Micah 7:10 - De Beebaa Dabu

¹⁰ Dogu hagadaumee e dogaa naa i dana gidee de hai mee nei, tangada ne hai mai laa gi de au, “I hee iai Tagi Maolunga doo Maadua?” Au e gidee naa de hagadee kii ina o dogu hagadaumee; iainei donu gai ia e dagadagahi au gi lo te gelegele bei bela pigi i honga denga haiava.

Micah 7:10 Referans Kwoze

Zechariah 10:5

Gilaadeu alodahi e bei denga daane dau o de hebagi, e dagadagahia laa de hagadaumee gi lodo bela i honga haiava. Gilaadeu e kii naa i de hebagi, go hiidinga Tagi Maolunga e noho madali gilaadeu, gilaadeu e hai naa ga dookaa dangada e kage i honga hoosa.

Psalm 42:10

Au gu kona mmao dogu mmae i de hagammae manava a ogu hagadaumee au, ma delaadeu hai mai gi de au i taiao ga boo ai, “I hee iai doo Maadua?”

Revelation 18:20

De langi, ma goodou dangada o de Maadua, ma de gau tala, aama denga pelaabisi, goodou malangilangi i dagodo o de aduhale laa! Go hiidinga de Maadua gu hagaduasala de aduhale laa i dana hagaduasala goodou!

Joel 2:17

De gau haimeedabu e hai hegau laa i mada luu mada o Tagi Maolunga gi tangi i magavaa o de velanda o de temple ma de mommee o ssigidaumaha. Gilaadeu gi hagataba, “Tagi Maolunga, hagaola ina oo dangada. Koe gi dee haia gi hagangadi mee ina dangada o doo boolonga, aabe gi daalaa hakadanga i daho denga huaahenua. Gai gu aha gu hagataba ai denga huaahenua, ‘I hee iai delaadeu Maadua?’ ”

Psalm 35:26

Hagadookaa ina ma de hai gi ssenga ange gilaadeu alodahi e malangilangi i dogu hai ngadaa! Haia gi dookaa ma de ssenga ange gilaadeu e hagamaolunga i de au!

Psalm 18:42

Au ne hagailiili gilaadeu gi lligi bei dagodo o de mama e ilihia laa i de madangi; au ne llingi gilaadeu gi daha bei dagodo o de bela i honga denga haiava.

2 Samuel 22:43

Au ne hagailiili gilaadeu ga bei mama o de gelegele; au ne mmili ma de dagadagahi gilaadeu gi lalo bei gelegele i honga denga haiava.

Micah 4:11

Aagai iainei denga huaahenua soa gu hagabuni e hebagi adu gi de goe. Gilaadeu e hagataba, “Gidaadeu ga hai gi dee gilimalali de aduhale, gidaadeu ga tuhi gidaadeu i de maoha o Zion!”

Jeremiah 51:51

⌊Goodou e hagataba,⌋ “Gimaadeu gu hagangadi mee ina, go hiidinga gimaadeu gu langona hanu muna hagadookaa; gimaadeu gu dee hagadubulia, go hiidinga de gau henua gee gu ulu gi lodo mommee dabu i de hale o Tagi Maolunga.”

Psalm 79:10

Gu aha gu hagataba ai denga huaahenua, “I hee iai delaadeu Maadua?” Haia gi gidee e gimaadeu dau sui ange hegau a denga huaahenua i delaadeu daa oo dangada hai hegau!

Matthew 27:43

Ia e gai ange gi de Maadua. De Maadua gi hagaola ina ia iainei, noo ia e lodo, i hiidinga ia gu hagadaba, ‘Go au Tama Daane a de Maadua.’ ”

Malachi 4:3

Gai goodou e dagadagahi naa gi lalo de gau baubau. Gilaadeu e bei naa denga lehu i lalo oodou vae, i de laangi aagu e hai ai agu hegau, go Tagi o denga hagabuulinga hebagi e hagadaba.

Malachi 1:5

Goodou e gidee naa donu de hai mee nei, gai goodou e hagataba naa, ‘Tagi Maolunga e maolunga hogi i denga henua i luu baasi o Israel.’ ”

Obadiah 1:10

Go hiidinga dau vaivai hai doo daina go Jacob, koe e dogaa naa donu, koe e oha ga maoha ga hano ai.

