Revelation 11:17 - De Beebaa Dabu

¹⁷ ga hagataba, “Gimaadeu e hagaahe adu de abodonu gi de goe, Tagi Maolunga de Maadua Mmahi Mmao, go de ia e mouli iainei gai gu mouli mai donu madagidagi, go hiidinga koe gu hagahai hegau oo mmahi ma gu daamada ai de dagi.

Revelation 11:17 Referans Kwoze

Revelation 1:8

E hagadaba Tagi Maolunga de Maadua, “Go au de Alpha ma de Omega, go de ia e mouli iainei gai gu mouli mai huu madagidagi, gai e humai naa hogi — go de Ia Mmahi Mmao laa.”

Revelation 16:5

Gai au ne langona tangada de langi e diiloo ange laa denga vai, e hagadaba, “De Ia Dabu Mmao laa, e heohi donu au hagamodu muna, koe e noho iainei gai ne noho madagidagi.

Revelation 19:6

Gai au ne langona dahi mee bei de hevaalogi o dahi hagabuulingaa dangada soa, ma de haganngolo o denga vai lagolago aama de babaa o denga hatuli nnui, e hagataba, “Hallelujah! Tagi Maolunga taadeu Maadua de Ia Mmahi Mmao laa gu hodooligi.

Revelation 1:4

Mai i daho John. Ange gi denga nohoanga dabu e hidu i Asia: De abodonu ma de nnoho paba gi dagodo i oodou daha, mai i daho de ia e noho laa iainei, gai gu noho mai huu madagidagi, gai gu dai humai naa hogi, ma mai i daho denga hagasaalunga e hidu i mada i mua o dono nohoanga hodooligi,

Revelation 19:11

Gai au ne gidee de langi gu mahuge, gai tilo, dahi hoosa tea gu sao mai. Gai de ia e gage i ono elunga e hagaingoo ange go de Mee Abodonu ma de Heohi. Gai ia e hagamodu muna ma de hebagi i de heohi.

Revelation 16:7

Gai au ne langona de mommee o ssigidaumaha ne basa ga hai ange, “Uaa, Tagi Maolunga de Maadua Mmahi Mmao laa, au hagamodu muna ni muna abodonu gai e heohi!”

Psalm 21:13

Tagi Maolunga, gi laumalie doo hagaamua i hiidinga o oo mmahi; gimaadeu e daahili ma de tuhi oo mahi.

Revelation 16:14

Aagai denga hagasaalunga baubau laa e hai denga sauaa, gai gilaadeu ne hulo gi daho denga hodooligi alodahi o henua i lalo, ga hagabuni mai gilaadeu e hagadabena ange gi de hebagi i de laangi maolunga o de Maadua Mmahi Mmao laa.

Revelation 15:3

Gai gilaadeu ne daahili i taahili a Moses, tangada hai hegau o de Maadua, ma taahili a Ssiibi Gauligi, ga hagataba, “Tagi Maolunga de Maadua Mmahi Mmao laa, ga dae laa de hagamaatagu ma de hagalele mouli au hegau! Au hegau e heohi gai ni mee abodonu, de Hodooligi o denga huaahenua.

Revelation 11:15

Gai togohidu dangada de langi ne ili dana trumpet, gai gu langona adu hanu leo i de langi e hagataba, “De nohoanga hodooligi o henua i lalo gu gaavange gi taadeu Dagi Maolunga ma dana Klisdo, gai ia e hodooligi ai naa ga hano ai e dee ngado mai.”

1 Timothy 1:12

Au e hagaahe ange de abodonu gi Klisdo Iesu taadeu Dagi Maolunga, go de ia ne hagammahi ina ogu lodo, ia ne hagabinga bolo au se daane e hai hegau i de mee abodonu, ga hili au gi haia ana hegau.

Luke 10:21

De masavaa laa gai Iesu ne malangilangi mmao i daho de Hagasaalunga Dabu, ga hagadaba, “Au e tuhi goe, Tamana, Tagi Maolunga o de langi ma henua i lalo, go hiidinga koe ne hagammuni mee nei i gilaadeu e heiangi ma de iloo mee, gai gu hagaago ange gi denga gauligi vaaligiligi. Uaa, Tamana, aanei donu oo lodo.

Matthew 11:25

Gai Iesu ne hagadaba i de masavaa laa, “Au e tuhi goe, Tamana, Tagi Maolunga o de langi ma henua i lalo, go hiidinga koe gu hagammuni mee nei i gilaadeu e heiangi ma de iloo mee, gai gu hagaago ange gi denga gauligi vaaligiligi.

Psalm 57:11

De Maadua, doo hagaamua e maolunga ange i de langi, gai doo mahamaha gi dagodo i henua i lalo alodahi!

Genesis 17:1

Gai ga massiva ma siva huu ngadau o Abram, gai Tagi Maolunga ga hakide ange gi de ia, ga hai ange, “Go au go de Maadua Mmahi Mmao laa. Koe gi hai hegau i de mee heohi i mada luoogu mada.

2 Corinthians 9:15

Gai de abodonu ange gi de Maadua i dana ngadi gaavange e dee maua laa e gidaadeu i de tala ono dagodo!

Daniel 6:10

Gai ga iloo huu e Daniel bolo gu hagasauaa de hainga laa, gai ia ga hano gi teege i lunga o dono hale, gi de mommee iai denga abaaba vaaligi e maahuge laa ma e huuhuli ange gi Jerusalem. Gai ia ne duuduli i kilaa ga dalodalo i e dolu hanonga i de laangi, gai ia ga hagaahe ange de abodonu i mada luu mada o de Maadua, bei dana dahulinga e hai i de laa tubua.

Isaiah 52:10

Tagi Maolunga e hagaabo naa dono lima dabu, i madamada o denga huaahenua alodahi, gai henua i lalo alodahi e gidee naa de hagaola a taadeu Maadua.

2 Corinthians 2:14

Aagai gi hagaahea ange de abodonu gi de Maadua e dagina laa gidaadeu i masavaa alodahi i lodo o Klisdo, bei dagodo o dangada gu kii laa, gai gidaadeu ga kave saele ai de namu kala o taadeu iloo ia i mommee alodahi.

John 11:41

Gai hanu ga aau de hadu laa. Gai Iesu ga galo age gi de langi ga hai ange, “Tamana, au e hagaahe adu de abodonu gi de goe, go hiidinga koe e langona donu agu muna.

Daniel 2:23

De Maadua o ogu dubuna, au e hagaahe adu de abodonu ma de tuhi goe: koe gu gaamai gi de au de heiangi ma de mmahi; koe gu hagaago mai gi de au mee amaadeu gu dangidangi adu ai gi de goe, koe gu hagaago mai gi gimaadeu de mee a de hodooligi e lodo gi iloo.”

Revelation 18:8

Deelaa ai, denga mee hagamaakau e loomai naa gi de ia i e dahi laangi. Ia e duu ange naa gi de magau, ma de hinangalosaa, aama de onge. Gai ia e dudu naa ga vela i de ahi, go hiidinga Tagi Maolunga de Maadua e hagamodu ina laa ono muna e mmahi mmao.”