Au gu gidee de duasala o ogu dangada i Egypt, au gu langona delaadeu tangi, gai au gu hano iho e hagaola gilaadeu. Humai, gai au ga hai goe gi ahe gi Egypt!’
Gai koe hannoo hagabuni ina denga dagi o Israel, hai ange gi gilaadeu, ‘Iahweh, de Maadua o oodou dubuna madagidagi, go de Maadua o Abraham, ma Isaac, aama Jacob, ne hakide mai gi de au, ga hai mai: Au gu hano iho ma gu gidee mee alodahi gu hai adu gi goodou i Egypt.
Gai ga gidee huu e de gau Israel de mmahi o Tagi Maolunga ne hebagi ange ai gi de gau Egypt, gai gilaadeu gu maatagu i Tagi Maolunga aama de hagadonusia Tagi Maolunga ma dono dangada hai hegau go Moses.
De laangi laa gai au ne hagatoo donu ange gi gilaadeu bolo au e hagassao mai naa gilaadeu i de henua go Egypt, ga kave gilaadeu gi dahi henua aagu gu hili e gaavange gi gilaadeu, se henua iai vai uu ma hooni lagolago, gai se henua e mahamaha ange i denga henua alodahi.
Gai au e hagaduasala naa de huaahenua ne hagahai hegau ina gilaadeu, aagai dua naa huu mee nei, gai gilaadeu gu ssao ga hulo gee mai i de henua laa ga aahe mai ga daumaha mai gi de au i de mommee nei.’