Jeremiah 4:24 - De Beebaa Dabu

²⁴ Au ne galo age gi denga mounga, gai tilo, gilaadeu e ngalungaalue; gai duuduu alodahi e ngalungaalue hogi.

Jeremiah 4:24 Referans Kwoze

Ezekiel 38:20

Denga mamu o lausedi, ma manu llele i lo te moana i lunga, ma manu dolodolo i lodo henua, ma manu e tolo i honga de gelegele, aama dangada alodahi i henua i lalo e bolebole naa i delaadeu maatagu i ogu mada luoogu mada. Denga mounga e baakuu naa, denga hadu maolunga e malili iho naa, gai denga buibui alodahi e baakuu iho naa gi honga de gelegele.

Jeremiah 10:10

Aagai Iahweh go de Maadua abodonu; go ia de Maadua e mouli laa, ma de Hodooligi e dee ngado mai. Dono bole e hagangalungalue de henua, gai denga huaahenua e dee pau ange gi dono bole.

Isaiah 5:25

Deelaa ai, Tagi Maolunga gu lili mmao i ono dangada, gai ia ne hagaabo dono lima ga daa gilaadeu gu maakau. Denga mounga gu ngalungaalue; de gau maakau gu daakodo saele i honga denga haiava bei denga gainga. Gai mee nei alodahi tee maua donu i de hagahelui dono lili, gai dono lima goi hagaabo donu huu.

Micah 1:4

Denga mounga gu vaivai i lalo luoono vae, gai denga geelonga gu mahangahanga, bei denga wax e vaivai laa i de ahi, ma denga vai e ssali iho laa i de madadaagodo.

Psalm 97:4

Ana uila e hagamaalama henua i lalo; henua i lalo gu ngalungalue i dana gide mee nei.

Psalm 18:7

Henua i lalo gu ngalungalue ma de bolebole; dagelo o denga mounga gu ngalungaalue, ma de bolebole i hiidinga ia gu lili.

1 Kings 19:11

Gai ia ne hai ange, “Sao mai hannoo duu i honga de mounga i mada luu mada o Tagi Maolunga. Gai tilo, Tagi Maolunga e humai naa laa oo gaogao.” Gai dahi madangi laumalie ma de mmahi ne dau mai ga oha denga mounga ma de dili iho denga hadu, i mada i mua o Tagi Maolunga, aagai Tagi Maolunga e dee noho i lo te madangi laa. Dua de madangi laa gai de henua gu ngalungalue, aagai Tagi Maolunga e dee noho i de ngalungalue o de henua.

Habakkuk 3:10

denga mounga ne bolebole i delaadeu gidee goe. Denga vai gu ssali iho; de moana gelo gu hagangolo gai ono beau gu kona de nnui.

Habakkuk 3:6

Ia ne duu age, gai henua i lalo gu ngalungalue; ia ne galo ange ga tilo, gai denga huaahenua gu bolebole. Denga mounga mai i mua gu maoha ma gu malili iho, gai denga duuduu gu daulooloa laa gu baakuu — aagai ia e noho ga hano ai.

Jeremiah 8:16

De haganngolo usu o denga hoosa a de hagadaumee e langona mai loo i Dan; gai de hagalongaa o alaadeu hoosa daane, gu hai ma gu bolebole de henua alodahi. Gilaadeu gu loomai e oha de henua ma mee alodahi iai; de aduhale ma dangada alodahi e nnoho i kilaa.”

Psalm 77:18

De babaa o au hatuli e ngolo bei de madangi mmahi, au uila e hagamaalama henua i lalo, gai henua i lalo e ngalungalue ma de ngalullulu.

Revelation 6:14

Gai de langi gu aau gee ga mulo bei dagodo o de beebaa mulo. Gai denga mounga ma denga modu alodahi gu hagangaalue gee mai i olaadeu duulanga.

Exodus 19:18

Gai de mounga go Sinai gu buu ai de useahi, go hiidinga Tagi Maolunga gu hano iho gi ono elunga i de ahi. Gai de useahi laa gu haoli kilaa bei dagodo o de useahi o de ahi mmahi, gai de mounga laa alodahi gu ngalungalue.

Jeremiah 9:10

Au e dangi naa ma de dangi see i hiidinga o denga mounga, ma de dangi i hiidinga o mommee iai helii i lodo henua. Mommee laa gu ngadi daakodo ma teai dangada e seesee ai, gu dee langona hogi leo o denga manu haangai ai. Gai denga manu llele ma manu dolodolo gu hulo gee mai i kilaa.

Isaiah 13:13

Deelaa ai, au e hai naa gi ngalungalue de langi; gai henua i lalo gi ngalue gee mai i dono duulanga, i de laangi o de bole o Tagi o denga hagabuulinga hebagi, ma de laangi o dono lili laumalie.

Isaiah 24:20

Henua i lalo gu bei tangada senga, gai gu singasinga saele i de madangi bei de baasi hale; gai gu kona taemaha i ono baubau ma dono hagamanege, gai gu baguu — gu dee maua donu gi duu age ange.