Matthew 10:5 - De Beebaa Dabu

⁵ Iesu ne hai gi hulo tinoangahulu ma dogolua nei, ga hai ange gi gilaadeu, “Goodou e dee hulo gi denga Gentile, aabe go aduhale o de gau Samaria.

Matthew 10:5 Referans Kwoze

John 4:9

Gai de hine Samaria laa ga hai ange gi de ia, “Koe se daane Ssuu, gai au se hine Samaria. Gai gu aha goe gu hai mai ai naa gi gaavadu hanu vai e unu goe?” (De gau Ssuu e dee hagabuni ange gi de gau Samaria.)

1 Thessalonians 2:16

De gau nei ne hagammahi donu ga buibui gimaadeu gi dee agoagona ange denga Gentile, gi dee hagamouli ai gilaadeu. Gai gilaadeu e hai gi kii ange de hoohonu olaadeu haisala i delaadeu hai mee nei. Gai de bole ⌊o de Maadua⌋ gu duu ange donu gi gilaadeu iainei!

Luke 17:16

Gai ia ne ino gi lalo i gaogao luu vae o Iesu ga hagaahe ange de abodonu gi de ia. Gai taane nei se dangada Samaria.

Acts 10:45

Aagai de gau Ssuu ne loomai laa madali Peter gu llele mouli i de hano iho hogi o de ngadi gaavange go de Hagasaalunga Dabu gi honga o denga Gentile.

Luke 9:2

gai ia ne hai gilaadeu gi hulo gi agoago i dagodo o de nohoanga hodooligi o de Maadua aama de hagaieiangi denga magi.

Acts 1:8

Aagai goodou e kave naa ssauaa i dua de hano iho o de Hagasaalunga Dabu gi oodou elunga; gai goodou e hai naa ga ni dangada e daalaa hagadonu ogu dagodo i Jerusalem, ma Judea alodahi, aama Samaria, ga dae ai loo gi de bido laa o henua i lalo.”

John 20:21

Gai Iesu ga hai ange hogi gi gilaadeu, “De baba gi dagodo i oodou daha. Tamana ne hai au gi humai, gai au e hai naa hogi goodou gi hulo.”

John 7:35

Gai de gau Ssuu ga hagadau ssili i olaadeu magavaa ga hagataba, “Go hee oona e hano aagena gi dee gidee ai e gidaadeu ia? Ia ga hano nei gi daho de gau Ssuu e nnoho saele laa i magavaa o de gau Greek e agoago ai de gau Greek?

John 4:5

Gai ia ne hano ga noho i dahi aduhale o Samaria, e hagaingoo ange laa go Sychar, se mommee e baa ange gi de alahenua a Jacob ne gaavange gi dana dama go Joseph.

Luke 10:33

Aagai e dahi daane Samaria ne humai hogi laa kilaa, gai de masavaa huu aana ne gidee ai taane laa, gai ia gu lodo aloha i de ia.

Matthew 4:15

“De henua o Zebulun ma de henua o Naphtali, i honga de haiava i gaogao tai, i de baasi dai o Jordan, i Galilee o denga Gentile —

Acts 8:1

Gai a Saul ne buni ange donu gi de magau o Stephen. Gai go de laangi laa ne daamada ai de vaivai haia o de nohoanga dabu i Jerusalem. Gai dangada alodahi gu mavaevae saele gi denga mommee i Judea ma Samaria, go de gau tala donu huu e doe.

John 8:48

Gai de gau Ssuu ga hai ange gi de ia, “E heohi donu demaadeu hai adu bolo koe se dangada Samaria, gai de hagasaalunga baubau e noho i oo daha.”

John 4:20

Omaadeu damana ne daumaha i honga de mounga nei, gai goodou de gau Ssuu e hagataba bolo de mommee donu huu e heohi taadeu daumaha ai go Jerusalem.”

Luke 10:1

Dua mee nei, gai Tagi Maolunga ne hili e dinohidu ma dogolua dangada ga hai gi hulo dagi dogolua i ono mada i mua, gi denga aduhale ma mommee alodahi oona gu dai hano aagena.

Matthew 22:3

Gai ia ne hai gi hulo ono dangada hai hegau gi hagahia dangada gu ssala ange laa gi taonga, aagai gilaadeu tee llodo e loomai.

Mark 6:7

Aagai ia ne hagahi tinoangahulu ma dogolua ga hai gilaadeu gi hulo dagi dogolua, ma de gaavange gi gilaadeu ssauaa e hai ai gi hulo gee denga hagasaalunga baubau.

Luke 9:1

Iesu ne hagahi ga hagabuni mai ana dangada agoago ga gaavange gi gilaadeu de mmahi ma ssauaa e hai ai gi hulo gee denga hagasaalunga baubau alodahi, ma de hagaieiangi ai denga magi,

John 17:18

Au e hai gilaadeu gi hulo gi henua i lalo, bei dau hai ne hai ai au gi humai gi henua i lalo.