Jeremiah 51:44 - De Beebaa Dabu

⁴⁴ Gai au e hagaduasala naa a Bel i Babylon, ga hai ia gi lueia mai mee aana gu holo. Gai denga huaahenua gu dee daga e hulo gi ono daha; de buibui o Babylon gu maoha.

Jeremiah 51:44 Referans Kwoze

Jeremiah 51:58

E hagadaba Tagi o denga hagabuulinga hebagi: “De buibui lahalaha o Babylon e oha iho naa ga dagodo i honga de gelegele, gai ono haitoga maolunga e dudu naa i de ahi; hegau kona a dangada e deai naa donu ono haigamaiana, denga huaahenua ne hagadaalea ange donu huu gi mee e dudu i de ahi.”

Jeremiah 51:34

⌊Dangada o Jerusalem e hagataba,⌋ “De hodooligi o Babylon go Nebuchadnezzar gu holo gimaadeu, ia gu hai gi ssenga ange gimaadeu, ia gu hai gimaadeu bei de ssaa gu deai mee i ono lodo. Ia gu holo gimaadeu bei dahi manu hagamaatagu, ma de hhao dono dinae i agu gai mammami, ga lava ga luei mai gimaadeu.”

Jeremiah 50:2

“Goodou daalaa gi langona e dangada i denga huaahenua, hagaduulia age dahi hagailonga ma de hagailoo ange gi dangada; goodou e dee hagammuni donu, aagai hagataba, ‘Babylon e hagadee kii naa, gai a Bel e hagadogaa naa, Merodak e madagu naa. Ono diinonga e hagadookaa ina naa, gai ono diinonga gu maatagu.’

Isaiah 2:2

Denga laangi hagaodi naa huu gai de mounga o de hale o Tagi Maolunga e hai naa ga maolunga ange i denga mounga hugadoo, ma de maolunga ange i denga duuduu. Gai denga huaahenua alodahi e daga mai naa gi kilaa,

Daniel 5:31

gai Darius, taane Media, ne kave de nohoanga hodooligi laa, gai ia gu madaono ma lua ono ngadau.

Daniel 5:26

Gai deenei de hagadoonunga o muna nei: Mene: de Maadua gu dau ma gu hagaodi laangi o doo nohoanga hodooligi.

Daniel 5:19

Gai go hiidinga de Maadua ne gaavange gi de ia dahi duulanga maolunga, gai denga huaadangada alodahi, ma huaahenua, ma dangada e pasa i denga hagadaagangaa muna ne maatagu ma de bolebole i ono mada i mua. Gai tangada naa huu aana e lodo e daa gi magau, gai ia ga daa gu magau; gai tangada aana e lodo e hagaola, gai ia ga hagaola; tangada aana e lodo e hagaamua, gai ia ne hagaamua; gai tangada aana ne lodo e hagamaolalo, gai ia ne hai gi maolalo.

Daniel 4:22

de hodooligi, go koe donu deelaa. Koe gu kona doo maolunga ma de mmahi. Doo maolunga gu hano ma gu dae gi lo te langi, gai doo sauaa e dagi ai e dae gi luu bido o henua i lalo.

Daniel 4:1

Mai i daho de hodooligi go Nebuchadnezzar, ange gi denga huaadangada alodahi, ma huaahenua, ma dangada e pasa i denga hagadaagangaa muna, aama dangada e nnoho i henua i lalo alodahi: gi laumalie doodou nnoho paba!

Daniel 3:29

Deenei ai, au e hagailoo bolo be goai naa huu dangada mai i dahi huaahenua, aabe go dangada e pasa i denga hagadaagangaa muna alodahi, e daalaa hanu muna e hai baasi ange ai gi de Maadua o Shadrak, ma Meshak aama Abednego, gai e duuduu olaadeu angaanga gi too dagidahi, ma de oha olaadeu hale ga hai gi ni hagabuudungaa gainga, go hiidinga tigi ai ange donu se Maadua ne maua i de hagaola dahi, bei dana hai ne hagaola ai nei.”

Daniel 1:2

Gai de Ia Aamua ne dugu ange ia gi hagadee kii ina de hodooligi o Judah go Jehoiakim, ma de kave hanu goloa mai i de hale o de Maadua. Ia ne kave mee nei ga dugu i lo te hale daumaha o dono diinonga i Babylon.

Jeremiah 51:53

Gai ga dae age naa donu Babylon gi de langi, ma de hai ga makaga dono mommee buibui maolunga iai, aagai au e hai naa gi loomai de gau oha gi hebagi ange gi de ia, go Tagi Maolunga e hagadaba.

Jeremiah 51:47

Deenei ai, tilo, e tae mai naa donu laangi aagu e hagaduasala ai denga diinonga o Babylon; dono henua alodahi e hagangadi mee ina naa, gai ono dangada e maakau naa ma e daakodo saele i kilaa.

Jeremiah 51:18

E deai olaadeu haigamaiana, gai ni mee hakadanga; gilaadeu e llilo naa i de masavaa o delaadeu hagaduasala.

Jeremiah 50:15

Goodou hevaalogi i doodou masavaa e holiage ai de aduhale! De aduhale gu magulu, ono hale buibui makaga gu maoha, dono buibui gu oha iho. Go hiidinga deenei de hai a Tagi Maolunga e sui ange ai ana hegau: hai baasi ange gi de ia; suuia ange gi bei dagodo o ana mee gu hai.

Isaiah 60:5

Gai luoo mada e maalama age naa i dau gidee, koe e lodo danuaa naa ma de malangilangi mmao. De lava o honga lausedi e gaavadu naa gi de goe gai de lava o denga huaahenua e gaavadu naa gi de goe.

2 Chronicles 36:7

Nebuchadnezzar ne kave hogi hanu goloa mai i de hale o Tagi Maolunga gi Babylon, ga dugu i dono hale i Babylon.

Isaiah 21:9

Tilo, hanu dangada e kage i honga hoosa gu loomai, gai denga hoosa e hagatau dagilua.” Gai tangada dagitilo ne basa ange, “Babylon gu maoha, Babylon gu maoha! Denga diinonga alodahi o olaadeu maadua gu maoha ma gu daakodo i honga de gelegele.”

De Beebaa go Job 20:15

Ia e luei mai naa de lava aana gu holo laa; gai de Maadua e hai naa ia gi hagalueia mai mee laa.