Isaiah 44:13 - De Beebaa Dabu

¹³ De labagau e haide i dahi uga ma de maaga i de mee maaga; gai ia ga salu de laagau laa i denga mee salu ma de maaga i denga compass. Ia e hagahua gi bei hoolinga o tangada, ga hai gi mahamaha bei tangada, gi maua ai i de hagaduu i lo te hale.

Isaiah 44:13 Referans Kwoze

Romans 1:23

gilaadeu gu sui de daumaha ange gi de Maadua e deai laa se magau, gai ga daumaha ange gi denga diinonga e hagadulagi ange laa gi dagodo o dangada e maakau laa, ma denga manu llele, ma manu dolodolo aama manu e tolo laa i honga de gelegele.

Acts 17:29

Deenei ai, go hiidinga gidaadeu go hagadiilinga o de Maadua, gidaadeu gi dee hagataba bolo de Ia Dabu laa e bei dagodo goolo ma selevaa, aabe go hadu — se mee ne hagahua ma de hai i de labagau o tangada.

Ezekiel 8:12

Aagai ia ne ssili mai gi de au, “Tama a tangada, koe e gidee naa mee a dagi o de gau Israel e hai i lo te gohu, dahi ma dahi e hano gi de aabi iai ada o ono diinonga? Gai gilaadeu e hagataba, ‘Tagi Maolunga e dee gidee donu gidaadeu; Tagi Maolunga gu tili de henua.’ ”

Isaiah 41:7

Dahi labagau e hagammahi ange de labagau o denga goolo, gai tangada e haia gi soe ina i de haamaa e hagammahi ange naa tangada e dugidugia. Ia e hagadaba i dagodo o de mee hagapigi, “Gu danuaa.” Gai gilaadeu ga tugi gi makaga dahi diinonga gi dee ngalungalue ai.

Judges 18:24

Gai ia ga hai ange, “Goodou ne kave denga diinonga aagu ne hai, ma dogu dangada haimeedabu ga hulo ai. Gai ni aha naa donu e doe i ogu daha? Gai gu aha goodou gu ssili mai ai nei, ‘Gu aha naa goe?’ ”

Deuteronomy 27:15

“E malaia tangada e hai dahi diinonga i laagau aabe ni baalanga hagavaivai — de mee nei se mee niio Tagi Maolunga e kino ai, se mee ne hai i luu lima o de labagau — gai ne hagaduu i de mommee e dee gidee.” Gai dangada alodahi gi hai ange, “Amen!”

Deuteronomy 4:28

Gai goodou ga daumaha ange ai naa gi denga diinonga laagau ma hadu, go mee e hagatuu i lima o dangada, gai e dee maua gi gidee dahi mee, be go de hagallongo, be go de gaimee, aabe go de hagadungu dahi mee.

Genesis 35:2

Gai Jacob ne hai ange gi dono huaabodu, ma dangada alodahi madali ia, “Goodou dilia denga diinonga i oodou daha naa, ma de hagagilimalali goodou ga sui oodou malo.

Genesis 31:32

Aagai noo koe e gidee oo diinonga i daho dahi dangada, gai tangada laa e daa donu gi magau. Gai koe saalaa gi gidee i madamada o odaau dangada be e hanu au mee e gidee i ogu daha, gai koe ga kave.” Gai Jacob tee iloo donu bolo go Rachel ne gaiaadia denga diinonga laa.

Genesis 31:30

Koe ne hano gee i hiidinga koe gu buliaamoou i dangada i doo huaabodu, aagai gu aha goe gu gaiaa ai laa ogu diinonga?”

Genesis 31:19

De masavaa o Laban ne hano ai e duuduu huluhulu o ana ssiibi, gai Rachel ne gaiaa denga diinonga a de huaabodu o dono damana.

Isaiah 44:14

Ia e sele iho denga cedar, be ia e hili dahi cypress aabe se oak. Gai ia ga dugu gi somo gi madua i magavaa o denga manu i lodo mee muimui, aabe ia e doo dahi pine gai de langi ga hagamaluulu.

Ezekiel 8:10

Gai au ne ulu ga tilo, gai au ne gidee denga hagadaagangaa manu e tolo laa e maaga ange gi de baasi o de hale, ma denga manu dolodolo hakino gee, aama denga diinonga alodahi o de gau Israel.

Ezekiel 8:11

Gai e dinohidu dagi o de gau Israel e tuu i olaadeu mada i mua, gai dahi ma dahi e poo dana mee dudu mee maanongi. Gai Jaazaniah, tama daane a Shaphan e duu i olaadeu magavaa, gai de useahi o alaadeu mee maanongi e buu age.