Hebrews 12:28 - De Beebaa Dabu

²⁸ Deenei ai, go hiidinga gidaadeu e kave de nohoanga hodooligi e dee maua laa i de hagangalungalue, gidaadeu ga hagaahe ange de abodonu ma de daumaha ange gi de Maadua e hagamalangilangi ai ia, i de hagadubu ma de maatagu,

Hebrews 12:28 Referans Kwoze

Hebrews 13:15

Deenei ai, gidaadeu ga duudagi taadeu gaavange gi de Maadua ssigidaumaha o de tuhi, i de ingoo o Iesu i masavaa alodahi, deenei go taadeu tala hagadonu dono ingoo.

Daniel 2:44

Gai laangi naa huu o denga hodooligi laa, gai de Maadua o de langi e hagaduu age naa dahi nohoanga hodooligi e dee maua laa i de oha, aabe e gaavange gi hanu dangada gee. Gai de nohoanga hodooligi laa e oha naa ma de hagallilo denga nohoanga hodooligi ange laa, aagai e dagodo naa donu huu ga hano ai.

Psalm 2:11

Daumaha ange gi Tagi Maolunga i de maatagu, gai gi malangilangi ma de bolebole.

Hebrews 4:16

Deenei ai, gidaadeu gi lo taane i de loomai e hagapaa ange gi de nohoanga o de abodonu laa, gi maua ai e gidaadeu i de kave de abodonu ma tegi e bale mai ai gidaadeu i de masavaa odaadeu e duasala ai.

1 Peter 2:5

gai e bei ai hogi oodou dagodo, goodou go de hadu e mouli laa, e hagaduu ai laa de hale daumaha i de baasi gi de hagasaalunga, e hai ai de gau haimeedabu dabu, gai goodou ga hai ai denga sigidaumaha i de baasi gi de hagasaalunga, e hagamalangilangi ina de Maadua i hiidinga o Iesu Klisdo.

Daniel 7:27

Gai ssauaa e dagi ai, ma de mmahi aama de mahamaha o denga nohoanga hodooligi i lalo de langi alodahi, e gaavange naa gi de gau dabu, go dangada o de Ia Maolunga Mmao laa. Gai dono nohoanga hodooligi e dagodo naa donu huu ga hano ai, gai dagi alodahi e daumaha ange naa gi de ia ma de hagallongo ange gi de ia.’

Psalm 19:14

Haia agu muna e tala ma hagasaele i ogu lodo gi ni mee e hagamalangilangi ina goe, Tagi Maolunga, go koe dogu baba makaga ma dogu Ia Hagaola.

Revelation 1:6

ma de hai gidaadeu gi se nohoanga hodooligi, gai gi ni dangada haimeedabu e hai hegau ange gi dono Maadua ma Tamana — gai ia e bau ange i de kave taadeu tuhi ma de mahamaha aama ssauaa ga hano ai e dee ngado mai. Amen.

Isaiah 56:7

au e gaamai naa gilaadeu nei alodahi gi dogu mounga dabu, ma de hai gilaadeu gi malangilangi i dogu hale dalodalo. Gai au e malangilangi naa i alaadeu sigidaumaha dudu ma alaadeu sigidaumaha e hai i honga dogu mommee o ssigidaumaha; go hiidinga dogu hale e hagaingoo ange naa go de hale dalodalo o denga huaahenua alodahi.”

1 Peter 1:17

Gai noo goodou e hagahi ange Tamana, go de ia e hagamodu ina muna o dangada, gai e dee vae dangada, gai goodou mouli i de hagadubu ma de maatagu i doodou nnoho gaainga i henua i lalo nei.

Romans 11:20

Ni muna abodonu; gilaadeu ne aau gee, i hiidinga delaadeu dee hagadonusia, gai koe e pigi ange donu huu i doo gai. Deenei ai, koe gi dee hagamaolunga, aagai koe gi madagu.

Revelation 15:4

Tagi Maolunga, goai e dee madagu ma tee hagamahamaha ina doo ingoo? Go koe donu huu e dabu. Denga huaahenua alodahi e loomai naa ga daumaha adu gi de goe, go hiidinga koe gu hagaago mai au hagamodu heohi.”

1 Peter 2:20

Aagai e heohi donu de tuhi a dangada goodou, noo goodou e golomagi oodou lodo i doodou hagaduasala, i hiidinga o oodou hegau baubau? Aagai noo goodou e golomagi oodou lodo i doodou hagaduasala, i hiidinga doodou hai tanuaa, gai de Maadua e malangilangi i goodou.

