Isaiah 27:13 - De Beebaa Dabu

¹³ De laangi laa gai dahi hanga manu laumalie e ili naa. Gai dangada gu dai maakau laa i Assyria ma gilaadeu gu noonoodia laa ma gu gaavee gi Egypt, e loomai naa ga daumaha ange gi Tagi Maolunga i honga de mounga dabu i Jerusalem.

Isaiah 27:13 Referans Kwoze

Matthew 24:31

Gai ia e hai naa gi hulo ana dangada de langi i de ili o de trumpet, gai gilaadeu e hagabuni mai naa ana dangada gu hili i denga madangi e haa, ma mai i dahi bido o de langi ga hano ai gi de bido ange laa.

Leviticus 25:9

Gai goodou ga ili de hanga manu i de madaangahulu laangi o de hidu malama; de Laangi o de Tala Haisala, gai goodou ga ili de hanga manu i honga de henua alodahi.

Hebrews 12:22

Aagai goodou gu loomai gi de mounga go Zion ma de aduhale o de Maadua e mouli laa, go Jerusalem i de langi, ma de hagabuulinga soa o de gau de langi e hagabuni laa ma de malangilangi,

Luke 4:18

“De Hagasaalunga o Tagi Maolunga e noho i ogu daha, go hiidinga ia gu hagadabu au gi agoagona ange de longo danuaa gi de gau hagaau aloha. Ia ne hai au gi humai gi hagassao ina mai gilaadeu i lo te hale pono, ma de hai gi kide gilaadeu e dee kide, ma de hagailaage gilaadeu e vaivai haia,

Zechariah 14:16

Gai dangada ne ola mai i denga huaahenua alodahi ne hebagi ange laa gi Jerusalem, e loomai naa i ngadau alodahi ga daumaha ange gi de Hodooligi, go Tagi o denga hagabuulinga hebagi, ma de hai Taonga o denga Baasi Hale.

Isaiah 11:16

Gai e dahi naa haiava laumalie ange gi ono dangada e doe, e aahe mai ai i Assyria, bei de hai o de gau Israel ne loomai ai laa i Egypt.

1 Chronicles 15:24

Shebaniah, ma Joshaphat, ma Nethanel, ma Amasai, ma Zechariah, ma Benaiah, aama Eliezer, de gau haimeedabu, gi ilihia denga trumpet i mada i mua o de ngavesi a de Maadua. Gai Obed-Edom ma Jehiah gi hagaloosia de ngavesi a de Maadua.

Revelation 10:7

Aagai laangi naa huu a togohidu dangada de langi e ili ai dana trumpet, gai mee a de Maadua e dee iloo laa e hagassula donu, bei dana hai gu hagaago ange ai gi ono dangada hai hegau go denga pelaabisi.”

Revelation 9:14

ga hai ange gi togoono dangada de langi ne ilihia laa de trumpet, “Daalaa mee noonoa o denga dangada de langi dogohaa e noonoa laa i ssaalingaa vai laumalie go Euphrates.”

Revelation 8:6

De masavaa laa gai denga dangada de langi dogohidu e tuu laa ma alaadeu trumpet ne hagadabena e ili denga trumpet laa.

Revelation 8:2

Gai au ne gidee denga dangada de langi dogohidu e tuu laa i mada luu mada o de Maadua, gai gu gaavange gi gilaadeu e hidu trumpet.

1 Thessalonians 4:16

Gai Tagi Maolunga e hano iho naa donu i de langi ma de oo i de leo mmahi, madali de leo o tangada de langi maolunga aama de ili o de trumpet a de Maadua. Gai de gau maakau ne hagadonusia laa e mouli age naa i mua.

Romans 10:18

Aagai au e ssili adu: E aha, gilaadeu tigi langona laa donu? Uaa, gilaadeu gu langona donu, go hiidinga gu sisi e hai ange, “Olaadeu leo gu hulo ma gu tae gi henua i lalo alodahi, gai alaadeu muna gu tae gi luu bido o henua i lalo.”

Malachi 1:11

Dogu ingoo e hagaamua naa i denga huaahenua alodahi, mai i de sobo age o de laa ga dae ai gi de danu. Sigidaumaha o mee maanongi ma denga sigidaumaha gilimalali e gaamai naa gi de au i mommee alodahi, go hiidinga dogu ingoo e hagaamua naa i denga huaahenua, go Tagi o denga hagabuulinga hebagi e hagadaba.

