Isaiah 52:1 - De Beebaa Dabu

¹ Zion, alahage, alahage, hagammahi ina goe. Jerusalem, de aduhale dabu, gahu i oo malo mahamaha. Gai de gau tigi tuu dagaholiage ma gilaadeu e dee gilimalali e dee aahe e ulu i de aduhale.

Isaiah 52:1 Referans Kwoze

Revelation 21:27

Aagai e deai donu se mee hakino gee e hagaulu mai gi kilaa, be se dangada e haia dahulinga hakino gee ma de mee hagasenga, gai go gilaadeu donu huu gu sisi laa olaadeu ingoo i de beebaa o de mouli a Ssiibi Gauligi e maua i de ulu i kilaa.

Isaiah 51:17

Alahage, alahage! Jerusalem, hidi age, koe gu unu mee mai i de lima o Tagi Maolunga, go de ubu o dono bole, koe gu unu ma gu masa mee i ono lodo, go de ubu e haia ga ssee saele dangada.

Revelation 21:2

Gai au ne gidee de aduhale dabu, go Jerusalem hoou, e hano iho i de langi i daho de Maadua, gai gu lava i de hagadanuaa bei dagodo o de hine gu dai hagahai bodu gu gahu laa e hagadabena ange gi dono bodu.

Zechariah 3:4

Gai tangada de langi ne hai ange gi gilaadeu e tuu i ono mada i mua, “Hagauia ono malo vai gelegele naa.” Gai ia ne hai ange gi Joshua, “Tilo, au gu kave gee oo baubau, gai ga hakahu adu goe i hanu malo hoou.”

Isaiah 51:9

De lima o Tagi Maolunga, alahage, alahage! Hakahu ina goe i de mahi, alahage, bei oo dagodo i denga laangi gu hulo, bei au hegau i denga atangada madagidagi. E aha, e dee go koe e duuduudia de Rahab ga too dagidahi ma de velo de manu laumalie laa?

Isaiah 35:8

Gai e hai naa dahi haiava laumalie i kilaa, gai e hagaingoo ange naa go de Haiava Dabu. De gau hakino gee e dee maua donu i de seesee i de haiava laa, gai de haiava laa se mee ange gi gilaadeu e seesee ai, aagai de gau llodo senga e dee maua donu i de seesee i kilaa.

Isaiah 48:2

Goodou e hagataba bolo goodou ni dangada e dau ange gi de aduhale dabu, gai goodou e dau ange gi de Maadua o Israel; dono ingoo go Tagi o denga hagabuulinga hebagi.

Romans 13:14

Aagai goodou gi kahu i Tagi Maolunga go Iesu Klisdo, gai gi dee hagassula ina lodo haisala o de angaanga.

Matthew 4:5

De ia hagabaubau laa ne dagi hogi Iesu gi de aduhale dabu, ga hai ia gi duu i honga dahi dahuuhuu maolunga o de temple,

Nahum 1:15

Galo ange diiloo honga denga mounga, dabuvae o de ia e gaamai de longo danuaa, ma de tala dagodo o de nnoho paba! Judah, haia au daonga, ma de hagassula au hagatoo donu. Go hiidinga gu deai ange dangada baubau e kage mai gi honga doo henua; gilaadeu gu daia ma gu maakau.

Ephesians 6:10

Denga daina, aanei agu muna hagaodi, hagammahi ina goodou i mahi o Tagi Maolunga ma dono sauaa mmahi.

Isaiah 61:10

Au gu malangilangi mmao i Tagi Maolunga, dogu hagasaalunga e lodo danuaa mmao i dogu Maadua. Go hiidinga ia gu hakahu mai au i de hagaola, ma de saabini au i de heohi bei de malo laa daha, bei de hai a taane e hagahai bodu e gahu hagadanuaa ai laa bei tangada haimeedabu gai bei de hai a de hine e hagahai bodu e dau ai laa denga hadu hagamogomogo.

Isaiah 60:21

Gai oo dangada alodahi e mouli naa i de heohi; gilaadeu e henua naa i de henua ga hano ai. Gai go gilaadeu de uli aagu ne doo laa, go hegau a luoogu lima, e hagaago mai ai dogu hagamahamaha.

Isaiah 26:2

Huugea haitoga o de aduhale, e ulu mai ai de huaahenua heohi, go de huaahenua e hai hegau i de muna abodonu.

Isaiah 1:21

Kalo ange diiloo, de aduhale nogo hai hegau i de mee heohi, gu hai hegau ai nei bei de hine hai be se manu! De aduhale nogo hai hegau laa i de hagamodu heohi; de mee heohi nogo dagodo i kilaa, aagai iainei go de gau daa dangada e nnoho ai!

Nehemiah 11:1

Gai dagi o dangada ne nnoho laa i Jerusalem, gai de gau Israel ange laa ne dada denga laagau ga hilihili ai e dagidahi mai i e madaangahulu dangada gi nnoho i Jerusalem, de aduhale dabu, gai de gau ange laa gi nnoho i olaadeu aduhale.

Exodus 28:40

Gai koe ga llanga hogi hanu malo belee, ma hanu mee noonooa ungaalodo, aama hanu goobai moo denga dama daane a Aaron, e hagadubu ai gilaadeu ma de hagamahamaha.

Exodus 28:2

Gai koe ga hai hanu malo dabu moo doo daina go Aaron, ga hagadubu ai ma de hagamahamaha ai ia.

