Isaiah 41:15 - De Beebaa Dabu

¹⁵ Tilo, au e hai naa goe gi bei de baabaa duuduu grain, e hoou laa ma de kangi, gai e lagolago niho iai. Koe e duuduu naa denga mounga ga ulu iho, ma de hai denga duuduu gi bei denga gili grain.

Isaiah 41:15 Referans Kwoze

Micah 4:13

Tamaa hine o Zion, hiihidi age dagadagahia, go hiidinga au e hai naa oo hanga gi ni iron gai oo gubu vae gi ni bronze, gai koe ga oha ai gi maoha denga huaahenua soa. Koe e hagadabu ange naa olaadeu goloa gi Tagi Maolunga, gai olaadeu lava e gaavange gi de Ia Aamua o henua i lalo alodahi.

Zechariah 4:7

De mounga laumalie, go koe goai? Zerubbabel e hai naa goe ga bei de mommee e soe laa. Gai ia e gaamai naa tuludulu o de logunga, gai dangada e oo naa ga hagataba, ‘Ia gi hagamanuuia ina de hadu! Ia gi hagamanuuia ina de hadu!’ ”

Habakkuk 3:12

Koe ne seesee i henua i lalo alodahi i doo bole, gai koe ne dagadagahi denga huaahenua i doo lili.

Isaiah 21:10

Ogu dangada gu dagadagahia ma de nonu i de mommee hili huamanu, au e hagailoo adu gi goodou agu muna gu langona mai i daho Tagi o denga hagabuulinga hebagi, de Maadua o Israel.

Isaiah 28:27

Denga dill e dee duuduu donu i de mee duuduu, denga cummin e dee hai dahi hada iai hagasii gi savini laa ono elunga, aagai denga dill e hagailiili i laa manu, gai denga cummin e hagailiili i dahi laagau.

Psalm 18:42

Au ne hagailiili gilaadeu gi lligi bei dagodo o de mama e ilihia laa i de madangi; au ne llingi gilaadeu gi daha bei dagodo o de bela i honga denga haiava.

Isaiah 17:13

Gai ga hagalongaa naa donu denga huaahenua bei de haganngolo o denga vai lagolago, aagai de Maadua e hagasee gilaadeu, gai gilaadeu e saavini naa ga hulo, bei denga gili grain i honga mounga, e ilihia laa i de madangi, ma de mama o de gelegele a de madangi e ili laa ga kave.

Isaiah 29:5

Aagai oo hagadaumee soa e bei naa mama o de gelegele, gai de gau daa dangada e loomai nei bei gili grain e ilihia laa ga gaavee gee. Gai e daa hagalele naa donu huu,

Isaiah 42:15

Au e ulu iho naa denga mounga ma duuduu, ma de hai gi mmae manu ssomo alodahi; au e hai naa denga saalingaa vai gi ni modu, ma de hai gi maamasa mommee iai vai.

Isaiah 64:1

Mee naa koe gi saea de langi ga iho mai gi lalo, gi ngalungaalue ai denga mounga i mada luoo mada!

Jeremiah 9:10

Au e dangi naa ma de dangi see i hiidinga o denga mounga, ma de dangi i hiidinga o mommee iai helii i lodo henua. Mommee laa gu ngadi daakodo ma teai dangada e seesee ai, gu dee langona hogi leo o denga manu haangai ai. Gai denga manu llele ma manu dolodolo gu hulo gee mai i kilaa.

Jeremiah 51:20

Go koe dagu haamaa ma dagu laagau hebagi — go koe e balea mai au e oha ai denga huaahenua, go koe e balea mai au e oha ai denga nohoanga hodooligi,

Jeremiah 51:33

Gai e hagadaba Tagi o denga hagabuulinga hebagi, de Maadua o Israel: “Tamaa hine o Babylon e bei de mommee hili huamanu, i de masavaa oona e dagadagahia ai; dono masavaa e hagihagi ai gu dai dae mai donu.”

Ezekiel 33:28

Gai au e hai naa de henua gi se mommee e ngadi dagodo, gai ono mahi aana e tuhi ai laa ia e hai naa ga deai, gai denga mounga o Israel e ngadi daakodo naa; gu deai dangada e hulo gi kilaa.

Daniel 2:35

Denga iron ma gelegele pigi, ma bronze, ma selevaa, aama goolo laa ne maoha i de masavaa daudahi, gai mee laa gu bei gili grain, i de mommee hili huamanu i de masavaa mahanahana, gai de madangi ne ili mee laa gu dee maaleva. Gai de hadu ne doo iho laa ga tugi de mee e bei laa hoolinga o tangada, ne somo ga se mounga laumalie, ga hhao ai henua i lalo alodahi.

Micah 5:8

Gai dangada o Jacob e doe e nnoho laa i magavaa o denga huaadangada soa, e bei de laiono i magavaa o denga manu lodo henua, ma de laiono mmahi i magavaa o denga hagabuulingaa ssiibi, e hagalagolagohia laa ma de hangahanga ina mee i honga dono haiava, gai e deai naa donu se dangada e maua i de hagaola.

Joshua 17:18

aagai de mommee iai mounga e gaavadu donu gi goodou. Se lodo henua donu iainei, gai goodou hulo hagamalaelae ina kilaa alodahi ga kave moodou; gai goodou ga hai ai gi hulo gee de gau Canaan e nnoho i kilaa, e dee galemu donu de hanu olaadeu hada baalanga aama delaadeu mmahi.”

Judges 6:16

Gai Tagi Maolunga ga hai ange gi de ia, “Au e noho naa donu madali goe, gai koe ga hagadee kii ai de gau Midian alodahi, bei dau hai e hagadee kii ai laa dahi dangada daudahi.”

De Beebaa go Job 41:30

Lalo dono dinae e kangi bei denga dalaa hadu, gai ia e hai gi keli honga de bela bei de mee duuduu wheat.