Jeremiah 44:17 - De Beebaa Dabu

¹⁷ Aagai gimaadeu e hagassula donu amaadeu mee gu lava i de hagatoo donu ai. Gimaadeu e dudu ange naa mee maanongi gi de hine hodooligi o de langi, ma de ssigidaumaha ange mee unu gi de ia, bei hegau amaadeu ma omaadeu dubuna madagidagi, ma omaadeu hodooligi ma omaadeu dagi ne hai i aduhale o Judah ma honga haiava o Jerusalem. De masavaa laa gai gimaadeu e lagolago amaadeu gai ma de duadonu, gai gimaadeu tee hai ngadaa donu.

Jeremiah 44:17 Referans Kwoze

Jeremiah 7:18

Denga dama e hagabudu lahhie, denga damana e dahu de ahi, gai denga haahine e labu pelaoaa e hai ai pelaoaa e sigidaumaha ange gi de Hine Hodooligi o de Langi. Gilaadeu e llingi ange ssigidaumaha o mee unu gi denga diinonga e hai ai gi lili au.

Nehemiah 9:34

Omaadeu hodooligi, ma omaadeu dagi, ma omaadeu dangada haimeedabu, ma omaadeu dubuna madagidagi tee daudali i au hainga aabe ne daohi au muna, aama au muna ne hagakana ange ai gilaadeu.

Ezekiel 20:8

Aagai gilaadeu ne hai mai alaadeu hai gi de au, tee llodo e hagallongo mai; gilaadeu tee tili denga diinonga hakino gee olaadeu e daumaha ange laa aagena, aabe ne tili denga diinonga o Egypt. Deelaa ai, au gu maanadu de hagaduasala gilaadeu i dogu bole ma dogu lili i de henua go Egypt.

Deuteronomy 23:23

Gai koe hagasula ina au muna gu tala i doo ngudu, i hiidinga koe ne hai ange de hagatoo donu nei gi Tagi Maolunga doo Maadua i doo ngudu.

Exodus 16:3

ga hai ange gi gilaau, “Mee naa gi ne daia e Tagi Maolunga laa gimaadeu ga maakau i de henua go Egypt, i de masavaa omaadeu e gaimee ai ma e boobosu danuaa i pelaoaa ma giidagi. Gai gooluu gu gaamai gimaadeu gi de vao nei e daa ai de hagabuulingaa dangada soa nei gi maakau i de hiikai.”

Philippians 3:19

Gai de hagaodi o de gau bee nei go de hagaduasala, delaadeu maadua go olaadeu dinae, gai gilaadeu e hagassoenga i denga mee hagadookaa, gai e maanadu donu huu mee o henua i lalo nei.

Jeremiah 44:25

E hagadaba Tagi o denga hagabuulinga hebagi, de Maadua o Israel: Goodou ma oodou bodu gu hagatoo donu i oodou ngudu ma de hagassula de mee nei i oodou lima, ma de hagataba, ‘Gimaadeu e hagassula donu mee amaadeu gu lava i de hagatoo donu ai, bolo gimaadeu e hai ssigidaumaha o mee maanongi, ange gi de hine hodooligi o de langi, aama de hai sigidaumaha o mee unu ange gi de ia.’ Hano, goodou haia donu gi bei oodou mee gu hagatoo donu ai! Hagassula ina oodou hagatoo donu!

Jeremiah 44:21

“E aha, Tagi Maolunga tee manadua laa ma de iloo dagodo o denga sigidaumaha o mee maanongi oodou ma oodou dubuna, ma oodou hodooligi ma oodou dagi, ma dangada alodahi ne hai i denga aduhale o Judah ma honga haiava o Jerusalem?

Jeremiah 19:13

Denga hale i Jerusalem ma hale o denga hodooligi o Judah e hai naa ga hakino gee bei de mommee go Topheth — go denga hale alaadeu ne dudu ai mee maanongi i tua denga hale, ange gi denga heduu, aama de llingi ai denga sigidaumaha o mee unu ange gi denga diinonga.’ ”

2 Kings 17:16

Gai gilaadeu ne tili denga muna alodahi a Tagi Maolunga, delaadeu Maadua gu tala ange gi gilaadeu, gai ga hai e lua kaau baalanga ga daumaha ange aagena, ma dahi duludulu laagau o Asherah. Gilaadeu ne daumaha ange hogi gi denga heduu i lo te langi aama Baal.

Judges 11:36

Gai tamaa hine laa ga hai ange gi dono damana, “Dogu damana, noo koe gu lava i de hagatoo donu ange gi Tagi Maolunga, gai koe haia gi bei de mee oou gu hagatoo donu ai, i hiidinga Tagi Maolunga gu sui ange hegau a oo hagadaumee, go de gau Ammon.”

Numbers 30:12

Aagai noo dono bodu e dee dugu ange, i de masavaa aana e langona ai, gai mee alodahi a de hine laa ne hagatoo donu ai gu dee haigamaiana, go hiidinga dono bodu tee dugua ange ia gi haia; gai Tagi Maolunga e degi ange gi de ia.