Hosea 11:11

Gilaadeu e bolebole naa ga loomai ai bei denga manu llele mai i Egypt ma denga manu kono mai i de henua go Assyria. Gai au e hagaahe mai naa gilaadeu gi delaadeu mommee,” go Tagi Maolunga e hagadaba.

Hosea 9:3

Gilaadeu e dee nnoho naa donu i de henua o Tagi Maolunga; Ephraim e ahe naa gi Egypt, ma de gai mee dee gilimalali i Assyria.

Hosea 8:13

Gilaadeu e hai denga sigidaumaha mai gi de au, ma de gai kano o manu e hai ai; aagai Tagi Maolunga e dee malangilangi i gilaadeu. Gai ia e dee ngalo naa donu olaadeu baubau, ma de hagaduasala gilaadeu i hiidinga olaadeu haisala; gilaadeu e aahe naa ga hulo gi Egypt.

Jeremiah 44:28

Dangada e dee maakau laa i de gadilaasa ga aahe mai i Egypt gi de henua o Judah, e sogoisi naa donu. Gai dangada o Judah e doe ne hulo laa ga nnoho i de henua go Egypt, e iloo naa be go agu muna aabe go alaadeu muna e hagassula.

Jeremiah 43:7

Gai gilaadeu ne hulo gi de henua go Egypt; gilaadeu tee hagallongo ange gi muna a Tagi Maolunga, gai gilaadeu ne hulo ga tae gi Tahpanhes.

Isaiah 66:18

Gai au e iloo dagodo o alaadeu hegau ma maanadu i olaadeu lodo; gai e dae mai naa de masavaa e hagabuni mai ai denga huaahenua alodahi ma dangada e pasa i muna henua gee. Gai gilaadeu e loomai naa ga gidee dogu mahamaha.

Isaiah 56:8

Gai de Ia Aamua go Iahweh e hagadaba, go de ia e hagabuni ina mai de gau Israel gu i denga henua gee: “Au e hagabuni mai naa hogi de gau ange laa, gi daho olaadeu aagu gu lava laa i de hagabuni mai.”

Isaiah 25:6

Gai Tagi o denga hagabuulinga hebagi e hagadabena naa i honga de mounga nei dahi daonga i gai mammami ange gi denga huaadangada alodahi, se daonga e hai i uvaini gu doange i ngadau lagolago — ma giidagi moomuna ma uvaini danuaa hugadoo.

Isaiah 19:21

Gai Tagi Maolunga e hai naa gi iloo e de gau Egypt ono dagodo, gai gilaadeu e iloo naa Tagi Maolunga i de laangi laa. Gilaadeu e daumaha naa ma de hai denga sigidaumaha dudu ma sigidaumaha o grain; gilaadeu e hagatoo donu ange naa gi Tagi Maolunga ma de hagassula alaadeu hagatoo donu.

Isaiah 18:3

Goodou dangada alodahi o henua i lalo, go dangada e nnoho i honga de henua, de masavaa naa huu e hagaduu age ai de hagailonga i honga de mounga, gai goodou gu gidee, gai de masavaa naa huu e ili ai de hanga manu, gai goodou gu langona.

Isaiah 11:12

Gai ia e hagaduu age naa dahi hagailonga ange gi denga huaahenua, ma de hagabuni mai de gau Israel i denga henua gee; ia e hagaahe mai naa dangada o Judah gu mavaevae saele laa gi denga dege e haa o henua i lalo.

Isaiah 2:11

Tangada lodo maolunga e hagamaolalo ina naa, gai de gau hagamaolunga e hai naa ga maolalo, gai go Tagi Maolunga donu huu e hagaamua i de laangi laa.

Isaiah 2:3

gai dangada soa e loomai naa, ga hagataba: “Loomai, gidaadeu ga loage gi de mounga o Tagi Maolunga ma de hale o de Maadua o Jacob; gai ia e agoago mai naa gidaadeu i ono haiava gai gidaadeu ga seesee ai i ono haiava.” Gai de hainga e gaamai naa i Zion, gai muna a Tagi Maolunga e loomai naa i Jerusalem.

Psalm 89:15

Tagi Maolunga, e manuuia gilaadeu gu iloo de hevaalogi ga tuhi goe, ma gilaadeu e seesee i de maalama i mada luoo mada.

Psalm 81:3

Ilihia de hanga manu i taonga o de duu de maasina i dai, ma de honu de maasina, ma de laangi o taadeu daonga.

Psalm 47:5

De Maadua gu gage age, gai dangada e hevaalogi! Tagi Maolunga gu gage age, gai gu ili denga hanga manu.

