Zephaniah 3:20 - De Beebaa Dabu

²⁰ De masavaa laa gai au e hagabuni naa goodou, ga gaamai gi doodou henua i de masavaa laa. Au e hai naa denga huaadangada alodahi i henua i lalo gi duuhia ma de hagadubu goodou, i de masavaa aagu e hagaahe adu ai doodou manuuia, gi gidee ai e goodou,” go Tagi Maolunga e hagadaba.

Zephaniah 3:20 Referans Kwoze

Jeremiah 29:14

E hagadaba Tagi Maolunga: Goodou e gidee naa donu au, gai au e hagaahe adu naa doodou manuuia. Au e hagabuni mai naa goodou i denga huaahenua alodahi, ma mommee aagu ne hai goodou gi mavaevae saele aagena, go Tagi Maolunga e hagadaba; au e hagaahe mai naa goodou gi de mommee aagu ne kave gee ai goodou gi denga henua gee.

Malachi 3:12

Gai denga huaahenua alodahi e hagataba naa bolo goodou gu manuuia, i hiidinga doodou henua gu se mommee hagamalangilangi, go Tagi o denga hagabuulinga hebagi e hagadaba.

Isaiah 56:5

au e hai naa dahi hagamaanadu ma dahi ingoo moolaadeu i lo te temple ma lodo ono buibui, gi danuaa ange i denga dama daane ma damaa hine; au e gaavange naa gi gilaadeu dahi ingoo e dee ngado mai gai e dee maua donu gi lilo.

Zephaniah 3:19

Tilo, de masavaa laa gai au e hagaduasala naa gilaadeu alodahi ne vaivai haia goe. Au e hagaola naa tangada balagelage ma de hagabuni mai dangada gu mavaevae saele laa. Au e hai naa dangada gi duuhia ma de hagadubu gilaadeu, i henua alodahi olaadeu ne hagadookaa ina ai laa.

Amos 9:14

Au e hagaahe ange naa de manuuia o ogu dangada go de gau Israel. Gai gilaadeu e aahe ange naa ga hagatuu age denga aduhale gu maoha laa ga nnoho ai. Gilaadeu e doo naa denga veelengaa grape ga unu uvaini e hai ai, gilaadeu e doo naa alaadeu veelenga ga gai hua iai.

Joel 3:1

“Tilo, laangi laa ma de masavaa laa, gai au e hagaahe ange naa de manuuia o Judah ma Jerusalem.

Ezekiel 34:16

Au e ssala naa ssiibi gu dee maleva laa, ma de hagaahe mai gilaadeu gu hulo gee. Au e saabini naa maanuga o ssiibi gu lagohia laa ma de hagammahi gilaadeu e baageaa, aagai au e daa naa gi maakau denga ssiibi pedi ma de mmahi. Au e hagaloosi ange naa gilaadeu i de hagamodu heohi.

Isaiah 60:15

E dee galemu donu koe ne dilia ma de kino ai o dangada, gai gu deai dangada e loomai laa kilaa, aagai au e hai naa goe gi maolunga ga hano ai, gai gi se mommee e malangilangi ai denga atangada alodahi.

Zephaniah 2:7

Gai dangada e doe i Judah e henua ai naa; gilaadeu e dugu naa alaadeu ssiibi i kilaa. Gilaadeu e daakodo iho naa i de ahiahi i lodo hale o de gau Ashkelon. Gai Tagi Maolunga, delaadeu Maadua e tilo ange naa gilaadeu, ma de hagaahe mai delaadeu manuuia.

Ezekiel 39:28

Gai gi iloo ai e gilaadeu bolo go au donu go Iahweh delaadeu Maadua; e dee galemu donu dagu hai gilaadeu gi hulo gi nnoho i magavaa o denga huaahenua, gai au e hagaahe mai donu gilaadeu gi delaadeu henua, au e dee dugu donu dahi gilaadeu gi noho i kilaa.

Ezekiel 37:21

gai koe ga hai ange gi gilaadeu, ‘E hagadaba de Ia Aamua go Iahweh: Tilo, au e hagaahe mai naa de gau Israel i denga huaahenua olaadeu gu hulo laa aagena. Au e hagabuni mai naa gilaadeu i mommee alodahi, ga hagaahe mai gilaadeu gi delaadeu henua donu.

Ezekiel 28:25

E hagadaba de Ia Aamua go Iahweh: De masavaa naa huu aagu e hagaahe mai ai de gau Israel i denga huaahenua olaadeu gu mavaevae saele laa aagena, gai au ga hagaago ange gi denga huaahenua bolo au e dabu. Gai gilaadeu e aahe mai naa ga nnoho i delaadeu henua, go de henua aagu gu gaavange gi dogu dangada hai hegau go Jacob.

Isaiah 66:22

De langi hoou ma henua i lalo hoou aagu e hai e dee llilo naa donu, go Tagi Maolunga e hagadaba; gai e bei ai hogi doo hagadiilinga ma doo ingoo.