Daniel 3:15

Noo goodou gu paba ange e duuduli e daumaha ange gi dagu diinonga gu hagaduu laa, i de masavaa oodou e langona ai de ili o de hanga manu, ma de flute, ma de lyre, ma mee hagadangidangi iai daula, ma de harp, ma de bagpipe, aama denga hagadaagangaa mee hagadangidangi alodahi, gai gu danuaa. Aagai noo goodou e dee daumaha ange gi tiinonga laa, gai goodou e tili ange donu gi lo te ahi ula mmahi i de masavaa moolau. Gai goai naa donu de maadua e maua i de hagaola goodou mai i dogu sauaa?”

Jeremiah 51:24

Au e sui ange naa hegau a Babylon ma dangada alodahi e nnoho i kilaa i oodou mada i mua, i hiidinga hegau baubau alodahi alaadeu ne hai i Zion, go Tagi Maolunga e hagadaba.

Psalm 115:2

Gu aha gu hagataba ai denga huaahenua, “I hee iai delaadeu Maadua?”

Psalm 109:29

Gai gi deai se hagadubu o dangada e hagabaubau ina au, gai gilaadeu gi hagauda ina togaa bei de malo laa daha.

Psalm 58:10

Tangada heohi e malangilangi naa i dana gide de hagaduasala o de gau baubau; gai ia e hhui naa luoono vae i olaadeu dodo.

Psalm 42:3

Ogu loimada go agu mee e gai i de laangi aama de boo, gai dangada e ssili mai gi de au i taiao ga boo ai, “I hee iai doo Maadua?”

Ezekiel 7:18

Gai gilaadeu e kahu naa i denga malo daladala ma de hoohonu i de maatagu; gilaadeu gu dookaa, gai olaadeu biho gu dahi ma gu malali.

Isaiah 41:25

Au gu hagangalue naa lodo o dahi mai i ngaiho, gi humai; gai ia e humai i de mommee e sobo age ai de laa, ga hagahi i dogu ingoo. Ia e dagadagahi naa denga hodooligi bei dagodo o denga bela, ma tangada hai gumedi hadu e dagadagahia laa denga gelegele pigi.

Obadiah 1:12

Gai e dee heohi dau hagangadi mee doo daina i de masavaa oona ne duasala ai, aabe go doo malangilangi i dangada o Judah i de masavaa olaadeu ne oohaa ina ai, aama doo basa hagamaolunga i de laangi olaadeu ne hai ngadaa ai.

Micah 7:8

Dogu hagadaumee, koe gi dee malangilangi i ogu dagodo! Ga baguu naa donu au, aagai au e ahe ange naa donu ga hidi age. Gai ga noho naa donu au i lo te gohu, aagai go Tagi Maolunga dogu hagamaalama.

Joshua 7:9

Go hiidinga de gau Canaan ma dangada e nnoho i de henua e langona naa e gilaadeu mee gu hai nei, gai gilaadeu e loomai naa ga duuli gidaadeu, ga daa gidaadeu gu deai gidaadeu e doe i honga de henua. Gai aahee ai naa dagodo o doo ingoo maolunga naa?”

Psalm 92:12

Tangada heohi e bei de nui somo danuaa, gai ia e somo bei dahi cedar o Lebanon.

Isaiah 26:11

Tagi Maolunga, doo lima gu hagaabo aagai gilaadeu e dee gidee. Haia gi gidee e gilaadeu doo lodo mmahi i hiidinga o oo dangada, ma de hai gilaadeu gi dookaa; haia de ahi gu baba ange laa gi oo hagadaumee gi duungia gilaadeu.

Jeremiah 49:15

“Au e hai naa goe gi damaa mee ange i denga huaahenua, ma de hagangadi mee ina i daho dangada.

Zephaniah 3:15

Tagi Maolunga gu kave gee doo hagaduasala, ia gu hai gi aahe dua oo hagadaumee. Tagi Maolunga, de Hodooligi o Israel, e noho madali goe; gai koe e dee madagu ange naa donu i dahi mee hai ngadaa.