Isaiah 35:6 - De Beebaa Dabu

⁶ Gai de gau balagelage e ssobo naa ga llele bei dahi dia, gai tangada lau de alelo e daahili i de malangilangi. Denga vai e ssali age naa i lodo henua, gai e hanu naa saalingaa vai i de vao.

Isaiah 35:6 Referans Kwoze

Luke 11:14

Iesu ne hai gi hano gee dahi hagasaalunga baubau, mai i daho dahi dangada e dee maua laa i de basa; gai ga hano gee huu de hagasaalunga baubau laa i ono daha, gai taane laa gu maua i de basa. Gai dangada gu llele mouli,

Isaiah 32:4

Gai maanadu a tangada e moolau ono lodo e donu ange naa, tangada e lau dono alelo e tala ana muna ga tonu ange dangada aagena.

Matthew 12:22

Dangada ne gaamai hogi gi Iesu dahi dangada dee gide ma de lau de alelo, go hiidinga de hagasaalunga baubau e noho i ono daha; gai Iesu ga hagaieiangi ia, gai taane laa gu basa ma de gidee.

Psalm 51:15

Dogu Ia Aamua, huugea dogu ngudu, gai au ga tuhi ai goe.

Revelation 22:17

Gai de Hagasaalunga ⌊Dabu⌋ ma de Hine gu dai hagahai bodu laa e hagataba, “Loomai.” Tangada e langona muna nei gi hagadaba, “Loomai.” Gai tangada e hieunu gi humai gi unu, gai tangada e lodo gi unumia vai o de mouli e dee hagao laa.

Revelation 22:1

Gai tangada de langi laa ne hagaago mai gi de au ssaalingaa vai o de mouli, e masalaba laa bei de crystal, gai e sali mai i de nohoanga o de Maadua ma Ssiibi Gauligi,

Colossians 3:16

Gai haia gi honu abodonu muna a Klisdo i oodou lodo, gai goodou ga hagadau agoago ai ma de hagadau hagakana ange ai goodou i de heiangi alodahi, ma de daahili i denga psalm ma denga daahili daumaha, ma daahili o de baasi gi de hagasaalunga, i doodou hagaahe ange de abodonu gi de Maadua i oodou lodo.

Acts 8:7

Gai denga hagasaalunga baubau ne oo ma de ssao ga hulo gee mai i daho dangada soa; ne soa hogi de gau balagelage ma de gau baagia ne ieiangi.

Acts 3:2

Gai e dahi daane ne balagelage mai i dono haanau gu sabaia mai ma gu hagadagodo i gaogao de haitoga o de temple i laangi alodahi. Deenei de haitoga e hagaingoo ange laa bolo go de Haitoga Mahamaha. Gai ia e noho ma e dangidangi i mee ngadi gaavange mai i daho dangada e ulu laa i de temple.

Luke 1:64

De masavaa laa donu huu gai de alelo o Zechariah gu dee lau, gai ia gu maua i de basa ga tuhi de Maadua.

Matthew 21:14

Gai de gau dee kide ma de gau balagelage ne loomai gi ono daha i lo te buibui o de temple, gai ia ga hagaieiangi gilaadeu.

Matthew 11:5

de gau dee kide gu gidee, de gau balagelage gu seesee, de gau mmagi lebelaa gu gilimalali, de gau longoduli gu langona, de gau maakau gu mouli age, gai de longo danuaa gu tala ange gi de gau hagaau aloha.

Zechariah 14:8

De laangi laa gai de vai mouli e ssali mai naa i Jerusalem. Hanu e ssali ga hulo gi tai i baasi i dua, gai hanu e ssali ga hulo gi tai i baasi i dai, i de masavaa hagamahana ma de masavaa hagamagalili.

Isaiah 48:21

Gilaadeu tee hieunu i de masavaa olaadeu ne hulo saele ai i de vao; ia ne hai denga vai gi ssali mai lo te baba; ia ne hhanga de baba gai denga vai gu ssali mai ai.

