Isaiah 43:6 - De Beebaa Dabu

⁶ Au e hai ange naa gi denga henua i ngaiho, ‘Dugu gilaadeu gi loomai!’ Au e hai ange naa gi henua i ngaage, ‘Goodou aude daohia gilaadeu.’ Hagaahea mai agu dama daane ma damaa hine mai i henua i lalo alodahi —

Isaiah 43:6 Referans Kwoze

Jeremiah 3:14

Goodou aahe mai, denga dama gu daahuli gee i de au, go Tagi Maolunga e hagadaba. Go au doodou dangada aamua; au e kave naa hanu goodou — e dahi mai i dahi aduhale gai e dogolua mai i dahi huaabodu — gai au e hagaahe mai naa goodou gi Zion.

Isaiah 18:7

De masavaa laa gai denga mee ngadi gaavange e gaamai naa gi Tagi o denga hagabuulinga hebagi mai i daho de gau lloa ma de malali olaadeu angaanga, ma mai i daho de gau hagamaatagu i henua mmao ma de paa mai, go de huaahenua mmahi ma de hagadee kii ina denga henua, gai delaadeu henua e vaevae i denga saalingaa vai — gilaadeu e loomai naa gi de mounga go Zion, go de mommee iai laa de ingoo o Tagi o denga hagabuulinga hebagi.

Psalm 107:3

ma gilaadeu aana gu hagaahe mai i denga henua gee, i dua ma dai, aama ngaiho ma ngaage.

Deuteronomy 30:4

Gai ga mmao naa donu de mommee oodou gu gaavee aagena i henua i lalo, gai Tagi Maolunga doodou Maadua e hagabuni naa goodou ga hagaahe mai.

Isaiah 45:22

Henua i lalo alodahi, daahuli mai gi de au, gi ola ai goodou; i hiidinga go au donu huu de Maadua, e deai ange donu.

Isaiah 49:12

Tilo, gilaadeu nei e loomai naa i mommee mmao — hanu mai i ngaiho, hanu mai i dai, gai hanu mai i Syene.”

Isaiah 49:22

E hagadaba de Ia Aamua go Iahweh, “Tilo, au e aloalohagi ange naa denga huaahenua, ma de hagaduu age dahi hagailonga gi gidee e denga huaadangada; gai gilaadeu e hagauda mai naa oodou dama i olaadeu aloalo, ma de saabai mai oodou damaa hine i honga olaadeu eu.

Isaiah 54:3

Gai koe e hagalahalaha naa gi de madau ma de masui, oo hagadiilinga e hagadee kii naa denga huaahenua, gai gilaadeu ga nnoho i lodo olaadeu aduhale gu ngadi daakodo laa.

Isaiah 60:4

Dangage age ma gi galogalo saele mage diiloo: gilaadeu alodahi gu hagabuni e loomai gi oo daha. Au dama daane e loomai naa i de mommee mmao, gai au damaa hine e saabai i honga dono dege.

Isaiah 60:9

Ni muna abodonu, denga henua i tagudai e tali hagalodolodo mai gi de au; denga vaga o Tarshish e loomai naa i mua, ma e gaamai au dama i mommee mmao, madali alaadeu selevaa ma goolo, e hagadubu ai de ingoo o Tagi Maolunga doo Maadua, go de Ia Dabu o Israel, go hiidinga ia gu hagamahamaha goe.

Isaiah 66:20

Gai gilaadeu e hagaahe mai naa oodou daina i denga huaahenua alodahi gi dogu mounga dabu, e hai ai ssigidaumaha ange gi Tagi Maolunga. Gilaadeu e loomai naa i honga denga hoosa ma hada hebagi, ma honga hada ange laa, ma honga denga donkey ma gamelo, bei de hai a de gau Israel e gaamai ai laa alaadeu sigidaumaha grain i lodo gumedi gilimalali gi de hale o Tagi Maolunga, go Tagi Maolunga e hagadaba.

Jeremiah 23:8

aagai gilaadeu e hagataba naa, ‘Gimaadeu e hagatoo donu i de mouli o Tagi Maolunga, de ia ne hagassao ina mai denga aamuli o Israel i denga henua i ngaiho aama mai i henua alodahi aana ne kave gilaadeu gi nnoho ai.’ Gai gilaadeu e loomai naa ga nnoho i delaadeu henua donu.”

Jeremiah 29:14

E hagadaba Tagi Maolunga: Goodou e gidee naa donu au, gai au e hagaahe adu naa doodou manuuia. Au e hagabuni mai naa goodou i denga huaahenua alodahi, ma mommee aagu ne hai goodou gi mavaevae saele aagena, go Tagi Maolunga e hagadaba; au e hagaahe mai naa goodou gi de mommee aagu ne kave gee ai goodou gi denga henua gee.

Jeremiah 31:8

Tilo, au e hagaahe mai naa gilaadeu i henua i ngaiho, ma de hagabuni mai gilaadeu i luu bido o henua i lalo. E hanu naa hogi dangada dee kide ma de gau balagelage i olaadeu magavaa, ma denga haahine hai tama aama denga haahine gu hai olaadeu hagalangona; dahi hagabuulingaa dangada soa e aahe mai naa gi kinei.

Ezekiel 36:24

Au e hagaahe mai naa goodou i daho denga huaahenua; au e hagabuni mai naa goodou i denga henua alodahi, ga hagaahe mai gi doodou henua.

Ezekiel 37:21

gai koe ga hai ange gi gilaadeu, ‘E hagadaba de Ia Aamua go Iahweh: Tilo, au e hagaahe mai naa de gau Israel i denga huaahenua olaadeu gu hulo laa aagena. Au e hagabuni mai naa gilaadeu i mommee alodahi, ga hagaahe mai gilaadeu gi delaadeu henua donu.

Joel 3:7

Tilo, au e hagaahe mai naa gilaadeu i de mommee oodou ne hagao ange gilaadeu aagena, gai au e sui adu naa oodou hegau gu hai.

Zechariah 6:6

De hada hebagi iai laa denga hoosa uli e hano naa gi denga henua i ngaiho, denga hoosa tea e hulo gi dai, gai denga hoosa daubulebule e hulo gi ngaage.”

Isaiah 11:12

Gai ia e hagaduu age naa dahi hagailonga ange gi denga huaahenua, ma de hagabuni mai de gau Israel i denga henua gee; ia e hagaahe mai naa dangada o Judah gu mavaevae saele laa gi denga dege e haa o henua i lalo.

Isaiah 27:13

De laangi laa gai dahi hanga manu laumalie e ili naa. Gai dangada gu dai maakau laa i Assyria ma gilaadeu gu noonoodia laa ma gu gaavee gi Egypt, e loomai naa ga daumaha ange gi Tagi Maolunga i honga de mounga dabu i Jerusalem.