2 Kings 17:6

Gai ssiva ngadau huu o Hoshea, gai de hodooligi o Assyria ga hagadee kii Samaria, ga kave de gau Israel gi Assyria, ga dugu gilaadeu i Halah ma Gozan i gaogao ssaalingaa vai go Habor, aama lodo aduhale o de gau Media.

Isaiah 2:2

Denga laangi hagaodi naa huu gai de mounga o de hale o Tagi Maolunga e hai naa ga maolunga ange i denga mounga hugadoo, ma de maolunga ange i denga duuduu. Gai denga huaahenua alodahi e daga mai naa gi kilaa,

Isaiah 19:22

Gai Tagi Maolunga e gaamai naa dahi mee hagamaakau gi Egypt; ia e hagammae naa gilaadeu ga lava ga hagaieiangi gilaadeu. Gai gilaadeu e aahe mai naa gi Tagi Maolunga, gai ia ga basa ange gi alaadeu dangidangi ga hagaieiangi gilaadeu.

Isaiah 49:7

E hagadaba Tagi Maolunga, de Ia Hagaola o Israel, gai go dono Ia Dabu, ange gi de ia e hagangadi mee ina ma de kino ai o denga huaahenua, ma ange gi tangada hai hegau o denga dagi: “Denga hodooligi e tuu age naa, i de masavaa alaadeu e gidee ai goe, denga dagi o de henua e ino naa gi lalo, i delaadeu gidee goe, go hiidinga Tagi Maolunga, go de ia e hai hegau i de muna abodonu, gai go de Ia Hagaola ma de Ia Dabu ma o Israel, ne hilihilia goe.”

Isaiah 66:23

Mai i de duu o de maasina i dai ga dae ai gi de ahe ange ga duu, ma mai i dahi Sabbath ga dae ai gi dahi Sabbath, gai dangada alodahi e loomai naa ga daumaha mai gi de au, go Tagi Maolunga e hagadaba.

Ezekiel 20:34

Gai au e hagaahe mai naa goodou i daho dangada ma henua oodou gu mavaevae saele laa aagena, i dagu haalo dogu lima mmahi i dogu bole.

Ezekiel 20:41

Gai au e malangilangi naa i goodou bei dogu malangilangi i ssigidaumaha nnamu kala, i dagu masavaa e hagaahe mai ai goodou i daho dangada ma henua oodou gu mavaevae saele laa aagena, gai au e hai naa gi iloo e denga huaahenua bolo au e dabu i oodou hiidinga.

Ezekiel 39:25

Deenei ai, e hagadaba de Ia Aamua go Iahweh: Au e hagaahe ange naa de manuuia o de huaadangada o Jacob, ma de lodo aloha ange gi de huaadangada o Israel, gai au e lodo gaiaa naa i hiidinga o dogu ingoo dabu.

Daniel 11:45

Gai ia e hagatuu age naa ono hale malo danuaa i magavaa o tai ma de mounga mahamaha ma de dabu. Aagai ia e magau naa donu, gai e deai donu se dangada e balea ange ia.

Zechariah 8:7

E hagadaba Tagi o denga hagabuulinga hebagi: Tilo, au e hagaola naa ogu dangada mai i denga henua i dua ma henua i dai,

Isaiah 11:11

De laangi laa gai de Ia Aamua e hagaahe mai naa ono dangada e doe i ssauaa o dono lima, mai i Assyria, ma Egypt, ma Pathros, ma Ethiopia, ma Elam, ma Babylon, ma Hamath, aama mai i denga modu alodahi.

Isaiah 43:6

Au e hai ange naa gi denga henua i ngaiho, ‘Dugu gilaadeu gi loomai!’ Au e hai ange naa gi henua i ngaage, ‘Goodou aude daohia gilaadeu.’ Hagaahea mai agu dama daane ma damaa hine mai i henua i lalo alodahi —

Jeremiah 31:6

Gai e dahi naa laangi a de gau dagitilo e oo ai i honga mommee iai mounga o Ephraim, ga hagataba, ‘Loomai, gidaadeu ga loage gi Zion, gi daho Tagi Maolunga, taadeu Maadua.’ ”

Micah 7:14

Hagaloosia ange oo dangada i doo dogo, go de hagabuulingaa ssiibi o doo boolonga, go dangada e nnoho laa donu huu i gilaadeu i lodo henua, i de mommee iai de gelegele danuaa. Dugua denga manu gi gaimee saele i Bashan ma Gilead bei dagodo mee nogo hai madagidagi.