Luke 17:2 - De Beebaa Dabu

² E danuaa donu i de nnoa ange dahi hadu mmili laumalie gi dono ua ga tili ai ia gi lo te moana gelo, i dana hai ga haisala dahi dangada maolalo bee nei.

Luke 17:2 Referans Kwoze

Mark 9:42

“Gai be goai e haia ga haisala dahi dangada maolalo bee nei gu hagadonusia au, gai e danuaa ange donu de nnoa ange dahi hadu mmili laumalie gi dono ua, ga tili ai ia gi lo te moana gelo.

Matthew 18:14

E bei ai hogi lodo o doodou Damana i de langi laa, ia e dee lodo donu gi magau dahi dangada maolalo bee nei.

Matthew 18:10

“Goodou dagidiiloo gi dee hagangadi mee ina e goodou dahi dangada maolalo bee nei. Go hiidinga au e hai adu gi goodou, bolo olaadeu dangada de langi e gidee luu mada o dogu Damana i de langi i masavaa alodahi.

1 Corinthians 9:22

Au ne hai gi se dangada baageaa i hiidinga olaadeu e baageaa, gi maua ai e au hanu gilaadeu e baageaa. Au ne hai mee nei alodahi i hiidinga o dangada alodahi, gi maua ai e au i de hagamouli hanu.

Matthew 26:24

Tama a Tangada e hano naa donu bei de hai gu sisi ai ono dagodo, aagai e vakaa naa tangada e gaavange Tama a Tangada! E danuaa ange noo ia tee haanau.”

1 Corinthians 9:15

Aagai au tee hagahai hegau dogu heohi i mee nei. Gai au tee se sisi adu hogi gai goodou ga gaamai ai dahi mee gi de au. Gai e danuaa ange donu dogu magau i dagu dugu ange dahi dangada gi gaavee gee dogu heohi e tuhi ai agu hegau.

John 21:15

Gai ga lava huu olaadeu gaimee, gai Iesu ga ssili ange gi Simon Peter, “Simon tama daane a John, koe e kii ange doo aloha i de au i de gau ange nei?” Peter ne hai ange, “Uaa, Tagi Maolunga; koe e iloo bolo au e aloha i de goe.” Iesu ne hai ange gi de ia, “Diiloo haangai ina ange agu ssiibi gauligi.”

Zechariah 13:7

“De gadilaasa, alahage, hai baasi ange gi dogu dangada hagaloosi, gai hai baasi ange gi tangada e baa mai gi de au! go Tagi o denga hagabuulinga hebagi e hagadaba. Daia gi magau tangada hagaloosi, gi mavaevae saele ai denga ssiibi, gai au e hagaabo naa dogu lima e hai baasi ange ai gi denga ssiibi gauligi.

Isaiah 40:11

Ia e tilo ange naa dana hagabuulingaa ssiibi bei tangada hagaloosi ssiibi, ia e hagabudu naa ana ssiibi gauligi i luoono lima, ma de saabai gilaadeu i ono hadahada; gai ia e dagi maalie naa denga ssiibi e hanu laa alaadeu dama.

Matthew 17:27

Gai go hiidinga gidaau e dee llodo e hagadaemaha gilaadeu, hannoo magaa dau uga gi lo te vai. Gai koe ga kave de mamu hugadoo aau e hhudi i mua ga hhanga dono ngudu, gai koe e gidee naa dahi stater i lo tono ngudu. Gai koe ga kave ga gaavange gi gilaadeu e hagao ai odaau taagisese.”