Luke 20:10 - De Beebaa Dabu

¹⁰ Aagai de masavaa huu o de hagihagi, gai ia ga hai dahi ono dangada hai hegau gi hano gi gaamai dana diba i hua o de veelenga laa. Aagai de gau laa ga daa tangada hai hegau laa ga hai ia gi ngadi ahe, teai donu mee ne gaavange gi de ia.

Luke 20:10 Referans Kwoze

Nehemiah 9:26

Aagai gilaadeu tee hagallongo i au muna ma de hai baasi adu gi de goe. Gilaadeu ne daahuli gee i au hainga ma de daa ga maakau oo pelaabisi, go gilaadeu ne agoagona gilaadeu gi aahe mai ai gilaadeu gi de goe. Gai ne kona mmao delaadeu hagangadi mee goe.

Romans 7:4

Denga daina, goodou gu maakau ange hogi gi de hainga i doodou dau i de angaanga o Klisdo, gi dau ange ai goodou gi dahi dangada gee, go de ia ne mouli age laa mai i de magau, gai gidaadeu ga hagadili ai denga hua danuaa a de Maadua.

John 15:16

E dee go goodou ne hilia nei au, aagai go au ne hilia goodou ga hagadabu, ga hai goodou gi hulo gi haia gi lagolago oodou hua, gai oodou hua gi daakodo ga hano ai. Gai be se aha naa huu oodou e dangidangi ange ai gi Tamana i dogu ingoo, gai ia e gaavadu donu gi goodou.

Luke 13:34

Jerusalem, Jerusalem, de aduhale ne daia ga maakau denga pelaabisi ma de maga i hadu gilaadeu ne hai gi loomai gi de aduhale! Gu dee modu dogu lodo e hagabudu au dama, bei de hai a de gaagoo hahine e hagabudu ai laa ana dama i lalo luoono bakau, aagai koe e dee lodo!

Jeremiah 35:15

Au gu dee modu hogi de hai ogu dangada hai hegau, go denga pelaabisi gi loadu gi oodou daha, gi hai adu, ‘Dahi ma dahi gi hano gee mai i ana hegau baubau, ma gi suuia ana dahulinga; gai goodou gi dee daudali ange i denga diinonga, ma de daumaha ange gi gilaadeu, gi maua ai e goodou i de nnoho i de henua, aagu gu gaavadu gi goodou ma oodou dubuna.’ Aagai goodou tee aanga mai aabe ne hagallongo mai gi de au.

Jeremiah 20:2

gai ia ne hai hanu gi hagailiilihia de pelaabisi go Jeremiah ma gi hagamakaga ina luoono lima ma luoono vae i denga baabaa, i gaogao de haitoga e hagaingoo ange laa go de haitoga e mua gi lunga o Benjamin, i de hale o Tagi Maolunga.

Jeremiah 5:24

Gai gilaadeu e dee hagataba i olaadeu lodo, ‘Gidaadeu ga maatagu i Tagi Maolunga taadeu Maadua, go de ia ne gaamai de langi i de hagaodi ma taamada o de ngadau i de masavaa gu dugu, gai go de ia ne gaamai gi gidaadeu denga uvigi o de hagihagi.’

Jeremiah 2:30

Teai donu haigamaiana dagu haele oodou dama, gilaadeu tee aanga mai gi agu muna hagaheohi. Oodou gadilaasa ne daa ga maakau oodou pelaabisi bei dagodo o dahi laiono hiigai.

Psalm 1:3

Tangada bee nei e bei de manu somo e doo laa i gaogao denga saalingaa vai; ono hua e hhaa mai i dono masavaa donu, gai ono lau e dee mmae donu. Hegau alodahi aana e hai e ssula danuaa.

Nehemiah 9:30

Gai koe ne golomagi oo lodo i gilaadeu i hanu ngadau lagolago, aama de hagasee gilaadeu i doo Hagasaalunga i daho oo pelaabisi. Aagai gilaadeu tee anga adu gi au muna. Deelaa ai, koe ne dugu ange dangada o denga henua ange laa gi hagadee kii ina gilaadeu.

2 Chronicles 16:10

Gai Asa ne lili i taane e gidee mee e loomai i hiidinga o muna nei, gai ia ga hhao ia gi lo te hale pono. Gai Asa ne vaivai hai hogi hanu dangada i de masavaa laa.

2 Kings 17:13

Gai Tagi Maolunga ne hagakana ange hogi Israel ma Judah i daho denga pelaabisi ma gilaadeu e daalaa mee e loomai, ga hai ange, “Goodou daahuli gee i oodou hegau baubau ma gi daohia agu muna gu tala adu aama agu mee gu hagasauaa, bei dagodo o denga hainga aagu gu tala ange gi oodou dubuna madagidagi gilaadeu gi daudali ai, i daho ogu dangada hai hegau go denga pelaabisi.”

1 Kings 22:24

Gai Zedekiah, tama daane a Kenaanah, ne humai ga hagaili de galaahuu o Micaiah, ga ssili ange, “Go hee ne hano aagena de Hagasaalunga o Tagi Maolunga, ne sao mai laa i ogu daha ga basa adu gi de goe?”

Luke 20:9

Iesu ne tala ange hogi gi dangada dahi mee hagasengasenga ga hai ange, “Dahi daane ne doo dahi veelengaa grape ga dugu ange gi hanu dangada gi diiloo ange, gai ia ga hano gi dahi henua gee i dahi masavaa daulooloa.

Luke 20:11

Gai taane laa ga hai ange hogi gi hano dahi ono dangada hai hegau; gai gilaadeu ga hagailiili ma de vaivai hai ia ga hai ia gi ngadi hano, teai donu mee ne gaavange gi de ia.

1 Chronicles 19:4

Gai Hanun ne kave denga daane hai hegau o David ga dahi olaadeu gumigumi, aama de duuduu bido i lalo olaadeu malo gu ssula mai olaadeu dae, ga hai gilaadeu gi hulo.