Isaiah 45:12 - De Beebaa Dabu

¹² Go au donu ne haia henua i lalo, ga hagadau dangada e nnoho ai. Go luoogu lima ne hoolaa de langi, ma de tala ange gi mee i lo te langi alaadeu mee e hai.

Isaiah 45:12 Referans Kwoze

Jeremiah 27:5

Go au ne haalo ina dogu lima sauaa, ga hai ai henua i lalo, ma ono dangada aama manu dolodolo e nnoho ai, gai go au hogi ne gaavange mee nei gi tangada aagu e lodo e vange aagena.

Isaiah 44:24

E hagadaba Tagi Maolunga, doo Ia Hagaola, ne haia goe i de mommee o denga dama: “Go au donu Tagi Maolunga, ne haia laa mee alodahi, go au ne hoolaa de langi, go au donu huu ne doohaa henua i lalo.

Isaiah 42:5

Aanei muna a de Maadua, Tagi Maolunga e tala, go de ia ne hagadau ina de langi ga doha gi daha, gai go ia ne hoolaa henua i lalo ma mee alodahi ne loomai ai, ma de hai gi manavanava dangada e nnoho ai, ma de gaavange de manava o de mouli gi dangada i kilaa:

Nehemiah 9:6

Go koe donu huu go Tagi Maolunga. Go koe ne haia denga langi, ma de langi maolunga hugadoo, ma denga hagabuulinga iai, ma henua i lalo ma mee alodahi iai, ma denga dai ma mee alodahi iai. Go koe e gaavange gi gilaadeu alodahi de mouli, gai mee o de langi e ino adu gi de goe.

Genesis 2:1

Gai de langi ma henua i lalo ma mee alodahi iai gu lava i de hai.

Jeremiah 32:17

Dogu Ia Aamua go Iahweh, koe ne hai de langi ma henua i lalo i doo sauaa laumalie ma doo lima mmahi. Gai e deai donu se mee daudahi e hai ngadaa adu gi de goe.

Isaiah 45:18

Gai e hagadaba Tagi Maolunga, go de ia ne haia de langi, go ia donu go de Maadua, gai go ia ne hagadulagi henua i lalo ga hai gu dahi, gai ia tee hagaduu henua i lalo gi se ngadi mommee, aagai ne hagaduu gi nnoho ai dangada — ia ne hagadaba: “Go au donu go Iahweh, e deai ange donu.

Hebrews 11:3

Go de gai adaadeu ne maua ai i de tonu ange, bolo de langi ma henua i lalo ne hai i muna a de Maadua ne tala, gai mee adaadeu e gidee ne hai i mee e dee gidee laa.

Isaiah 40:28

E aha, goodou tigi iloo naa donu? Goodou tigi langona naa donu? Tagi Maolunga de Maadua, e deai sono daamada be se hagaodi, go ia ne haia henua i lalo alodahi. Ia e dee dalea donu aabe e deai ono mahi, gai e deai donu se dangada e daea dono donu ange.

Zechariah 12:1

Muna hagadaemaha a Tagi Maolunga i dagodo o Israel. E hagadaba Tagi Maolunga, go de ia ne hoolaa laa de langi ma de hai henua i lalo, gai go de ia ne haia de hagasaalunga o tangada:

Isaiah 40:22

Ia e noho i honga de moana e holiagina laa henua i lalo, gai dangada e nnoho i kilaa e bei dagodo o denga itebuubuu. Ia e hhola gi madoha de langi bei dagodo o de hale malo, ma de doha mee nei bei dagodo o de hale malo e nnoho ai dangada.

Isaiah 40:12

Goai gu hagabaulia denga vai i lo tono lima, aabe go de maaga de lahalaha o lo te langi? Gai goai gu daohia denga gelegele o henua i lalo i lo te gede, aabe go de hagahidi denga mounga i denga mee hagahidi, ma de hagahidi denga duuduu?

Psalm 102:25

Koe ne hagadagodo tagelo o henua i lalo i taamada age, gai de langi go koe ne haia i luoo lima.

Deuteronomy 4:32

Goodou siilia dagodo o mee gu hai i laangi gu hulo, i mua doodou masavaa, ma mai i de laangi a de Maadua ne hai ai tangada i henua i lalo; goodou ga ssili gi iloo e goodou mai i dahi bido o de langi ga dae ai gi de bido ange laa. Be gu hanu laa mee hagalele mouli bee nei gu hai, aabe gu hanu nei mee bee nei a dangada gu langona?

Ezra 1:2

“E hagadaba Cyrus, de hodooligi o Persia: Tagi Maolunga, de Maadua o de langi, gu gaamai gi de au denga nohoanga hodooligi o henua i lalo alodahi, gai ia gu tala mai au gi hagaduulia age dono hale i Jerusalem i Judah.

De Beebaa go Job 37:18

Koe e maua i de doha gi madoha lo te langi madali ia, ma de hai gi makaga bei de galaasa dilodilo?

Psalm 104:2

Ia e gahu i de maalama bei de malo; ia e doha de langi bei de hale malo,

Isaiah 37:16

“Tagi o denga hagabuulinga hebagi, de Maadua o Israel e noho laa i magavaa luu cherubim, go koe donu huu de Maadua o denga nohoanga hodooligi alodahi i henua i lalo; go koe ne haia de langi ma henua i lalo.

Isaiah 48:13

Go luoogu lima ne haia henua i lalo, gai dogu lima madau ne hhola de langi; de masavaa aagu ne hagahi ai luu mee nei, gai gilaau ga tuu age i ogu mada i mua.

Isaiah 51:13

E aha, koe gu ngalo laa bolo go Tagi Maolunga ne haia goe, go de ia ne hoolaa gi daha de langi, ma de hagatuu dagelo o henua i lalo, gai koe ga noho ai naa ga madagu i laangi alodahi i hiidinga de bole o tangada e vaivai haia dangada, go de ia e noho laa e oohaa mee? Gai i hee iai de lili o de ia e vaivai haia dangada?

Isaiah 40:26

Dangage age galo age gi lo te langi: goai ne haia mee nei alodahi? Go de ia ne haia denga hagabuulingaa heduu, ga gaavange olaadeu ingoo. Gai go dono sauaa laumalie ma ono mmahi ne hai mee nei, teai donu se gilaadeu ne dee maleva.