Isaiah 9:17 - De Beebaa Dabu

¹⁷ Deelaa ai, de Ia Aamua e dee malangilangi i alaadeu dama daane, be e lodo aloha ange gi alaadeu gauligi gu deai olaadeu damana, aabe go haahine gu maakau olaadeu bodu. Go hiidinga gilaadeu alodahi e dee hai hegau i mee heohi aama de baubau, gai muna a dangada alodahi e tala gu hakino gee. Gai mee nei alodahi tee maua i de hai gi helui dono lili, dono lima goi hagaabo donu huu.

Isaiah 9:17 Referans Kwoze

Jeremiah 18:21

Deenei ai, haia gi humai de onge gi alaadeu dama; haia gi daia gilaadeu gi maakau i de gadilaasa. Haia alaadeu haahine gi deai alaadeu dama ma de maakau olaadeu bodu; alaadeu daane gi maakau i de mee hagamaakau, gai alaadeu dama daane gi maakau i de gadilaasa i de hebagi.

Isaiah 10:6

Au ne hai ia gi hano gi hai baasi ange gi dahi huaahenua baubau, au ne kave ia gi hai baasi ange gi dahi huaadangada oogu e lili ai laa, ma de hai gi de mahi gilaadeu ga kave olaadeu goloa, aama de dagadagahi gilaadeu bei denga bela i honga denga haiava.

Isaiah 5:25

Deelaa ai, Tagi Maolunga gu lili mmao i ono dangada, gai ia ne hagaabo dono lima ga daa gilaadeu gu maakau. Denga mounga gu ngalungaalue; de gau maakau gu daakodo saele i honga denga haiava bei denga gainga. Gai mee nei alodahi tee maua donu i de hagahelui dono lili, gai dono lima goi hagaabo donu huu.

Matthew 12:34

Goodou dama a denga labodo hagammau! Dee hee doodou hai e maua ai i de tala hanu mee danuaa, gai goodou ni dangada baubau? Muna a tangada e hagaago mai donu mee i ono lodo.

Isaiah 27:11

De masavaa naa huu o ono laa vaaligi e mmasa ai, gai gu hadihadi, gai denga haahine ga hai ai alaadeu ahi. Gai de huaadangada nei e dee maua donu gi tonu ange, gai de ia ne haia gilaadeu tee lodo aloha i gilaadeu; de ia ne haia gilaadeu tee abodonu ange gi gilaadeu.

Isaiah 9:12

De gau Assyria mai i dua ma de gau Philistia mai i dai e hhanga naa olaadeu ngudu ga holo Israel. Gai mee nei alodahi tee maua donu i de hagahelui dono lili, gai dono lima goi hagaabo donu huu.

Isaiah 10:4

Gai gu deai ange oodou mee e hai, aagai go de ino donu huu gi lalo madali gilaadeu gu noonoodia, aabe go de baakuu madali de gau maakau. Gai mee nei alodahi tee maua donu i de hagahelui dono lili, gai dono lima goi hagaabo donu huu.

Isaiah 9:21

Manasseh e gai naa Ephraim, gai Ephraim e gai Manasseh; gai gilaau e hagabuni naa ga hai baasi ange ai gi Judah. Gai mee nei alodahi tee maua donu i de hagahelui dono lili, gai dono lima goi hagaabo donu huu.

Psalm 147:10

Ia e dee malangilangi i mahi o de hoosa, aabe go luu vae mmahi o dahi dangada,

Matthew 16:3

Gai goodou e hagataba i taiao, ‘E baubau naa de mee ailaa nei, go hiidinga gu mmea lo te langi ma de hagauliuli age.’ Goodou ni dangada e daahangadia dangada, goodou e iloo de tilo dagodo o lo te langi, aagai e dee tonu ange gi denga hagailonga e hai i de masavaa nei.

Zechariah 9:17

Ga dae laa de tilo danuaa ma de mahamaha ono dangada! Hua o denga grain e hai naa ga mmahi denga dama daane, gai denga uvaini hoou e hai naa ga mmahi denga damaa hine.

Micah 7:2

Gu deai donu dangada heohi i honga de henua, gu deai donu se dangada e hai hegau i de mee heohi e doe. Dangada alodahi gu nnoho huu e daa dangada gi maakau; dahi dangada e noho e daa dono daina.

Ezekiel 20:33

Au e hagatoo donu i dogu mouli, go de Ia Aamua go Iahweh e hagadaba, au e hagaabo naa dogu lima mmahi i dogu bole, gai au ga hodooligi ai i oodou elunga.

Jeremiah 5:1

“Goodou saavini saele naa i honga denga haiava o Jerusalem, ma de ssala naa i lo te aduhale be e gidee dahi dangada. Noo goodou e gidee dahi dangada daudahi e hai hegau i de heohi ma de ssala de muna abodonu, gai au ga degi ange gi de aduhale nei.

