Jeremiah 46:18 - De Beebaa Dabu

¹⁸ Au e hagatoo donu i dogu mouli, go de Hodooligi e hagadaba, dono ingoo go Tagi o denga hagabuulinga hebagi: E humai naa dahi bei dagodo o Tabor i magavaa o denga mounga, ma dagodo o Carmel i gaogao tai.

Jeremiah 46:18 Referans Kwoze

Jeremiah 48:15

Gai Moab gu oha ma gu maoha, ono aduhale gu kage mai aagena denga daane hebagi, gai ono dama daane mmahi e daia naa ga maakau, go de Hodooligi e hagadaba, gai dono ingoo go Tagi o denga hagabuulinga hebagi.

Judges 4:6

Gai ia ne aalu Barak, tama daane a Abinoam, mai i Kedesh i de vaaenga o Naphtali, ga hai ange gi de ia, “Tagi Maolunga, de Maadua o Israel, e hai adu gi de goe, ‘Hannoo hagabuni ina e dahisemada daane mai i de aamuli o Naphtali ma de aamuli o Zebulun, ma goodou hulo gi de mounga go Tabor.

Joshua 19:22

Gai delaadeu vaaenga e hano hogi ga baa i Tabor, ma Shahazumah, ma Beth Shemesh, gai dono hagaodi go Jordan; e madaangahulu ma ono aduhale nnui nei madali olaadeu aduhale vaaligiligi.

Malachi 1:14

E malaia tangada gu hagatoo donu bolo ia e hai dana sigidaumaha i dahi ana ssiibi daane, aagai ne sigidaumaha ange gi de Ia Aamua i dahi manu e hanu mee baubau i dono angaanga. Go hiidinga au se Hodooligi maolunga, gai dogu ingoo se ingoo hagamaatagu i daho denga huaahenua, go Tagi o denga hagabuulinga hebagi e hagadaba.

Isaiah 48:2

Goodou e hagataba bolo goodou ni dangada e dau ange gi de aduhale dabu, gai goodou e dau ange gi de Maadua o Israel; dono ingoo go Tagi o denga hagabuulinga hebagi.

Isaiah 47:4

Demaadeu Ia Hagaola, dono ingoo go Tagi o denga hagabuulinga hebagi, gai go de Ia Dabu o Israel.

Psalm 89:12

Go koe ne haia ngaiho ma ngaage; gai luu mounga go Tabor ma Hermon e tuhi goe i de malangilangi.

1 Timothy 1:17

De Hodooligi e mouli laa ga hano ai, ia e deai donu se magau, gai e dee maua gi gidee i ganomada o dangada, gai go ia de Maadua abodonu. Hagadubulia ma de hagamahamaha ina ia ga hano ai e dee ngado mai. Amen.

Matthew 5:35

be gi hagatoo donu i henua i lalo, i hiidinga go de mommee e dugu ange aagena luoono vae; aabe go Jerusalem, i hiidinga go de aduhale o de Hodooligi maolunga.

Jeremiah 51:17

Dangada alodahi e ssenga ma teai selaadeu iloo mee, de labagau o denga goolo e hagadogaa ina naa i ono diinonga. Ono diinonga e dee ni mee abodonu; gilaadeu e dee maua i de manamanava.

Jeremiah 44:26

Aagai goodou nnoho mai hagalaangona muna a Tagi Maolunga, dangada o Judah alodahi e nnoho laa i de henua go Egypt: Tilo, au gu hagatoo donu i dogu ingoo maolunga, go Tagi Maolunga e hagadaba, bolo dangada o Judah e nnoho saele laa i Egypt e dee aahe ange naa donu e hagatoo donu i dogu ingoo e hagataba, ‘Au e hagatoo donu i de mouli o de Ia Aamua go Iahweh.’

Jeremiah 10:10

Aagai Iahweh go de Maadua abodonu; go ia de Maadua e mouli laa, ma de Hodooligi e dee ngado mai. Dono bole e hagangalungalue de henua, gai denga huaahenua e dee pau ange gi dono bole.

Joshua 12:22

ma de hodooligi o Kedesh, ma de hodooligi o Jokneam i Carmel,

Jeremiah 51:57

Gai au e hai naa ono dagi ma ono daane heiangi gi bei dangada gu unu laa ma gu ssenga, ma ono goobenaa, aama dagi o de hebagi, aama ono daane dau i de hebagi; gilaadeu e sseni naa ga hano ai gai e dee aalahage ange naa donu,” go de Hodooligi e hagadaba, dono ingoo go Tagi o denga hagabuulinga hebagi.

Judges 4:12

Gai de masavaa huu a Sisera ne langona ai bolo Barak, tama daane a Abinoam, gu hanage gi de mounga go Tabor,

Jeremiah 4:7

Dahi laiono gu sao mai i lodo mee muimui; gai de ia e oohaa denga huaahenua gu sao e humai. Ia gu dugu dono mommee gai ia ga oha ai gi maoha doo henua. Oo aduhale e ngadi daakodo naa, gu deai dangada e nnoho ai.

Jeremiah 4:13

Tilo, ia e hanage bei dagodo o hagausinga, ono hada hebagi e bei dagodo o ssio; gai ana hoosa e kemo ange i denga igele. E vakaa naa gidaadeu! Gidaadeu e maakau naa donu!

Jeremiah 10:16

Gai e dee aanei dagodo o de ia e hagabinga laa go Tuuhanga o Jacob; go hiidinga go ia ne haia mee alodahi, gai ia hogi ne haia Israel, de aamuli o dono boolonga; dono ingoo go Iahweh o denga hagabuulinga hebagi.

Amos 4:13

Tilo, de ia ne haia denga mounga, ma de hai de madangi, ma de hagaago ange ana maanadu gi tangada, gai go de ia e haia de laangi gi gohu, ma de seesee i honga mommee maolunga o henua i lalo — dono ingoo go Iahweh, de Maadua o denga hagabuulinga hebagi.