Isaiah 35:1

De vao ma de gelegele e deai vai iai e lodo danuaa naa, gai lodo henua e malangilangi naa ma de aala ai denga huamanu bei de crocus,

Psalm 46:4

E dahi saalingaa vai e sali mai ma e hagamalangilangi de aduhale o de Maadua, go de mommee dabu e noho ai laa de Ia Maolunga Mmao laa.

Nehemiah 9:15

Koe ne gaavange gi gilaadeu pelaoaa mai i de langi i delaadeu hiikai, ma vai mai i lo te hadu i delaadeu hieunu, gai koe ne hai ange gilaadeu gi hulo gi gaavee de henua aau gu hagatoo donu ange gi gilaadeu.

Numbers 20:11

Gai Moses ne hagaabo togo ga hagaili ai de hadu laa i e lua hanonga. Gai gu ssali mai vai lagolago, gai de hagabuulingaa dangada laa ma alaadeu manu ga unu ai.

Exodus 17:6

Tilo, au e hano naa e duu i honga de baba i Horeb i oodou mada i mua; gai koe ga hai doo dogo ga hagaili ai de baba, gai denga vai e ssali mai naa i lo te baba e unu ai dangada.” Gai Moses ga hai mee nei i madamada o dagi o de gau Israel.

Isaiah 30:25

De laangi naa huu o de hebagi e daia ai laa dangada soa, ma de maoha ai de hale dagitilo maolunga, gai honga denga mounga ma duuduu maolunga iai naa denga mommee e ssali ai vai.

Isaiah 32:2

Gai dahi ma dahi e bei naa de mommee e buibui ai dangada i de ssau de madangi, gai e bei denga saalingaa vai i de vao, e bei de malu i lalo dahi hadu laumalie i de henua e deai manu e ssomo ai.

Isaiah 33:23

Denga uga o saiolo gu daudau age, de bou e dee hagamakaga, gai ssaiolo tigi hagaduu e doha. Gai denga goloa lagolago ne maua i de hebagi e duha naa; tangada balagelage e kave naa hogi goloa aana ne gaiaa.

Isaiah 42:11

Lodo henua ma ono aduhale gi daahili, gai denga aduhale vaaligiligi o de gau Kedar e nnoho ai gi malangilangi. Dangada o Sela gi daahili i delaadeu lodo danuaa, gilaadeu gi hevaalogi i ulu denga mounga.

Isaiah 51:3

Tagi Maolunga e hagaaneane naa donu Zion, ma de lodo aloha ange gi ono mommee alodahi gu oohaa laa; ia e hai naa ono vao gi bei Eden, gai ono lodo henua gi bei de veelenga a Tagi Maolunga. De malangilangi ma de lodo danuaa e dagodo naa i kilaa, aama de hagaahe ange de abodonu ma de leo o taahili.

Joel 3:18

De laangi laa gai e hai naa tau uvaini i honga denga mounga, gai e lagolago naa vai uu i honga denga duuduu; denga saalingaa vai alodahi o Judah nogo deai vai iai e ssali ai naa vai. Gai dahi vai e sali mai naa i de hale o Tagi Maolunga, ga hagamaluulu de geelonga o Shittim.

Malachi 4:2

Aagai dagodo o oodou dangada e hagadubu ina laa dogu ingoo: de laa o de heohi e sobo age naa ma ono gavegave e hagaieiangi ina laa dangada. Gai goodou e ssao naa ga hulo i de malangilangi, bei denga kaau gauligi gu hagassao mai laa i lo te buibui.

Psalm 107:35

Ia e hai de vao gi se mommee iai denga vai, gai de gelegele mmasa gi se mommee iai denga saalingaa vai.

Isaiah 44:3

Au e llingi ange naa denga vai gi honga de henua e deai vai iai, ma de hai gi hanu saalingaa vai i honga de gelegele mmasa; au e gave iho naa dogu Hagasaalunga gi honga doo hagadiilinga, ma de hagamanuuia oo aamuli.