Isaiah 24:18 - De Beebaa Dabu

¹⁸ Be goai e savini ga hano i dana langona de dae mai o de mee hagamaatagu, e doo ange naa gi lo te geelonga; gai be goai e gage age i lo te geelonga, e doo ange naa gi lo te sele. Denga abaaba o de langi gu maahuge, gai denga dagelo o henua i lalo gu ngalungaalue.

Isaiah 24:18 Referans Kwoze

Psalm 18:7

Henua i lalo gu ngalungalue ma de bolebole; dagelo o denga mounga gu ngalungaalue, ma de bolebole i hiidinga ia gu lili.

Genesis 7:11

Gai go de onolau ngadau o Noah, i de madaangahulu ma hidu laangi o de lua malama — go de laangi nei ne hhuge ai denga vai i lalo de henua, gai denga abaaba o de langi gu hhuge.

Amos 5:19

Gai e bei naa dagodo o tangada e savini laa e hano gee i de laiono, gai ia gu hedae ange gi dahi bea; ia e ulu naa i dono hale ga hannagi ange gi de baasi de hale, gai dahi labodo ga kadi ia.

Psalm 18:15

Lodo ava o tai gu ssula age, gai dagelo o henua i lalo gu gidee, i dau hagasee e Tagi Maolunga, ma dau busi luoo bongaa usu.

De Beebaa go Job 20:24

Gai ga ola mai naa donu ia i de goloa hebagi e hai i iron, gai dahi dao bronze e velo naa ia.

2 Kings 7:2

Gai taane e baalea ange laa de hodooligi ne hai ange gi taane o de Maadua, “Ga huugea naa donu e Tagi Maolunga denga abaaba o de langi, gai e dee maua donu i de hai mee nei!” Gai Elisha ga hai ange, “Koe e gidee naa de hai mee nei, aagai koe e dee mami ange naa donu mee nei.”

Genesis 19:24

Gai Tagi Maolunga ga hagamalili iho gi honga o Sodom ma Gomorrah denga maga ahi kaa ma de ahi mai i de langi.

Ecclesiastes 9:12

E dahi ange mee: e deai donu se dangada e iloo dono masavaa: de mamu e buulou i lo te galauna baubau, gai de manu lele e noodia i dahi sele, gai e bei ai hogi dangada e gaavee i denga masavaa baubau e daa hagalele laa donu huu de dae mai gi gilaadeu alodahi.

Isaiah 2:19

Dangada e saavini naa ga mmuni i lodo haonga i magavaa hadu ma haonga i lo te gelegele, i hiidinga delaadeu maatagu i Tagi Maolunga, ma de mahamaha o dono maolunga, i de masavaa oona e hidi age ai ga luuluu henua i lalo.

Isaiah 2:21

Gai gilaadeu ga saavini e mmuni i lodo haonga i magavaa hadu ma lo te baba i gaogao denga mounga, i hiidinga delaadeu maatagu i Tagi Maolunga, ma de mahamaha o dono maolunga, i de masavaa oona e hidi age ai e hagamaatagu henua i lalo.

Isaiah 8:14

gai ia e hai naa ga se mommee dabu; aagai ange gi luu hale o Israel ia go de hadu e hagalaavea laa vae o dangada, gai se hadu e haia ga baakuu gilaadeu. Gai ia e bei naa donu dagodo o ssele ange gi dangada o Jerusalem.

Isaiah 13:13

Deelaa ai, au e hai naa gi ngalungalue de langi; gai henua i lalo gi ngalue gee mai i dono duulanga, i de laangi o de bole o Tagi o denga hagabuulinga hebagi, ma de laangi o dono lili laumalie.

Isaiah 42:22

Aagai de huaadangada nei gu gaiaadia ma de haia gi de mahi olaadeu goloa; gilaadeu alodahi gu nnoho i lodo haonga ma de pono ange i lodo hale pono. Gilaadeu gu gaiaadia olaadeu goloa, gai e deai donu se dangada e hagaola ina gilaadeu; gilaadeu gu bei goloa e maua i de hebagi, gai e deai donu se dangada e hagadaba, “Hagaahea mai gilaadeu!”

Jeremiah 48:43

Dangada o Moab, de mee hagamaatagu, ma de geelinga gelo, aama ssele e baba adu donu gi goodou, go Tagi Maolunga e hagadaba.

Jeremiah 48:44

Tangada e savini ga hano gee i de mee hagamaatagu, e doo ange naa gi lo te geelinga gelo, gai tangada e gage age i lo te geelinga gelo laa, e doo ange naa gi lo te sele. Go hiidinga au e gaamai naa gi honga o Moab dahi ngadau e hagaduasala ai ia, go Tagi Maolunga e hagadaba.

Lamentations 3:47

Gimaadeu gu duasala i de mee hagamaatagu ma denga geelinga kelo, ma de oohaa ga ngadi dagodo.”

Ezekiel 11:8

Goodou e maatagu i de gadilaasa, gai au e hebagi adu naa donu gi goodou i de gadilaasa, go de Ia Aamua go Iahweh e hagadaba.

Ezekiel 12:13

Au e maga naa hogi dagu galauna ga hai gi doo ange ai ia gi ono lodo; gai au e kave naa ia gi Babylon, go de henua o de gau Babylon, aagai ia e dee gidee ange naa donu de henua, gai ia e magau naa i kilaa.

Ezekiel 15:7

Au e hai baasi ange naa donu gi gilaadeu. Gai ga ssao mai naa donu gilaadeu i de ahi, gai de ahi e ahe ange naa donu ga dudu gilaadeu. Gai gi iloo ai e goodou bolo go au donu go Iahweh, i de masavaa aagu e hai baasi ange ai gi gilaadeu.

Psalm 18:8

De useahi gu buu mai i lodo luoono bongaa usu; de ahi ula gu sao mai i lo tono ngudu, gai denga maga ahi e kaa mai i ono daha.

Amos 5:18

E vakaa naa goodou e llodo laa gi dae mai de laangi o Tagi Maolunga! Gu aha gu llodo ai goodou gi dae mai de laangi o Tagi Maolunga? De laangi laa se laangi gohu, e deai donu se maalama iai.