Revelation 13:14 - De Beebaa Dabu

¹⁴ ga hagasenga ai dangada i henua i lalo, i hiidinga o denga hagailonga aana e hai i ssauaa o de manu alasala laa. Gai ia ne hai dangada gi hagaduulia dahi diinonga, gi hagadulagi ina ange gi de manu alasala ne lagohia laa i de gadilaasa, gai tee magau.

Revelation 13:14 Referans Kwoze

Revelation 19:20

Gai de manu alasala laa ne nnoa, madali dono pelaabisi hadu muna ne haia laa denga hagailonga i ono mada i mua, ga hagasenga ai dangada, gilaadeu gi gaavee de maaga o de manu alasala laa, ma de daumaha ange gi dono diinonga. Gai gilaau ngaadahi gu maga ange gi lo te ahi ula i denga sulfur e sali laa bei de vai.

Revelation 12:9

Gai de dragon laumalie laa gu tili iho gi lalo, go de labodo madagidagi e hagaingoo ange laa go de ia hagabaubau aabe go Satan, gai go de ia e hagasengalia laa dangada i henua i lalo alodahi — ia gu tili iho gi henua i lalo madali ono dangada de langi alodahi.

Revelation 13:8

Gai dangada alodahi e nnoho i henua i lalo ga daumaha ange gi de manu laa — go dangada alodahi tee sisi olaadeu ingoo i de beebaa o de mouli a Ssiibi Gauligi ne daa laa ga magau i mua de hai o henua i lalo.

Revelation 20:10

Gai de ia hagabaubau e daahangadia laa gilaadeu gu tili ange gi lo te ahi ula ma denga sulfur e ssali laa bei vai, go de mommee ne tili ange aagena de manu alasala ma de pelaabisi hadu muna laa, gai gilaadeu e hagaduasala naa i de laangi ma de boo ga hano ai e dee ngado mai.

Revelation 18:23

Gai gu deai hogi se maalama o de laama i kilaa. Gai gu dee langona hogi leo o taane ma de hine gu dai hagahai bodu. Oo dangada hagao mee ni daane dau i henua i lalo, gai huaahenua alodahi gu daahangadia i au huuhuaa mee.

Revelation 16:2

Gai tahi dangada de langi ne llingi iho mee i lo tana boolo gi henua i lalo, gai denga maanuga baubau ma de hagammae gu ssomo i dangada gu hagailonga laa i de maaga o de manu alasala laa ma de daumaha ange gi dono diinonga.

Revelation 15:2

Gai au ne gidee dahi mee be se vai masalaba bei de galaasa e ula ai de ahi, gai gilaadeu ne kii laa i de manu alasala laa, ma dono diinonga aama de nambaa o dono ingoo, e tuu i gaogao de vai laa. Gai gilaadeu e daohi denga harp a de Maadua gu gaavange laa gi gilaadeu.

Revelation 14:11

Gai de useahi o de ahi e hagaduasala ai laa gilaadeu, e buu ga hano ai e dee ngado mai. Gai e deai donu se hagammabu o dangada e daumaha ange laa gi de manu alasala laa ma dono diinonga, aama gilaadeu alodahi gu gaavee de maaga o dono ingoo, i de laangi ma de boo.”

Revelation 14:9

Gai togodolu dangada de langi ne daudali ange laa i gilaadeu, ne oo ga hagadaba, “Gilaadeu e daumaha ange gi de manu alasala laa ma dono diinonga, aama de hagailonga honga olaadeu lae aabe go honga olaadeu lima madau i de maaga o de manu alasala laa,

Revelation 13:15

Gai gu gaavange ssauaa gi de lua manu alasala laa gi haia ai gi manamanava tiinonga laa, gai tiinonga laa gu maua i de basa, ma de daa gi maakau dangada e dee daumaha ange gi tiinonga o de manu laa.

2 Thessalonians 2:4

Gai ia e hai baasi ange ma de hagamaolunga i mee alodahi e hagaingoo ange bolo se maadua, aabe go mee e daumaha ange laa dangada aagena. Ia e noho naa hogi i de temple o de Maadua ma de hagadaba bolo ia go de Maadua.