1 Peter 1:18

Goodou e iloo bolo goodou ne hagaola mai i oodou mouli dee haigamaiana, go mee oodou ne ago mai i daho oodou damana madagidagi, gai tee hagao i hanu mee e moolau laa de llilo, bei selevaa ma goolo,

Mark 6:26

Gai de hodooligi gu dee baba mmao ono lodo, aagai go hiidinga ia gu hagatoo donu i madamada o dangada e gaimee laa i taonga, deelaa ai, ia gu dee lodo e hagaahe dana muna ange gi tamaa hine laa.

Jeremiah 44:9

Goodou gu ngalo naa dahulinga baubau a oodou dubuna madagidagi ne hai, ma denga hodooligi o Judah ma olaadeu bodu, ma oodou dahulinga baubau ma oodou bodu i de henua o Judah aama honga haiava o Jerusalem?

Isaiah 48:5

Deenei ai, au ne tala adu mee nei madagidagi loo, gai au ne tala adu mee nei gi de goe i mua de hai, gi dee hagadaba ai goe, “Go dogu diinonga ne haia mee nei; gai go denga diinonga laagau ma diinonga baalanga ne hagasauaa ina mee nei.”

Psalm 106:6

Gimaadeu gu haisala, bei hegau a omaadeu dubuna madagidagi; gimaadeu gu hai mee dee heohi, ma de hai de baubau.

Psalm 12:4

e hagataba laa, “Denga malaungudu nei go gimaadeu e huahua ai; e deai donu se dangada e dagina gimaadeu.”

2 Kings 22:17

Gilaadeu ne tili au gai ga sigidaumaha ange mee maanongi gi denga diinonga, ga hagadaemaha ai ogu lodo i alaadeu hegau alodahi ne hai. Deenei ai, au e hai baasi ange gi de mommee nei i dogu lili, gai e dee maua donu i de haganoho.’

Numbers 30:2

De masavaa naa huu a tangada e hai ai dahi hagatoo donu ange gi Tagi Maolunga, aabe e hai dahi hagatoo donu bolo ia e dee hai dahi mee, gai ia e dee maua donu i de hagaahe dana hagatoo donu; ia e hai donu gi bei aana mee alodahi gu hagatoo donu ai.

2 Chronicles 28:23

Gai ia ne sigidaumaha ange gi diinonga o Damascus ne hagadee kii ina laa ia, ga hagadaba, “Go hiidinga diinonga o denga hodooligi o Syria ne bale ange gilaadeu, au ga sigidaumaha ange nei hogi gi gilaadeu, gai gilaadeu ga balea mai ai au.” Aagai mee nei ne hai ga hagadee kii ina ia aama Israel alodahi.

Jeremiah 1:16

Gai au e hagailoo adu dagodo o dagu hagaduasala ogu dangada, i hiidinga o alaadeu hegau baubau alodahi ma delaadeu tili au; gilaadeu ne dudu mee maanongi ange gi denga diinonga ma de daumaha ange gi mee alaadeu ne hai i olaadeu lima.

Jeremiah 11:12

Denga aduhale o Judah, ma dangada o Jerusalem e hulo naa ga tangi ange, gi diinonga alaadeu e sigidaumaha ange laa mee maanongi aagena, gai denga diinonga laa e dee bale ange donu gilaadeu i de masavaa hai ngadaa.

Jeremiah 18:15

Aagai ogu dangada gu ngalo au, gilaadeu e dudu mee maanongi ange gi denga ngadi diinonga, gai denga diinonga gu hai gilaadeu gi dee maua i de seesee i de haiava madagidagi. Denga diinonga laa gu hai gilaadeu gi hulo i denga dao haiava gee, aama honga haiava tigi bae.

Ezekiel 8:16

Gai ia ne kave au gi lo te buibui e mua gi lodo o de hale o Tagi Maolunga, gai tilo, e dinolua ma dogolima daane e nnoho i gaogao de haitoga o de temple i kilaa, i magavaa de velanda ma de mommee o ssigidaumaha. Gai olaadeu dua e huuhuli ange gi de temple, olaadeu mada e huuhuli gi dua, gai gilaadeu e ino ange gi de laa e hanage laa i dua.

Ezekiel 20:32

Gai oodou mee e maanadu naa e dee maua donu i de hai, i doodou hagataba, “Gimaadeu e hai gi bei dagodo o denga huaahenua ange laa, ma huaabodu i denga henua ange laa, gimaadeu e daumaha ange gi denga laagau ma hadu.”

Ezekiel 23:41

Gai gooluu ne nnoho i honga mommee nnoho danuaa, gai teebele i oo mada i mua gu dugu ai agu mee maanongi ma agu lolo.

Habakkuk 1:16

Deenei ai, ia e hai ange naa sigidaumaha gi dana galauna ma de dudu denga mee maanongi ange gi dana gubenga, i hiidinga ia e mouli danuaa i dana galauna, ma de gai denga gai mammami hugadoo.

Jeremiah 7:17

Koe e dee gidee naa alaadeu mee e hai i lodo aduhale o Judah ma honga haiava o Jerusalem?