Revelation 14:6 - De Beebaa Dabu

⁶ Gai au ne gidee ange hogi dahi dangada de langi e lele i lo te moana i lunga, ia e kave de longo danuaa dee ngado mai laa, e tala ange gi dangada e nnoho i henua i lalo, go denga huaahenua ma denga aamuli, ma dangada e pasa i denga hagadaagangaa muna, aama denga huaadangada alodahi.

Revelation 14:6 Referans Kwoze

Mark 16:15

Gai ia ga hai ange gi gilaadeu, “Goodou hulo gi henua i lalo alodahi ga agoago ange ai de longo danuaa gi dangada alodahi.

Revelation 8:13

Gai au ne gidee ma de langona dahi igele e hagadaba i de leo mmahi, i dono masavaa e lele ai i lo te moana, “E vakaa naa, e vakaa naa, e vakaa naa dangada e nnoho i henua i lalo, go hiidinga denga dangada de langi dogodolu ange laa gu dai ili naa alaadeu trumpet!”

Revelation 3:10

Koe ne daohi agu muna i doo hagaduu ngae ga golomagi oo lodo, deelaa ai, au e doange naa hogi goe i de masavaa o de hagaduasala e dae mai ai gi henua i lalo alodahi, e hagatale ai dangada e nnoho i henua i lalo.

Isaiah 51:8

Go hiidinga de lengisi e gai naa gilaadeu bei dahi malo, gai de ilo e gai naa gilaadeu bei malo e hai laa i huluhulu o denga manu. Aagai dogu heohi e dee ngado mai donu, gai dagu hagaola e dagodo i denga atangada alodahi.”

Isaiah 51:6

Goodou kalo age diiloo lo te langi, ma de tilo honga henua i lalo; de langi e lilo naa bei de useahi, gai henua i lalo e hano naa ga duai bei de malo, gai dangada i kilaa e maakau naa bei denga lango. Aagai dagu hagaola e dagodo naa donu huu ga hano ai, dogu heohi e dee maoha naa donu.

Psalm 139:24

Diiloo be e hanu hegau baubau i ogu daha, ma de dagi au i de haiava e deai sono hagaodi.

Romans 16:25

Gidaadeu ga tuhi de ia e maua laa i de hagammahi oodou lodo, bei dagodo o de longo danuaa aagu gu agoago ai laa dagodo o Iesu Klisdo, bei de hai gu hagaago mai ai laa gi de au, de mee nogo dee iloo laa i dahi masavaa dau looloa,

Psalm 145:13

Doo nohoanga hodooligi e dee ngado mai donu, gai doo sauaa e dagi ai e dagodo i denga atangada alodahi. [Tagi Maolunga e hai hegau i de mee abodonu i ana hagatoo donu alodahi, ma de malangilangi i mee alodahi aana ne hai.]

2 Thessalonians 2:16

Gai taadeu Dagi Maolunga go Iesu Klisdo aama de Maadua taadeu Damana e aloha laa i gidaadeu, ma de hagaaneane odaadeu lodo ga hano ai, aama de tali hagalodolodo i dono abodonu,

Daniel 9:21

de masavaa aagu e tala ai agu muna ma de dalodalo, gai Gabriel, taane aagu ne gidee laa i de midi hagaago ange i taamada, ne hagamoolau ga lele mai gi ogu daha i de masavaa o ssigidaumaha i de ahiahi.

Revelation 13:7

Gai gu gaavange ssauaa gi de manu laa gi hebagi ange ai gi dangada o de Maadua, ma de hagadee kii gilaadeu. Gai gu gaavange gi de ia ssauaa e dagi ai denga aamuli alodahi, ma denga huaadangada, ma dangada e pasa i denga hagadaagangaa muna, aama denga huaahenua alodahi.

Hebrews 13:20

De Maadua o de baba, go de ia ne hagamouli ina Iesu taadeu Dagi Maolunga, de Ia Hagaloosi Maolunga o denga ssiibi, i dodo o de hagatoo donu hagaheloongoi e deai laa se ngado mai,

Colossians 1:23

noo goodou e duudagi de daohi de gai ma de tuu gi makaga gu dee ngalungaalue, goodou gu dee llodo lagolago i doodou tali hagalodolodo, gu hagatoo donu laa i de longo danuaa oodou gu langona laa, gai gu tala ange hogi gi dangada alodahi i lalo de langi. Gai au gu hai hogi gi se dangada hai hegau niio de longo danuaa nei.

Matthew 10:27

Agu mee e tala adu gi goodou i lo te gohu, gai goodou daalaa i de maalama; agu mee ne musumusu adu gi oodou dalinga, gai goodou hagailoo ina i tua denga hale.

Revelation 10:11

Gai gilaadeu ne tala mai hogi gi de au, “Basa pelaabisi daalaa dagodo o denga huaadangada soa, ma huaahenua, ma dangada e pasa i denga hagadaagangaa muna, aama denga hodooligi.”

Daniel 4:1

Mai i daho de hodooligi go Nebuchadnezzar, ange gi denga huaadangada alodahi, ma huaahenua, ma dangada e pasa i denga hagadaagangaa muna, aama dangada e nnoho i henua i lalo alodahi: gi laumalie doodou nnoho paba!

Ezekiel 1:14

Denga mee mouli laa e kemo bei dagodo o de llaba o de uila.

Isaiah 45:17

Aagai Tagi Maolunga e hagaola naa Israel i de hagaola e deai se hagaodi; gai goodou e dee dookaa naa donu aabe e hagangadi mee ina ga hano ai e dee ngado mai.

Psalm 119:142

Doo heohi e dee ngado mai donu, gai dau hainga ni muna abodonu.

2 Samuel 23:5

E aha, e dee aanei dagodo o dogu huaabodu i daho de Maadua? Ia gu hai dahi hagatoo donu hagaheloongoi dee ngado mai madali au, ma de hai gi too donu mee alodahi iai. E aha, ia e dee hai naa gi sula dogu hagaola, ma mee alodahi oogu e lodo ai?

Isaiah 40:8

Denga helii e mmae, denga huaala e malili, aagai muna a taadeu Maadua e daakodo ga hano ai.”

Genesis 1:6

Gai de Maadua ga hagadaba, “Gi dahi moana i lo te langi gi vaaea ai denga vai i baasi i lunga ma baasi i lalo.”

Isaiah 6:2

Gai hanu seraph e tuu i ono elunga. Gilaadeu e dagiono olaadeu bakau; e dagilua e haoli ai olaadeu mada, e dagilua e haoli ai olaadeu vae, gai e dagilua olaadeu e llele ai.

1 Peter 1:25

aagai muna a Tagi Maolunga e daakodo ga hano ai.” Gai aanei muna o de longo danuaa gu agoago adu gi goodou.

Revelation 5:9

Gai gilaadeu ne daahili i dahi daahili hoou ga hagataba, “Koe e bau ange gi de kave de beebaa mulo ga oha ono mee hagamakaga, go hiidinga koe ne daa ga magau, e hagao ai dangada i oo dodo ga hagaahe mai gi de Maadua, mai i denga aamuli alodahi, ma dangada e pasa i denga hagadaagangaa muna alodahi, ma denga huaadangada aama huaahenua alodahi.

Revelation 10:7

Aagai laangi naa huu a togohidu dangada de langi e ili ai dana trumpet, gai mee a de Maadua e dee iloo laa e hagassula donu, bei dana hai gu hagaago ange ai gi ono dangada hai hegau go denga pelaabisi.”