Daniel 11:36

“Gai de hodooligi laa e hai naa donu huu ono mee e lodo ai. Ia e hagaamua naa donu huu ia, ma de tala bolo ia e maolunga ange i denga maadua alodahi, ma de tala denga mee hagalele mouli e hai baasi ange ai gi de Maadua o denga maadua. Gai ia e sula naa donu ga dae ai gi de odi ange de masavaa o de lili ⌊o de Maadua⌋, go hiidinga mee gu hagamodu laa e hagassula naa donu.

Ezekiel 16:17

Koe ne kave hogi agu hadu hagamogomogo danuaa ne gaavadu gi de goe, go hadu hagamogomogo ne hai i agu goolo ma selevaa, ga hai ai hanu diinonga bei hoolinga o taane, gai koe ga dagodo haisala madali gilaadeu.

Ezekiel 14:9

Gai noo de pelaabisi gu hagasengalia gi basa pelaabisi, gai go au donu, Tagi Maolunga ne hagasengalia de pelaabisi laa, gai au e hagaabo naa dogu lima e hai baasi ange ai gi de ia, ga daa ia gi magau, e aau gee ai ia mai i daho ogu dangada, go de gau Israel.

Isaiah 44:20

Ia gu gai donu denga lehu, gai ono lodo gu hagasenga ia; ia gu dee maua i de hagaola ia, aabe hagadaba, “E aha, e dee se mee hhadu aagu e poo nei i dogu lima madau?”

De Beebaa go Job 12:16

De mmahi ma de heiangi abodonu i ono daha; niiana tangada gu daahangadia aama gilaadeu e daahanga ina dangada.

2 Kings 22:20

Deelaa ai, au e dugu adu naa goe gi magau bei dagodo oo dubuna madagidagi, ga danu i de masavaa o de nnoho paba. Koe e dee gidee naa denga mee hai ngadaa aagu e hai gi loomai gi de mommee nei.’ ” Gai denga daane laa ne aahe ga tala ange muna laa gi de hodooligi.

2 Kings 20:7

Isaiah ga hai ange, “Haia hanu fig ga hulu ange gi dono hagahoa, gi ieiangi ai ia.”

Ezekiel 8:10

Gai au ne ulu ga tilo, gai au ne gidee denga hagadaagangaa manu e tolo laa e maaga ange gi de baasi o de hale, ma denga manu dolodolo hakino gee, aama denga diinonga alodahi o de gau Israel.

Exodus 7:11

Gai Pharaoh ga hagahi ono daane heiangi ma de gau hai huuhuaa mee; gai de gau hai huuhuaa mee o Egypt ga hai hogi olaadeu dogo gu ni labodo.

Revelation 2:10

Aude madagu i mee oou gu dai hagaduasala ina ai. Tilo, de ia hagabaubau laa gu dai hai naa gi dilia ange hanu goodou gi lo te hale pono e hagatale ai goodou, gai goodou e vaivai haia naa i e madaangahulu laangi. Gai goodou tuu gi makaga ga dae ai gi doodou maakau, gai au ga gaavadu gi de goe de hau o de mouli.

Revelation 3:10

Koe ne daohi agu muna i doo hagaduu ngae ga golomagi oo lodo, deelaa ai, au e doange naa hogi goe i de masavaa o de hagaduasala e dae mai ai gi henua i lalo alodahi, e hagatale ai dangada e nnoho i henua i lalo.

Revelation 13:1

Gai au ne gidee dahi manu alasala e hanage i lausedi, gai e madaangahulu ono hanga ma e hidu biho, gai denga hanga e madaangahulu laa iai dagidahi hau, gai honga ono biho iai denga ingoo e hagangadi mee ai de Maadua.

Revelation 16:13

Gai au ne gidee e dolu hagasaalunga baubau bei hoolinga o denga kailu, e ssao mai i lo te ngudu o de dragon, ma lo te ngudu o de manu alasala laa, aama lo te ngudu o de pelaabisi hadu muna laa.

2 Chronicles 18:21

Ia ne hai ange, ‘Au e hano naa ga hai gi se hagasaalunga hadu muna i lodo ngudu o ono pelaabisi alodahi.’ Gai Tagi Maolunga ne hai ange, ‘Koe e maua naa donu i de usuusu ange ia, hannoo haia gi bei au muna.’