Zechariah 9:14 - De Beebaa Dabu

¹⁴ Gai Tagi Maolunga e hagasula mai naa i honga ono dangada, gai tao o dana mee hholu e gemo bei de uila. De Ia Aamua go Iahweh e ili naa de hanga manu; ia e hano naa e hebagi bei dagodo o ssio e humai laa i ngaage,

Zechariah 9:14 Referans Kwoze

Psalm 18:14

Ia e tili dao o dana mee hholu gi mavaevae saele ai denga hagadaumee; de labalaba o denga uila e hai gi ssenga ange gilaadeu.

Isaiah 66:15

Tilo, Tagi Maolunga e humai naa madali de ahi, gai ono hada hebagi e bei dahi sio; ia e hagahai hegau naa dono lili i dono bole, gai dana hagasee e hai naa madali de ahi ula.

Zechariah 14:3

Gai Tagi Maolunga e hano naa ga hebagi ange gi denga huaahenua, bei de hai de hebagi i de laangi o taua.

Zechariah 2:5

Gai Tagi Maolunga e hagadaba: Au e hai naa ga bei de ahi e duuli ina luu baasi o Jerusalem, gai go de mahamaha i ono lodo.’ ”

Isaiah 27:13

De laangi laa gai dahi hanga manu laumalie e ili naa. Gai dangada gu dai maakau laa i Assyria ma gilaadeu gu noonoodia laa ma gu gaavee gi Egypt, e loomai naa ga daumaha ange gi Tagi Maolunga i honga de mounga dabu i Jerusalem.

Isaiah 21:1

Muna hagadaemaha i dagodo o de Vao i gaogao Tai. Dahi hagadaumee e humai naa i de vao, ma mai i dahi henua hagamaatagu, bei denga sio e ssau mai laa i de Negev.

Revelation 6:2

Gai au ne galo age ga gidee dahi hoosa tea, gai de ia e gage ai e poo dahi mee hholu, gai gu dugu ange dahi hau gi honga dono biho, gai ia ga sao ga hano e hagamaakulu aama de hagadee kii.

Habakkuk 3:11

De laa ma de maasina gu tuu donu huu i lo te langi i de tili dao malamalama o dau mee hholu, ma de maalama o dau dao malamalama.

Isaiah 30:30

Gai Tagi Maolunga e hai naa gi langona e dangada dono leo maolunga, ma de gidee de hagaabo dono lima i dono bole, ma de ahi ula mmahi e duungia laa mee, madali de langi pala, ma de madangi, aama dibadibaa haisi.

Hebrews 2:4

Gai de Maadua ne tala hagadonu hogi mee nei, i denga hagailonga ma mee hagalele mouli ma denga hagadaagangaa sauaa mmahi, aama denga duuhanga mai i daho de Hagasaalunga Dabu, bei dagodo o dana hagatau.

Romans 15:19

ma hagailonga mmahi ma mee hagalele mouli, i ssauaa o de Hagasaalunga o de Maadua. Gai au gu agoago de longo danuaa o Klisdo alodahi, mai i Jerusalem ga dae ai gi Illyricum,

Matthew 28:20

ma de agoago ange gilaadeu gi daudali i mee alodahi aagu gu tala adu gi goodou. Gai tilo, au e noho i oodou daha i masavaa alodahi ga dae ai gi de hagaodi.”

Zechariah 12:8

De laangi laa gai Tagi Maolunga e buibui naa dangada e nnoho i Jerusalem; de laangi laa gai tangada baageaa hugadoo e mmahi naa bei dagodo o David, gai de aamuli o David e dagi naa gilaadeu, bei dagodo o de Maadua, ma tangada de langi o Tagi Maolunga.

Isaiah 31:5

Gai e bei hogi denga manu llele e hagamaamaane laa i lo te moana, Tagi o denga hagabuulinga hebagi e buibui naa Jerusalem; ia e buibui naa Jerusalem ma de hagaola de aduhale; ia e hagamaamaane naa i honga Jerusalem e hagaola ai de aduhale.”

Isaiah 18:3

Goodou dangada alodahi o henua i lalo, go dangada e nnoho i honga de henua, de masavaa naa huu e hagaduu age ai de hagailonga i honga de mounga, gai goodou gu gidee, gai de masavaa naa huu e ili ai de hanga manu, gai goodou gu langona.

Joshua 10:42

Joshua ne hagadee kii denga hodooligi laa alodahi, ga kave olaadeu henua i de masavaa laa, i e dahi donu huu hanonga, go hiidinga Tagi Maolunga de Maadua o Israel, ne hebagi i hiidinga o Israel.

Matthew 24:31

Gai ia e hai naa gi hulo ana dangada de langi i de ili o de trumpet, gai gilaadeu e hagabuni mai naa ana dangada gu hili i denga madangi e haa, ma mai i dahi bido o de langi ga hano ai gi de bido ange laa.

Habakkuk 3:14

Koe ne hai ono dao ga velo ai dono biho, i de masavaa a ono daane hebagi ne loomai ai e hagamavaevae saele gimaadeu bei dagodo o ssio; gilaadeu ne malangilangi i de vaivai hai de gau hagaau aloha gu mmuni laa.

De Beebaa go Job 37:9

Ssio e sao mai i dono aabi, gai de madangi e hai ga hagamagalili.

Psalm 18:15

Lodo ava o tai gu ssula age, gai dagelo o henua i lalo gu gidee, i dau hagasee e Tagi Maolunga, ma dau busi luoo bongaa usu.