Judges 6:10 - De Beebaa Dabu

¹⁰ Au ne hai adu gi goodou, bolo go au go Tagi Maolunga doodou Maadua; goodou gi dee daumaha ange gi denga diinonga o de gau Amor, go dangada nogo nnoho i de henua oodou gu nnoho ai naa. Aagai goodou tee hagallongo mai gi agu muna.”

Judges 6:10 Referans Kwoze

Jeremiah 10:2

E hagadaba Tagi Maolunga: “Goodou aude ago ange i dahulinga a denga huaahenua, aabe gi maatagu i denga hagailonga i lo te langi, e dee galemu donu de maatagu o denga huaahenua i mee nei.

Jeremiah 9:13

E hagadaba Tagi Maolunga: “Go hiidinga gilaadeu gu tili agu hainga ne gaavange gi gilaadeu, ma tee hagallongo mai gi de au aabe ne daudali i agu hainga.

Jeremiah 43:7

Gai gilaadeu ne hulo gi de henua go Egypt; gilaadeu tee hagallongo ange gi muna a Tagi Maolunga, gai gilaadeu ne hulo ga tae gi Tahpanhes.

Jeremiah 43:4

Gai Johanan tama daane a Kareah ma dagi o denga daane hebagi alodahi, ma dangada alodahi tee daudali i muna a Tagi Maolunga, e nnoho i de henua go Judah.

Jeremiah 42:21

Gai au gu tala adu gi goodou anailaa nei, mee alodahi aana ne gaamai au gi daalaa adu gi goodou, gai goodou e dee hagallongo ange gi Tagi Maolunga doodou Maadua.

Jeremiah 3:25

Gidaadeu ga daakodo gi lalo i lodo odaadeu hagadogaa, ga haoli gidaadeu i odaadeu hagadogaa. Gidaadeu gu haisala ange gi Tagi Maolunga taadeu Maadua, go gidaadeu alodahi ma odaadeu dubuna; mai i de masavaa odaadeu e gauligi ai ga dae mai ai gi anailaa nei. Gidaadeu tee hagallongo ange gi de leo o Tagi Maolunga taadeu Maadua.”

Jeremiah 3:13

Gai goodou gi daalaa bolo goodou gu haisala; goodou gu hai baasi ange donu gi Tagi Maolunga doodou Maadua, goodou gu dagodo haisala madali denga diinonga o de gau henua gee ma lalo denga manu ssomo alodahi, goodou tee hagallongo mai gi de au, go Tagi Maolunga e hagadaba.

Judges 2:2

gai goodou gi dee haia donu dahi hagatoo donu hagaheloongoi madali dangada o de henua nei; gai goodou gi oha ina olaadeu mommee o ssigidaumaha.’ Aagai goodou tee daudali i agu muna adu gi goodou. Gai se hegau bee hee oodou gu hai nei?

Hebrews 5:9

gai ga honu abodonu huu dono heohi, gai ia gu hai ai tagelo o de mouli e dee ngado ange gi dangada alodahi e hagallongo ange gi de ia,

Romans 10:16

Aagai e dee go de gau Israel alodahi ne daohia muna o de longo danuaa; go hiidinga Isaiah ne hagadaba, “Tagi Maolunga, goai ne hagadonusia amaadeu agoago?”

Zephaniah 3:2

Se aduhale e dee hagallongo ange gi dahi, ma tee malangilangi i de hagaheohi a dahi ia. Gai ia e dee hagadonu Tagi Maolunga, gai e dee lodo e hagabaa ange gi dono Maadua.

Proverbs 5:13

Au tee hagallongo ange gi muna a ogu dangada agoago, gai tee anga ange gi muna ne tala mai gi de au.

2 Kings 17:33

Gilaadeu ne daumaha ange gi Tagi Maolunga, aagai ne daumaha ange hogi gi olaadeu diinonga donu, bei dahulinga a denga huaahenua olaadeu ne gaavee laa aagena.

Joshua 24:15

Aagai noo e dee heohi mai i oodou daha de daumaha ange gi Tagi Maolunga, gai ailaa nei goodou hilihilia be goai oodou e daumaha ange aagena: go denga diinonga a oodou dubuna madagidagi nogo daumaha ange aagena i de baasi laa o Euphrates, aabe go diinonga o de gau Amor oodou e nnoho naa i olaadeu magavaa i delaadeu henua. Aagai au ma dogu huaabodu, gimaadeu e daumaha ange gi Tagi Maolunga.”

Judges 6:9

Gai au ne hagaola goodou mai i lalo o de gau Egypt aama gilaadeu alodahi ne vaivai haia goodou, ma de alualu gilaadeu gi hulo gee i de henua, gai ga gaavadu delaadeu henua goodou gi henua ai.

2 Kings 17:7

Gai mee nei ne hai, i hiidinga de gau Israel ne haisala ange gi Tagi Maolunga, delaadeu Maadua, go de ia ne hagassao ina mai gilaadeu i de henua go Egypt, ma mai i lalo ssauaa o Pharaoh, de hodooligi o Egypt, ma delaadeu daumaha ange gi diinonga ange laa,

Exodus 34:12

Gai goodou kana ange diiloo gi dee haia e goodou dahi hagatoo donu hagaheloongoi madali dangada e nnoho i de henua oodou gu dai hulo naa aagena, gi dee noodia ai goodou i mee nei bei dagodo o ssele.

Exodus 34:14

go hiidinga koe e dee daumaha ange donu gi dahi diinonga gee; i hiidinga Tagi Maolunga, dono ingoo laa go de Maagoda, se Maadua maagoda.

2 Kings 17:13

Gai Tagi Maolunga ne hagakana ange hogi Israel ma Judah i daho denga pelaabisi ma gilaadeu e daalaa mee e loomai, ga hai ange, “Goodou daahuli gee i oodou hegau baubau ma gi daohia agu muna gu tala adu aama agu mee gu hagasauaa, bei dagodo o denga hainga aagu gu tala ange gi oodou dubuna madagidagi gilaadeu gi daudali ai, i daho ogu dangada hai hegau go denga pelaabisi.”

Nehemiah 9:29

Koe ne hagakana ange gilaadeu, gi aahe mai ai gilaadeu gi daudali i dau hainga, aagai gilaadeu ne hagamaolunga ma tee daudali i au muna. Gilaadeu ne hagahaisala au mee gu hagasauaa, go mee o tangada e mouli ai noo ia e daudali ai. Gilaadeu ne huuhuli gee i de goe ma de makaga olaadeu lodo, gilaadeu tee hagallongo adu.

Jeremiah 17:23

Gai gilaadeu tee hagallongo mai aabe ne aanga mai gi agu muna; gilaadeu ne hagamakaga olaadeu lodo, tee llodo e hagallongo mai aabe ne daohi agu muna ange gi gilaadeu.