Titus 2:3 - De Beebaa Dabu

³ Gai e bei ai hogi denga haahine maatua, agoagona ange gilaadeu gi ni haahine dabu i delaadeu hai e hai hegau ai, gilaadeu gi dee hai samu, aabe gi ssenga ange gi de unu uvaini, aagai gilaadeu gi ni haahine e agoagona mee danuaa.

Titus 2:3 Referans Kwoze

Titus 2:4

Gai gilaadeu gi agoago ange denga gauligi haahine, gi aaloha i olaadeu bodu ma alaadeu dama.

1 Timothy 3:11

E bei ai hogi, olaadeu bodu gi ni haahine e hagadubu i daho dangada, gilaadeu gi dee llodo e hai samu, gai gi dee llodo e unu gi ssenga, gai gi hai hegau i de muna abodonu i mee alodahi.

Titus 1:7

Go hiidinga tagi o de nohoanga dabu o de Maadua, e hai donu gi deai ono mee e hagabaubau ina ai — ia gi dee hagamaolunga, be gi moolau de lillili, be gi se dangada e lodo e unu gi senga, be se dangada alasala, aabe go de nnoo hagamau mee,

1 Timothy 3:8

Gai e bei hogi denga deacon, gilaadeu gi ni dangada e hagadubu i daho dangada, gilaadeu gi dee hadu muna, ma tee llodo e unu uvaini lagolago, gai gi dee nnoo hagamau mee.

Romans 16:2

Goodou balea ange ia i de ingoo o Tagi Maolunga, bei dagodo hegau e heohi i de hai i daho dangada o de Maadua, gai goodou bale ange ia i mee alodahi oona e duasala ai, go hiidinga gu soa dangada aana ne bale ange, gai ia ne bale mai hogi au.

Ephesians 5:3

Aagai gi deai donu se dangada hai be se manu i oodou magavaa, be se dangada dahulinga hakino gee daudahi, aabe go de nnoo hagamau mee; go hiidinga mee nei e dee heohi ange donu gi dangada o de Maadua.

Revelation 2:20

Aagai e dahi mee aagu e hagasee ai goe: koe e dee buibui de hine go Jezebel, e tala laa bolo ia se pelaabisi, gai e agoago ange ma de hagasenga ogu dangada hai hegau gi haia denga dahulinga dagodo hai be se manu, aama de gai mee gu sigidaumaha ange gi denga diinonga.

Hebrews 5:12

Iainei goodou gu maua donu i de agoago, gai e deai, goodou goi aahe ange huu ma e agoago i muna heohi a de Maadua i taamada. Goodou goi mouli donu huu i vai uu, goodou tigi maua donu i de gai mee makaga;

1 Timothy 5:23

Aude unumia donu huu vai, aagai unumia hanu momo uvaini e bale adu ai doo dinae aama oo magi e dee modu naa de magi ai.

Romans 1:29

Gai alaadeu maanadu gu hoohonu i denga hagadaagangaa dahulinga dee heohi, ma de baubau, ma de nnoo hagamau mee, ma de maanadu baubau. Gilaadeu e llodo gaiaa mmao, ma de daa tangada gi magau, ma de hagadaumee, ma de daahanga dangada, ma de alasala, ma de kave muna hagabaubau,