Isaiah 65:19

Au e malangilangi naa i Jerusalem, ma de lodo danuaa i ogu dangada; gai e deai naa donu se tangi aabe se tangi see e langona i lo te aduhale.

Isaiah 62:5

Dahi dama daane e hai bodu ange gi dahi damaa hine, gai e bei ai hogi au dama e hai bodu adu naa gi de goe. Gai de Maadua e malangilangi naa hogi i de goe, bei de malangilangi o tama daane i dono bodu.

Isaiah 13:18

Alaadeu mee hholu e daa naa ga maakau denga dama daane, gilaadeu e dee abodonu ange naa gi denga gaagaa, aabe e llodo aaloha ange gi denga gauligi.

Isaiah 10:2

ma de kave gee de heohi o de gau hagaau aloha, ma tee hagamodu muna o ogu dangada gu duasala laa i de heohi, ma de vaivai hai denga haahine gu maakau olaadeu bodu ma de gaiaa mee o denga gauligi gu deai olaadeu damana.

Isaiah 1:4

E vakaa naa de huaahenua haisalasala, ma de huaadangada e honu i de baubau, gai ni gauligi e haia de baubau, go dama e haia hegau hakino gee! Gilaadeu gu daahuli gee i Tagi Maolunga, gilaadeu gu hagangadi mee de Ia Dabu o Israel, gilaadeu gu huuhuli ange olaadeu dua gi de ia.

De Beebaa go Job 15:34

Go hiidinga de hagabuulinga o de gau baubau e deai naa donu alaadeu dama, gai de ahi e dudu naa hale o dangada e llodo i denga ngadi gaavange hagasenga.

Psalm 109:12

Gai gi deai e abodonu ange gi de ia, aabe gi aloha ange gi ana dama i dua dono magau!

Isaiah 3:8

Jerusalem e oha naa ga maoha, gai Judah e hagadee kii ina naa, i hiidinga alaadeu muna ma hegau e hai baasi ange gi Tagi Maolunga, ma de hagangadi mee dono mahamaha.

Isaiah 14:20

Koe tee danu madali gilaadeu, go hiidinga koe ne oha doo henua ma de daa ga maakau oo dangada. E deai naa donu dangada e manadua hagadiilinga o dangada e haia de baubau.

Isaiah 24:5

Dangada gu hai gi hakino gee henua i lalo, gilaadeu tee daudali i denga hainga, gilaadeu gu hagahaisala mee gu lava i de hagasauaa, ma de oha de hagatoo donu hagaheloongoi dee ngado mai laa.

Isaiah 31:2

Gai Tagi Maolunga e kona mmao de heiangi, gai e maua i de hai gi humai de hai ngadaa; ia e dee hagaahe donu dana muna. Ia e hidi age naa ga hebagi ange gi de gau baubau, ma gilaadeu e balea ange dangada e haia de baubau.

Isaiah 31:3

De gau Egypt ni dangada, e dee go de Maadua; alaadeu hoosa ni mee henua i lalo, e dee ni hagasaalunga. De masavaa a Tagi Maolunga e hagaabo ai dono lima sauaa, gai de huaahenua e balea ange laa e maoha naa, gai de ia e gaavee laa de bale e dee kii; gilaau ngaadahi e oohaa naa.

Isaiah 40:30

Denga dama daane e daalea donu hogi ma odi olaadeu mahi, denga dama daane e baakuu donu;

Amos 4:10

Au ne hai gi loomai denga mee hagamaakau gi goodou bei dagu hai ne hai ai laa Egypt. Au ne daa ga maakau oodou dama daane i de gadilaasa; gai oodou hoosa ne gaavee gee. Au ne hai goodou gi dungua de pilo o oodou mommee nnoho gaainga; aagai goodou tee aahe mai gi de au, go Tagi Maolunga e hagadaba.

Amos 8:13

De laangi laa gai denga damaa hine mahamaha ma dama daane e ssili naa olaadeu mada i delaadeu hieunu.

Isaiah 5:24

Deenei ai, e bei de ahi ula e dudu ai laa denga helii mmasa gai denga helii mmasa e dudu ga odi i lo te ahi ula, gai olaadeu aga e hulo ga pobo; olaadeu huaala e ilihia e de madangi bei de mama o denga gelegele, go hiidinga gilaadeu gu tili de hainga a Tagi o denga hagabuulinga hebagi, ma de hagangadi mee muna a de Ia Dabu o Israel.

Isaiah 33:11

Goodou ne hai tama i denga ngadi gili grain, gai ne haanau denga lau manu mmasa; gai de madangi i oodou manava e dudu naa goodou bei de ahi.

Isaiah 33:12

De huaadangada e dudu naa ga bei lehu, ma de dudu i de ahi, bei manu daladala gu duuduu laa.”