Jeremiah 6:20 - De Beebaa Dabu

²⁰ Ni haigamaiana aha denga frankincense mai i Sheba, aabe go laagau maanongi mai i dahi henua mmao? Au e dee malangilangi i oodou sigidaumaha dudu; gai oodou sigidaumaha e dee ni mee niiogu e malangilangi ai.”

Jeremiah 6:20 Referans Kwoze

Isaiah 1:11

E hagadaba Tagi Maolunga, “Ni aha aagu e hai i oodou sigidaumaha lagolago? Au gu duugia i oodou sigidaumaha dudu e hai i denga ssiibi daane, ma kiliisi o denga manu gu haangai ma gu pedi; au e dee malangilangi i dodo o denga kaau daane, ma ssiibi gauligi aama guudi.

Isaiah 60:6

Denga hagabuulingaa gamelo e loomai naa ga hhao honga de henua, go gamelo gauligi a Midian ma Ephah. Gai dangada alodahi mai i Sheba e loomai naa; gilaadeu ga gaamai denga goolo ma mee maanongi, ma de tala de tuhi o Tagi Maolunga.

Psalm 40:6

Koe e dee lodo i sigidaumaha ma mee ngadi gaavange, gai koe gu hhuge luoogu dalinga. Koe tee hai au gi haia ssigidaumaha dudu ma ssigidaumaha o haisala.

Isaiah 66:3

Aagai tangada e daia dahi kaau e hai ai ssigidaumaha, e bei hogi tangada e daia tangada ga magau; tangada e haia ssigidaumaha i dahi ssiibi gauligi, e bei hogi tangada e milo laa de ua o dahi gaaduu; tangada e haia ssigidaumaha i denga grain, e bei hogi tangada e sigidaumaha i dodo o de biigi, gai tangada e haia ssigidaumaha hagamaanadu o mee maanongi, e bei hogi tangada e daumaha ange gi dahi diinonga. Gilaadeu ne hilihili de hai donu huu olaadeu lodo, gilaadeu ne malangilangi i olaadeu diinonga hakino gee;

Exodus 30:23

“Gaavee hanu mee hagamanongi danuaa: e limalau shekel myrrh vaivai, ma e 250 shekel cinnamon manongi, ma e 250 shekel madila manongi,

Ezekiel 27:22

De gau hagao mee o Sheba ma Raamah ne hagao hogi oo goloa; gilaadeu ne hagao oo goloa i denga hagadaagangaa mee hagamanongi alodahi, ma denga hadu hagamogomogo, aama goolo.

Ezekiel 20:39

Gai oodou dagodo, dangada o Israel, go de Ia Aamua go Iahweh e hagadaba: Dahi ma dahi gi hano gi daumaha ange gi ono diinonga! Aagai dua naa huu mee nei, gai goodou e hagallongo mai gi de au; goodou gu dee hagangadi mee dogu ingoo dabu i oodou mee ngadi gaavange ma oodou diinonga.

Psalm 66:3

Hai ange gi de Maadua, “Au hegau e hagamaatagu mmao! Doo sauaa e laumalie mmao gai oo hagadaumee e bolebole i oo mada i mua.

1 Kings 10:10

Gai de hine laa ne gaavange gi de hodooligi go Solomon e 120 talent goolo, ma denga mee maanongi lagolago mmao, ma hadu hagamogomogo; gai teai ange donu se dangada ne gaamai hanu mee maanongi lagolago, bei mee a de hine hodooligi o Sheba ne gaamai ga gaavange gi de hodooligi go Solomon.

Proverbs 15:8

Ssigidaumaha a tangada baubau se mee hakino gee i daho Tagi Maolunga, aagai ia e malangilangi i dalodalo a dangada e heohi laa.

Proverbs 21:27

Ssigidaumaha a tangada baubau se mee hakino gee; gai e kii ange donu de hakino gee noo se mee ne hai i de maanadu baubau!

Jeremiah 14:10

E hagadaba Tagi Maolunga i dagodo o de huaadangada nei: “Gilaadeu e llodo mmao e hulo gee mai i ogu daha; gilaadeu e dee llodo donu e nnoho donu huu Deelaa ai, Tagi Maolunga e dee malangilangi donu i gilaadeu; ia e dee ngalo naa hogi olaadeu baubau gai ia e hagaduasala gilaadeu i hiidinga olaadeu haisala.”

Jeremiah 14:12

Gai ga hagahiikai naa donu gilaadeu, aagai au e dee hagallongo donu alaadeu dalodalo. Gai e dee galemu naa donu delaadeu hai denga sigidaumaha dudu ma sigidaumaha o grain, aagai au e dee malangilangi donu i mee nei. Aagai au e daa gilaadeu gi maakau i de gadilaasa, ma de onge aama de mee hagamaakau.”

Hosea 8:13

Gilaadeu e hai denga sigidaumaha mai gi de au, ma de gai kano o manu e hai ai; aagai Tagi Maolunga e dee malangilangi i gilaadeu. Gai ia e dee ngalo naa donu olaadeu baubau, ma de hagaduasala gilaadeu i hiidinga olaadeu haisala; gilaadeu e aahe naa ga hulo gi Egypt.

Hosea 9:4

Gilaadeu e dee hai ange naa sigidaumaha o uvaini gi Tagi Maolunga; gai alaadeu sigidaumaha e dee hagamalangilangi donu ia. Alaadeu sigidaumaha e bei gai a de gau hinangalosaa e gai: dangada alodahi e gaina e dee gilimalali. Gai nei ni mee ange donu huu gi gilaadeu; e dee maua donu i de kave gi lo te hale o Tagi Maolunga.

2 Samuel 15:12

De masavaa a Absalom e hai ai dana sigidaumaha, gai ia ne aalu ga gaamai Ahithophel, taane Giloh, gi humai i dono aduhale; ia go taane hagasaele o David. Gai dana hagatau e hai baasi ange ai gi de hodooligi gu kii ange de mmahi, gai gu soa hogi dangada ne daudali ange i Absalom.

Malachi 1:10

Mee naa dahi goodou gi bonodia denga abaaba o de temple, gi dee duungia ai e goodou denga ahi dee haigamaiana naa i honga dagu mommee o ssigidaumaha! Au e dee malangilangi i goodou, go Tagi o denga hagabuulinga hebagi e hagadaba, gai au e dee kave naa donu oodou sigidaumaha e gaamai.