩzayi 1:9

A Sore, a kpɛnʋ-za-sob, bɛ tɩ bɛr tɩ nɩbɛ blã bɛ cɩ̃ɛ a, tɩ nãà ɩ na mɛ̃ a Sodɔm tẽ-kpɛ̃ɛ a, tɩ nãà ŋmɛ̃ na taa nɩ Gomɔɔr.

Zeremi 12:4

Debor'a a tẽw na be a wahala pʋɔ tɩ ta? Debor'a a póru na ko gã tɩ ta? A dʋn nɩ a lili za kpiir'a, a tẽw dem ɩ-faar zũú. Bɛ yere na: «Zeremi kʋ̃ cãà be nyɛ̃ a lɛ a na ŋmɛ̃ tɩ a ɩ.»