Revelation 19:14

Gai denga hagabuulingaa daane hebagi o de langi gu kahu i denga malo linen danuaa, gai e tea ma de gilimalali, gai gilaadeu e kage i honga denga hoosa tea ma e daudali ange ai i de ia.

Revelation 19:8

gai de Maadua gu hai ia gi gahu i linen danuaa, ma de malamalama aama de gilimalali.” Gai linen danuaa laa go heohi o dangada o de Maadua.

Ephesians 4:24

ga hakahu goodou i tangada hoou, ne hai laa ga bei de hagadulagi o de Maadua i de heohi abodonu laa aama de dabu.

Luke 15:22

Gai tamana ga hai ange gi ono dangada hai hegau, ‘Goodou hagamoolau gaamai de malo danuaa hakahu ina ange ai ia. Gai ulumagina ange de buulei gi dono lima aama mee vae gi luoono vae.

Haggai 2:4

Aagai koe gi lo taane, Zerubbabel, go Tagi Maolunga e hagadaba. Joshua, tama daane a Jehozadak, tangada haimeedabu maolunga, koe gi lo taane. Dangada alodahi o de henua, goodou gi lo taane, go Tagi Maolunga e hagadaba, goodou hagammahi hai hegau. Go hiidinga au madali goodou, go Tagi o denga hagabuulinga hebagi e hagadaba.

Ezekiel 44:9

Gai e hagadaba de Ia Aamua go Iahweh: E deai donu se dangada henua gee tigi tuu dagaholiage ono lodo ma dono angaanga e ulu i dogu mommee dabu, e deai donu hogi dangada henua gee e nnoho i magavaa o de gau Israel.

Romans 3:22

Gai de hagaheohi nei ne gaavange gi dangada alodahi i delaadeu hagadonu Iesu Klisdo. Gai e dee dagodo geegee donu dangada,

Daniel 10:9

Gai au ne langona dono leo e basa ai; de masavaa aagu e hagallongo ai ana muna, gai au gu daia mai donu sseni, gai luoogu mada gu i honga de gelegele.

Jeremiah 31:23

Gai e hagadaba Tagi o denga hagabuulinga hebagi, de Maadua o Israel: “De masavaa naa huu aagu e hagaahe ange ai delaadeu manuuia, gai dangada i de henua o Judah ma ono aduhale e aahe ange naa ga tala muna nei: ‘De mommee nei, Tagi Maolunga e hagamanuuia goe, de mommee nnoho iai de heohi, ma tuuduu dabu!’

Isaiah 61:3

ma de gaavange gi gilaadeu e hinangalosaa i Zion de hau mahamaha e sui ai lehu, ma de lolo o de malangilangi, e sui ai de hinangalosaa olaadeu lodo, ma de hakahu gilaadeu i de tuhi, e sui ai teai selaadeu tali. Gai gilaadeu e hagaingoo ange naa go denga oak o de heohi, a Tagi Maolunga ne doo laa e hagaago mai ai dono mahamaha.

Isaiah 1:26

Au e hagaahe adu naa oo dangada hagamodu bei de masavaa i mua, gai oo dangada hagasaele gi bei taamada age. Muli mai naa huu gai koe e hagaingoo ange go de Aduhale Heohi ma de Aduhale e Hai Hegau i de Mee Abodonu.”

Psalm 110:3

Oo dangada e malangilangi naa i de daudali adu i de masavaa o de hebagi, i honga de mounga dabu. Gai oo daane e loomai naa gi oo daha bei dagodo o de mee suungia i taiao.

Ephesians 5:14

go hiidinga mee alodahi gu hagaago mai i de maalama gu gidee. Deenei ai, gu tala e hai ange, “Tangada goi seni, alahage, gai mouli age mai i de magau, gai Klisdo ga hagamaalama goe.”

Revelation 11:2

Gai koe aude haidea lo te buibui laa daha o de temple; dugua donu huu, go hiidinga gu dugu ange gi denga huaahenua, gai gilaadeu e hagadee kii naa ga kave de aduhale dabu laa i e madahaa ma lua malama.

1 Chronicles 16:29

Goodou daalaa dagodo de mahamaha o de ingoo o Tagi Maolunga. Goodou gaamai dahi sigidaumaha loomai ai gi mada luoono mada. Daumaha ange gi Tagi Maolunga i de mahamaha o dono dabu.

Isaiah 4:3

Gai tangada e doe i Zion ma de noho i Jerusalem e hagabinga naa bolo e dabu, go dangada alodahi gu daohi olaadeu ingoo bolo e mouli i Jerusalem.

Isaiah 49:18

Dangage age ma gi diiloo; au dama alodahi gu hagabuni mai gi oo daha. Au e hagatoo donu i dogu mouli, go Tagi Maolunga e hagadaba, “Koe e hai naa gilaadeu alodahi bei mee hagalaagii aau e dau laa; koe e dau naa gilaadeu bei mee hagalaagii o de hine gu dai hai bodu.

Isaiah 64:10

Oo aduhale dabu gu hai ma gu se vao, Zion gu bei hogi dagodo o dahi lodo henua, gai Jerusalem gu ngadi dagodo.

Joel 3:17

“Gai goodou e iloo naa, bolo go au donu go Iahweh doodou Maadua, e noho laa i Zion, dogu mounga dabu. Jerusalem e hai naa gi dabu; gai de gau henua gee e dee aahe ange donu e kage mai gi honga de henua.

Isaiah 60:1

⌊Jerusalem,⌋ hidi age, haia gi maalama goe, gu dae mai doo maalama, gai de mahamaha o Tagi Maolunga ga hagamaalama goe.