Leviticus 10:3

Gai Moses ne hai ange gi Aaron, “Aanei muna a Tagi Maolunga gu tala ma gu hagadaba: ‘Au e hagaago ange gi gilaadeu e loomai e hagapaa mai gi de au bolo au e dabu; gai dangada alodahi gi hagamahamaha ina au i olaadeu daha.’ ” Gai Aaron gu dee muu.

Revelation 5:10

Koe gu hai gilaadeu gi se nohoanga hodooligi gai ni dangada haimeedabu niio taadeu Maadua, gai gilaadeu ga dagi ai i henua i lalo.”

Hebrews 10:19

Deenei ai, denga daina, gidaadeu gu lo taane i de ulu i de Mommee Dabu mmao laa i dodo o Iesu,

Hebrews 3:6

Aagai Klisdo ne hai hegau i de muna abodonu i de tilo ange de hale o de Maadua bei dagodo o tama donu. Gai gidaadeu go dono hale donu, noo gidaadeu e daohi taadeu lo taane ma de malangilangi i taadeu tali hagalodolodo.

Matthew 25:34

Gai de Hodooligi e hai ange naa gi dangada i dono baasi madau, ‘Loomai, goodou gu lava i de hagamanuuia i daho dogu Damana. Goodou gaavee de nohoanga hodooligi gu hagadabena adu laa gi goodou, mai i taamada age de hai o henua i lalo.

Daniel 7:14

Gai gu gaavange gi de ia ssauaa e dagi ai, ma de mahamaha, ma de nohoanga hodooligi; gai denga hagadaagangaa dangada alodahi, ma huaahenua, aama huaadangada e pasa i denga hagadaagangaa muna gi daumaha ange gi de ia. Gai dono sauaa e dagi ai e dee ngado mai, gai dono nohoanga hodooligi e dee maua naa donu i de oha.

Hebrews 5:7

Gai de masavaa o Iesu ne mouli ai i henua i lalo, gai ia ne dalodalo aama de dangidangi i de dangi see aama de ssali ono loimada ange gi de ia e maua laa i de hagaola ia mai i de magau, gai de Maadua ne hagallongo dana dangidangi, i hiidinga ia e hai hegau i de hagadubu ma de madagu.

Philippians 4:18

Gai gu tae mai donu sseene alodahi oodou ne gaamai nei, gai gu tubu ange donu i mee oogu e hagadanuaa ai! Gai gu odi ange danuaa donu ogu mee e hagadanuaa ai, i dagu kave nei i daho Epaphroditus doodou mee ngadi gaavange ne gaamai nei. Mee e bei ssigidaumaha o mee maanongi e hagamalangilangi ina laa de Maadua.

Isaiah 9:7

Gai dono nohoanga hodooligi ma de nnoho paba e hagadagadaga, e deai naa donu se odi. Gai ia e dagi naa i de nohoanga o David, ma dono nohoanga hodooligi, gai ia e hai naa gi duu gi makaga ma tee ngalungalue i de hagamodu e soe ma de heohi, mai i de masavaa laa ga hano ai. Go de lodo mmahi o Tagi o denga hagabuulinga hebagi e hagassula ina de mee nei.

Proverbs 28:24

Tangada e gaiaa ina laa mee a dono damana aabe go dono dinana, ga hagadaba, “Au tigi haisala donu” — se soa donu niio tangada e oohaa ina mee.

Psalm 89:7

De Maadua se ia hagamadagu ange gi de hagabuulinga hagasaele dabu; gai e hagamadagu ange i gilaadeu madali ia.

Ephesians 5:10

gai haia gi iloo e goodou be aahee mee e hagamalangilangi ina Tagi Maolunga.

Ephesians 1:6

gai gidaadeu ga tuhi ai de mahamaha o dono abodonu, ne ngadi gaamai laa gi gidaadeu i hiidinga o dana Dama Hagamogomogo.

Luke 1:33

gai ia e dagi naa dangada o Jacob ga hano ai; gai dono nohoanga hodooligi e deai naa donu se odi.”

Hebrews 13:21

gi gaavadu gi goodou mee danuaa alodahi gai goodou ga hai ai ono lodo, ma de hagahai hegau i odaadeu daha mee e hagamalangilangi ina ia i daho Iesu Klisdo; gai go ia e heohi taadeu hagamahamaha ga hano ai e dee ngado mai. Amen.