Isaiah 61:9

Gai denga huaahenua e iloo naa dagodo o olaadeu aamuli, gai denga huaadangada e iloo naa dagodo o olaadeu hagadiilinga. Dangada alodahi e gidee gilaadeu e iloo naa bolo gilaadeu go de huaadangada a Tagi Maolunga gu hagamanuuia.

Psalm 35:6

Haia gi gohu ma de segesege delaadeu haiava, gai tangada de langi o Tagi Maolunga gi dolohia gilaadeu!

Ezekiel 37:12

Deenei ai, basa pelaabisi mage hai ange gi gilaadeu, ‘E hagadaba de Ia Aamua go Iahweh: Tilo, ogu dangada, au e hhuge naa oodou daanunga, ga hai goodou gi hiihidi age mai i lodo oodou daanunga, ma de hagaahe mai goodou gi nnoho i doodou henua go Israel.

Isaiah 62:12

Gai gilaadeu e hagaingoo ange naa go de Gau Dabu, go Dangada a Tagi Maolunga gu Hagaola; gai koe e hagaingoo ange naa go de Aduhale e Saalaa, se Aduhale e dee Dilia.

Ezekiel 16:53

Aagai au e hagaahe ange naa de manuuia o Sodom ma ana damaa hine, ma de manuuia o Samaria ma ana damaa hine, gai au e hagaahe adu naa hogi doo manuuia madali gilaadeu,

Isaiah 62:7

gai gi dee dugua ange ia gi hagamabu ga dae ai gi dana hagaahe age Jerusalem, ma de hai gi se mommee e tuhi hagadanuaa i henua i lalo.

Isaiah 56:8

Gai de Ia Aamua go Iahweh e hagadaba, go de ia e hagabuni ina mai de gau Israel gu i denga henua gee: “Au e hagabuni mai naa hogi de gau ange laa, gi daho olaadeu aagu gu lava laa i de hagabuni mai.”

Deuteronomy 26:18

Gai Tagi Maolunga gu tala hogi anailaa nei bolo goodou se huaadangada hagamogomogo niiona, bei dana hai gu hagatoo donu adu ai gi goodou. Gai goodou gi daohia ana muna alodahi,

Deuteronomy 26:19

gai ia e hai goodou gi maolunga ange i denga huaahenua alodahi aana gu hagatuu age. Gilaadeu e tuhi naa ma de tala hagadanuaa oodou dagodo ma de hagadubu goodou, gai goodou e hai naa ga se huaadangada dabu ange gi Tagi Maolunga doodou Maadua, bei dana hai gu tala ai laa.

Jeremiah 30:3

E tae mai naa laangi, go Tagi Maolunga e hagadaba, aagu e hagaahe ange ai de manuuia o dogu huaadangada, go dangada o Israel ma Judah, ga hagaahe gilaadeu gi de henua aagu ne gaavange gi olaadeu dubuna gi henua ai,” go Tagi Maolunga e hagadaba.

Ezekiel 39:13

Gai dangada alodahi i de henua e danu naa gilaadeu, gai gilaadeu e kave ai naa de hagadubu i delaadeu hai de hegau nei, i de laangi aagu e hagamahamaha ai au, go de Ia Aamua go Iahweh e hagadaba.

Zechariah 8:8

ga hagaahe mai gilaadeu gi nnoho i Jerusalem. Gilaadeu e hai naa go ogu dangada, gai au go delaadeu Maadua, i de muna abodonu ma de heohi.

Jeremiah 23:3

Gai au e gaamai naa gilaadeu e doe i dagu hagabuulingaa ssiibi i henua alodahi aagu gu kave gilaadeu aagena, gai au ga hagaahe mai gilaadeu gi lo te laadeu buibui, gai gilaadeu ga hagadili ai naa ga soa.

Jeremiah 33:9

Gai de aduhale nei e hai naa ga se mee e haia ga malangilangi au, ma de tala tuhi aama de hagadubu au i daho denga huaahenua alodahi o henua i lalo, e langona mee danuaa alodahi aagu gu hai ange gi gilaadeu. Gai gilaadeu e maatagu naa ma de bolebole i hiidinga o mee danuaa alodahi ma dagu hai ga nnoho paba de aduhale.

Micah 2:12

Jacob, au e hagabuni mai naa oo dangada. Au e hagabuni mai naa de gau Israel e doe. Au e hagabuni mai naa gilaadeu bei denga ssiibi i lo te buibui, ma de hagabuulingaa ssiibi i de mommee iai helii; gai de henua e soa naa dangada e nnoho ai.

Micah 4:7

Au e hai naa tangada balagelage go dahi dangada e doe, gai dangada ne gaavee gee e hai naa ga se huaahenua mmahi. Gai Tagi Maolunga e dagi naa gilaadeu i honga de mounga go Zion, mai de laangi laa, ga hano ai e dee ngado mai.

Zechariah 8:13

Dangada o Judah ma dangada o Israel, i mua gai goodou se muna hagamalaia i daho denga huaahenua, aagai iainei au gu hagaola goodou e hai gi se mee hagamanuuia. Goodou aude maatagu, aagai gi lodo mmahi.