10 Ɩ̃ bɛ sɩb ɩ̃ tʋɔra bom kãw za ɩ̃ na bɔbr a ɩ. Ɩ̃ bɛ zawrɩ nʋ̃ɔ̀ kãw za wob ɛ. Yel-mɩŋa, ɩ̃ ír'ɩ a ɩ̃ tome za tɔnɛ, ɛ́ wõ a nʋ̃ɔ̀ al za a na tɩ tʋ́ɔr kʋ̀rɛ mɛ̃ a.
Wone a nyɔ-vʋʋrʋ nʋ̃ɔ̀ nɩ a pɔw ʋl fʋ na nɔnɛ a, a fʋ nyɔ-vʋʋr-ŋmãa ŋa a Naaŋmɩn na kʋ̀rɛ fʋ a tẽw zu ka bibie za a pʋɔ. Sɩza, a fʋ nyɔ-vʋʋrʋ ɩ n ŋmãa, ɛ́ a fʋ dem'ʋ fʋ páw a lɛ, a fʋ tẽw zu ka tome fʋ na tone a ƴãw.
Lɛ n'a ɩ̃ nyɛ̃ k'aa nɩsaal yel-vla vla za n'ɩ k'ʋʋ wone nɩ nʋ̃ɔ̀ a ʋ tome tɔnɛ. A ʋ dem tɛwr'ɩ a lɛ, bʋ̃ʋ n'ʋ vɛ̃, nɩr bɛ lɛb tɛrɛ ʋ waar'ɩ ʋ wa nyɛrɛ bom nɛ na na ɩ a ʋ pùorí a ɩ.
Bʋ̃ʋ n'ʋ vɛ̃, bom za a tẽ-daa na so a: a nɩsaal pʋ-tɩɛrʋ bʋ̃-bɔbrɩ na bɛ vɩɛl a, bom fʋ na mɩ́ nyɛ̃ a mimir zaalɛ a, a pɔ̀l-ɩb a tɛra pʋɔ, à á ŋá za bɛ yire a Naaŋmɩn Sãà zie ɩ, a tẽ-daa zie n'a a yire.
Pɔlbile e, wone a nʋ̃ɔ̀ a lɛn daar fʋ na cãà ɩ pɔlbile a, cɩlɛ a ʋlɩ daar nɛ. Ɩrɛ lɛ za fʋ na bɔbr nɩ lɛ za na pɛlɩ a fʋ pʋɔ a. Ɛcɛ bãwnɩ a a Naaŋmɩn na na dɩ n fʋ ƴɛ̀rʋ a fʋ ɩ-ɩrɩ za ƴãw a.
A pɔw tɩ nyɛ̃ nɩ a tɩ-wɔmɛ a vɩɛl a jɩ́rʋ ɩrɛ nʋ̃ɔ̀, ɛ́ a sɛw k'aa nʋmɛ, ɛ́ a dɩb ɩrɛ vʋla yel-yaga bãwfʋ ƴãw. Ʋ tɩ pɔr'ɩ a wɔm kãw dɩ. Al pùorí ʋ kʋ̀ ʋ a ʋ sɩr na tɩ be a ʋ zie a ʋ mɩ̀ dɩ.
Lɛ so, a bom a mãa na nyɛ̃ ʋ vɩɛl'a n'ɩ ŋa: a sɛw na k'aa nɩsaal mɩ́ dɩrɛ, ɛ́ nyuur ɛ́ wone nʋ̃ɔ̀ nɩ a ʋ tome tɔnɛ a tẽw zu ka, a nyɔ-vʋʋrʋ a Naaŋmɩn na kʋ̀ ʋ a daar. Bʋ̃ʋ n'ʋ vɛ̃, a ʋ dem'ɩ a lɛ.
Mãa a, ɩ̃ danɛ nɩ a nʋ̃ɔ̀. Bʋ̃ʋ n'ʋ vɛ̃, a tẽw zu ka a, a nɩsaal nʋ̃ɔ̀ been tẽtẽ n'ɩ k'ʋʋ dɩrɛ, k'ʋʋ nyuur, ɛ́ wone nʋ̃ɔ̀. Ɛ́ à á ŋá n'a a fɛr k'aa bɩɛlɛ a ʋ tome bibir za a Naaŋmɩn na kʋ̀ ʋ, k'ʋʋ vʋʋrɩ a tẽw zu ka a.