Jeremiah 13:16 - De Beebaa Dabu

¹⁶ Hagamahamaha ina Tagi Maolunga doodou Maadua i mua dana gaamai de gohu, ma mua doodou baakuu i honga denga mounga gohu. Goodou e tali gi humai de maalama, aagai ia e hai gi kona de gohu, ma de hai gi gohu boo dangodango.

Jeremiah 13:16 Referans Kwoze

Isaiah 59:9

Deelaa ai, de hagamodu muna heohi e mmao gee donu i gidaadeu, gai de heohi e dee dae ange donu gi gimaadeu. Gimaadeu e tali gi maalama, aagai e gohu donu huu; gimaadeu ne tali gi hagamaalama, aagai gimaadeu e seesee i de malu o de gohu.

Isaiah 8:22

Gai gilaadeu e kalo ange naa ga tilo henua i lalo, gai gilaadeu e gidee naa donu huu de hai ngadaa, ma de gohu aama de gohu hagamaatagu. Gai gilaadeu e hai naa gi nnoho i lo te gohu boo dangodango.

Isaiah 60:2

Tilo, de gohu gu haoli henua i lalo, gai de gohu boo dangodango gu haoli denga huaadangada; aagai Tagi Maolunga e humai naa gi oo elunga, gai dono mahamaha e gidee naa i oo daha.

Isaiah 5:30

Gilaadeu e hagangolo naa i de manu laa i de laangi laa, bei de hagangolo o beau o de moana. Gai noo tangada e galo ange ga tilo de henua, gai tilo, gu gohu ma de hai ngadaa; denga hagausinga e haoli naa de maalama.

Proverbs 4:19

Hegau a de gau baubau e bei de gohu boo dangodango, gilaadeu e dee iloo donu be se aha ne hagalaavea olaadeu vae ga baakuu ai laa gilaadeu.

Joshua 7:19

Aagai Joshua ga hai ange gi Achan, “Dagu dama, au e hai adu gi de goe, koe gi hagamahamaha ina Tagi Maolunga, de Maadua o Israel, ma de tuhi ia; koe daalaa mai gi de au be se aha aau gu hai, aude hagamuunia donu i de au.”

Jeremiah 23:12

Deelaa ai, delaadeu haiava e hai naa gi segesege ma de gohu; gai gilaadeu e dagadagahia naa ma de maakau i kilaa. Go hiidinga au e hai naa gi humai de hai ngadaa gi gilaadeu, i de ngadau aagu e hagaduasala ai gilaadeu, go Tagi Maolunga e hagadaba.

Jeremiah 4:23

Au ne galo ange ga tilo dagodo o henua i lalo, gai tilo, e vinigoso ma tee hagatau danuaa; gai au ne galo age gi de langi, gai gu deai maalama iai.

Psalm 44:19

Aagai koe gu hagaduasala ma de hai gimaadeu gi bei de mommee o denga jackal, ma de haoli gimaadeu i de gohu boo dangodango.

1 Samuel 6:5

Gai goodou haia hanu mee be ni hagahoa i goolo ma gimoo ne oohaa laa de henua, e hagadubu ai de Maadua o Israel. Kana adu ia e aau gee naa dono lima e hagaduasala ai nei goodou ma oodou diinonga aama doodou henua.

Exodus 10:21

Gai Tagi Maolunga ga hai ange gi Moses, “Haalo ina doo lima gi lo te langi i lunga gi gohu ai honga de henua o Egypt i de gohu boo dangodango.”

1 Peter 2:8

gai “se hadu e hagalaavea vae o dangada gai se hadu e haia ga baakuu gilaadeu.” Gilaadeu e baakuu naa i hiidinga delaadeu dee daudali i de muna — bei de hai gu hagamodu ange ai laa gi gilaadeu.

John 12:35

Iesu ne hai ange gi gilaadeu, “De maalama e dagodo i oodou daha i dahi damaa masavaa. Goodou seesee i de masavaa e dahi ai maalama kana daea mai e de gohu goodou. Tangada e seesee i de gohu e dee gidee e ia dono mommee e seesee ai.

Lamentations 4:17

Gimaadeu gu daalea i de tali, i teai donu se bale e humai; gimaadeu ne dagitilo mai i omaadeu hale hagaloosi maolunga be e dahi laa huaahenua e maua i de hagaola gimaadeu.

Jeremiah 14:19

E aha, koe gu tili naa donu Judah? Koe gu kino naa donu i Zion? Gu aha goe gu hagailiili ai naa gimaadeu gai omaadeu maanuga gu dee maua gi mmahu? Gimaadeu e ssala de nnoho paba, aagai teai donu se danuaa amaadeu e gidee. Gimaadeu e tali dahi masavaa o de hagaieiangi, aagai go de mee hagamaatagu donu huu ne humai.

Jeremiah 8:15

Gidaadeu ne tali delaadeu nnoho paba, aagai teai donu se mee danuaa ne humai; gidaadeu ne tali dahi masavaa o de hagaieiangi, aagai go de mee hagamaatagu donu huu ne humai.

