Isaiah 64:6 - De Beebaa Dabu

⁶ Gimaadeu alodahi gu bei tangada e dee gilimalali laa, amaadeu hegau heohi alodahi e bei donu huu denga bido malo hakino gee; gimaadeu alodahi gu bei de lau manu gu mmae, gai omaadeu baubau gu bei dagodo o de madangi, e hagalleva saele gimaadeu.

Isaiah 64:6 Referans Kwoze

Romans 7:18

Gai au e iloo bolo e deai donu se mee danuaa daudahi e dagodo i ogu lodo, i de angaanga nei. Au e lodo e hai de mee danuaa, aagai au e dee maua donu i de hai.

Romans 7:24

E hagaaloha mmao ogu dagodo! Goai e maua i de hagaola ngau mai i de angaanga e magau nei?

Zechariah 3:3

De masavaa laa gai Joshua e duu i mada i mua o tangada de langi, gai ia e gahu i hanu malo vai gelegele.

Isaiah 53:6

Gidaadeu alodahi e bei denga ssiibi, gu ssenga saele laa, dahi ma dahi gu hano donu huu i dono haiava; gai Tagi Maolunga gu hagauda ange gi de ia odaadeu baubau alodahi.

Titus 3:3

Go hiidinga i mua gai gidaadeu alodahi ni dangada llodo ssenga, ma tee hagallongo i muna, gai ne daahangadia, ma de noodia i denga hagadaagangaa lodo odaadeu e malangilangi ai. Gidaadeu ne mouli i de kino ma de lodo gaiaa, gai e hai hegau i de lili ma de hagadau kino.

De Beebaa go Job 25:4

E maua e dahi dangada gi heohi i mada luu mada o de Maadua? E maua e tangada ne haanau i daho de hine gi gilimalali?

De Beebaa go Job 14:4

Goai e maua i de hai de mee gilimalali i de mee e dee gilimalali? E deai donu se dangada e maua!

Philippians 3:9

ma de dau madali ia, gai e dee se heohi ne maua i dogu daudali i de hainga, aagai se heohi ne maua i dogu gai ange gi Klisdo — go de heohi mai i daho de Maadua ne maua laa i de gai,

Isaiah 46:12

Goodou de gau makaga oodou lodo, nnoho mai hagalaangona agu muna; go goodou e mmao gee i de mee heohi:

Psalm 51:5

Ni muna abodonu, au se dangada baubau mai i dogu haanau, gai au ne haisala mai donu i de masavaa oogu ne hagadili ai i daho dogu dinana.

Revelation 7:13

Gai dahi daane madua laa ne ssili mai gi de au, “Goai aanei e kahu nei i denga malo tea, gai go hee olaadeu ne loomai ai nei?”

Isaiah 6:5

Gai au ne hagadaba, “Gu vakaa loo au! Au gu se dangada gu magau! Go hiidinga au se dangada baubau dogu ngudu, gai au e noho i magavaa o dangada e baubau olaadeu ngudu; go hiidinga luoogu mada gu gidee de Hodooligi, Tagi o denga hagabuulinga hebagi.”

Hosea 4:19

De madangi gu haoli gilaadeu i luoono bakau, gilaadeu e dookaa naa i hiidinga o alaadeu sigidaumaha.

Isaiah 48:1

Dangada o Jacob, goodou hagalaangona muna nei, go goodou gu hagaingoo ange go Israel, gai ne hagadili i daho Judah, goodou e hagatoo donu i de ingoo o Tagi Maolunga, ma de dagudagu de Maadua o Israel, aagai e dee se muna abodonu aabe e hai i de heohi.

Psalm 1:4

Gai de gau baubau e dee aanei olaadeu dagodo; gilaadeu e bei dagodo o gili grain e ilihia laa i de madangi.

De Beebaa go Job 40:4

“Tilo, au se dangada e dee bau ange gi mee nei — gai dee hee dagu hai e basa adu ai gi au muna? Au e pono dogu ngudu i dogu lima.

Isaiah 1:30

Goodou e bei naa de oak e mmae laa ono lau, ma de veelenga e deai vai iai.

Isaiah 50:1

E hagadaba Tagi Maolunga, “I hee iai de beebaa maavae a doodou dinana, aagu ne gaavadu ga hai ai ia gi hano gee? Gai goai aagu ne hagao ange goodou aagena e hagao ai agu muli? Tilo, go hiidinga oodou haisala oodou ne hagao ai gi daha, gai go oodou haisala ne hidi mai ai de hano gee o doodou dinana.

Leviticus 13:12

Noo tangada haimeedabu gu gidee bolo de mangeo loo gu ssomo i de angaanga alodahi o tangada laa, mai i de biho ga dae ai gi luoono vae,

2 Samuel 22:46

De gau henua gee gu deai selaadeu tali; gilaadeu gu sasao mai i lodo olaadeu mommee buibui makaga ma de bolebole.

Psalm 14:4

E aha, dangada e haia de baubau tigi heiangi nei donu — gilaadeu e vaivai hai ogu dangada bei de gai a dangada pelaoaa, ma gilaadeu e dee dalodalo ange gi Tagi Maolunga?

Isaiah 1:28

Aagai de gau hai alaadeu hai ma de gau haisala e odi naa i de oha ga deai, gai gilaadeu e daahuli gee i Tagi Maolunga e maakau naa.

Isaiah 8:17

Au e tali ange Tagi Maolunga, go de ia e hagamuunia luoono mada i dangada o Jacob. Gai au e tali ange naa donu ia.

Isaiah 43:22

Aagai Jacob, koe tee hagahi mai au; Israel, koe gu goso i de au.

Isaiah 50:2

Gai gu aha gu deai ai laa dangada i de masavaa oogu ne humai ai? Gai gu aha gu deai ai laa dangada e pasa mai, i de masavaa aagu ne hagaagahi ai? E aha, gu kona laa de bodobodo dogu lima, gu dee maua i de hagaola goodou? Aabe gu deai ogu mahi e hagaola ai goodou? Tilo, au ne hagasee tai gu masa, au ne hai denga saalingaa vai ga se vao; denga mamu i kilaa gu pilo i teai dai ma de maakau i delaadeu hieunu.

Daniel 9:13

Denga hai ngadaa nei alodahi gu hai mai gi gimaadeu, bei de hai gu sisi ai laa i lodo hainga a Moses, aagai gimaadeu tigi dangidangi donu Tagi Maolunga demaadeu Maadua, gi abodonu mai, aabe e daahuli gee i omaadeu baubau, ma de kana ange e hagallongo de muna abodonu.

Hosea 7:7

Gilaadeu alodahi e vvela bei de mommee dao mee; gilaadeu e daa gi maakau olaadeu dagi. Olaadeu hodooligi alodahi gu odi i de maakau; gai gu deai se gilaadeu e dangidangi mai i de bale.