Ecclesiastes 11:8

Gai ga lagolago naa donu ngadau o tangada e mouli ai, gai ia e malangilangi i ngadau alodahi. Aagai ia gi manadua bolo laangi o de gohu e lagolago naa donu. Gai mee alodahi e loomai e deai donu haigamaiana.

De Beebaa go Job 3:5

Gai gi iai de goohunga ma de gohu boo dangodango; de hagausinga gi hanage gi haolia de laangi laa; gai de gohu o de laangi gi hagamaatagu mmao.

Psalm 107:10

Hanu ne nnoho i lo te goohunga ma de gohu boo dangodango, gilaadeu i lo te hale pono e duasala i denga daula baalanga,

Psalm 107:14

Ia ne hagassao mai gilaadeu i lo te goohunga ma de gohu boo dangodango, ma de duuduu olaadeu mee e noonooa ai laa.

Jeremiah 2:6

Gilaadeu tee hagataba hogi, ‘I hee iai Tagi Maolunga go de ia ne hagassao ina mai gimaadeu i Egypt, ga dagi mai gimaadeu i de vao, ma lo te henua e deai mee e ssomo ai gai iai denga geelonga, se henua e deai vai iai ma de gohu boo dangodango, se henua e deai dangada e seesee ai gai e deai dangada e nnoho ai?’

Jeremiah 6:21

Deenei ai, e hagadaba Tagi Maolunga, “Tilo, au e dugu naa hanu mee e haia ga baakuu de huaadangada nei. Denga damana ma denga dama e laavea ai naa ga baakuu; gai dangada e paa ange gi gilaadeu ma olaadeu soa e maakau ai naa.”

Jeremiah 50:6

Ogu dangada gu bei dagodo o denga ssiibi gu dee maleva laa; olaadeu dangada hagaloosi gu tili gilaadeu gi ssenga saele i honga mounga. Gai gilaadeu gu silivaahea saele i honga mounga ma duuduu, gilaadeu gu ngalo de mommee iai delaadeu buibui.

Ezekiel 21:15

Gai dangada e maatagu naa, gai e soa naa donu e maakau. Au e gaamai naa de gadilaasa gi olaadeu aduhale. Tilo, de gadilaasa laa e dabadaba bei de uila, gai gu poo i de lima o de ia daa dangada.

Ezekiel 34:12

Au e hagaloosi ange naa agu ssiibi bei de hai a tangada hagaloosi ssiibi e ssala ai laa ana ssiibi gu mavaevae saele laa. Au e hagaola naa gilaadeu mai i mommee alodahi olaadeu gu mavaevae saele laa aagena, i de laangi e hagausinga ai ma de gohu.

Ezekiel 36:15

Au e hai naa donu gi dee langona e goe de hagammae manava a de huaahenua, gai koe e dee hagangadi mee ina naa donu i daho denga huaadangada, aabe gilaadeu e hagadee kii doo henua, go de Ia Aamua go Iahweh e hagadaba.”

Amos 4:13

Tilo, de ia ne haia denga mounga, ma de hai de madangi, ma de hagaago ange ana maanadu gi tangada, gai go de ia e haia de laangi gi gohu, ma de seesee i honga mommee maolunga o henua i lalo — dono ingoo go Iahweh, de Maadua o denga hagabuulinga hebagi.

Amos 5:18

E vakaa naa goodou e llodo laa gi dae mai de laangi o Tagi Maolunga! Gu aha gu llodo ai goodou gi dae mai de laangi o Tagi Maolunga? De laangi laa se laangi gohu, e deai donu se maalama iai.

Psalm 29:2

Gaavange de tuhi gi de ingoo mahamaha o Tagi Maolunga, gai daumaha ange gi Tagi Maolunga i malo dabu.

Isaiah 59:10

Gimaadeu e haahaa saele i gaogao de buibui bei dagodo o de gau dee kide, gimaadeu e haahaa saele bei dagodo o dangada e deai olaadeu ganomada. Gimaadeu e baakuu saele i lo te laangi e dagodo be gu dai gohugohu de mee; gimaadeu e bei dagodo o de gau maakau i magavaa o denga daane mmahi.

Joel 2:2

se laangi gohu ma teai se maalama iai, se laangi hagausinga ina ma de gohu boo dangodango. Gai de hagabuulinga hebagi soa ma de mmahi gu bei de haolia o honga denga mounga i de gohu, gai tigi ai donu mee bee nei ne hai madagidagi, gai e deai naa hogi mee bee nei e hai i muli mai, i ngadau o denga atangada alodahi e loomai.

Malachi 2:2

Noo goodou e dee hagallongo mai, noo goodou e dee daohi muna nei i oodou lodo, e hagadubu ai dogu ingoo, go Tagi o denga hagabuulinga hebagi e hagadaba, gai au e hai naa gi humai de malaia gi goodou, gai au e hai naa doodou manuuia gi se malaia. Ni muna abodonu, au gu hagamalaia donu mee nei, i hiidinga goodou e dee daohi mee nei i oodou lodo.