Ezekiel 9:2 - De Beebaa Dabu

² Gai tilo, e dogoono daane gu loomai i de haitoga e mua gi lunga, i de baasi gi ngaiho, dahi ma dahi e poo dono goloa hebagi e daa ai dangada. Gai e dahi daane e gahu i malo linen madali gilaadeu, ia e dagidagi dahi mee e sisi ai. Gai gilaadeu nei ne loomai ga tuu i gaogao de mommee o ssigidaumaha e hai laa i bronze.

Ezekiel 9:2 Referans Kwoze

Ezekiel 10:2

Gai Tagi Maolunga ne basa ange gi taane e gahu laa i malo linen, ga hai ange, “Hannoo ulu gi magavaa o denga hagasii i lalo o denga cherubim. Gai koe ga hhao luoo lima gi hoohonu i denga maga ahi i magavaa o denga cherubim laa ga hagassii ange gi honga de aduhale.” Gai au ne galo ange ga tilo dono masavaa ne hano ai ga ulu.

Leviticus 16:4

Gai ia gi gahu i de malo gahu dabu e hai laa i linen, ma de malo huna linen, ga nnoa lo tono ungaalodo i de malo nnoa linen, ma de hagauda de goobai linen. Aanei denga malo dabu. Gai ia gi gaugau i mua dono gahu i malo nei.

Revelation 15:6

gai e dogohidu dangada de langi gu ssao mai i lo te hale dabu ma e hidu mee hagamaakau, gai gilaadeu e kahu i linen tea malamalama, gai e hanu mee dau goolo i honga olaadeu hadahada.

2 Kings 15:35

Gai ia tee oha donu denga mommee daumaha; gai dangada ne duudagi de hai alaadeu sigidaumaha ma de dudu mee maanongi i denga mommee daumaha laa. Gai Jotham ne hagaduu age ange de haitoga e mua gi lunga o de hale o Tagi Maolunga.

Jeremiah 26:10

Gai ga langona huu e denga dagi o Judah mee nei, gai gilaadeu ga loomai i de hale o de hodooligi gi de hale o Tagi Maolunga, ga nnoho i olaadeu duulanga i ma te Haitoga Hoou o de hale o Tagi Maolunga.

Jeremiah 25:9

tilo, au e aalu naa gi loomai denga huaadangada alodahi i ngaiho, ma dogu dangada hai hegau go Nebuchadnezzar, go de hodooligi o Babylon, go Tagi Maolunga e hagadaba. Au e gaamai naa gilaadeu gi hebagi ange gi de henua nei, ma dangada e nnoho ai, aama denga huaahenua i luu baasi doodou henua. Gai au e hagailonga naa de mommee nei e oha gi odi, ma de hai gi se mee hagamaatagu, ma de llele ai mouli o dangada, gai e ngadi daakodo naa ga hano ai.

Jeremiah 1:15

Tilo, au gu dai hagahi naa denga hagadiilinga alodahi i denga nohoanga hodooligi i ngaiho, go Tagi Maolunga e hagadaba. Gilaadeu e loomai naa ga hagatuu olaadeu nohoanga i mada haitoga o de buibui o Jerusalem; gilaadeu e loomai naa ga hebagi ange gi ono buibui alodahi, aama denga aduhale alodahi o Judah.

2 Chronicles 27:3

Gai Jotham ne hagaduu age ange de haitoga e mua gi lunga o de hale o Tagi Maolunga, ma de hai hegau ange ga hagaduu age de buibui o Ophel.

2 Chronicles 4:1

Ia ne hagaduu dahi mommee o ssigidaumaha i bronze, se madalua sugilima de looloa, gai e madalua sugilima de lahalaha, gai se madaangahulu sugilima tuuduu.

Exodus 40:29

Gai ia ga hagaduu de mommee o ssigidaumaha dudu i gaogao de haitoga o de tabernacle, go de hale malo hagabuni; gai ia ga hai sigidaumaha dudu ma ssigidaumaha o grain, bei de hai a Tagi Maolunga gu tala ange ai gi de ia.

Ezekiel 9:3

Gai de mahamaha o de Maadua o Israel gu hano gee mai i denga cherubim, go de mommee nogo iai, gai ne hano gi ma te abaaba o de temple. Gai ia ne hagahi taane e gahu laa i malo linen ma de dagidagi de mee e sisi ai mee madali ia.

Ezekiel 9:11

Gai tilo, taane e gahu laa i malo linen ma de dagidagi de mee e sisi ai i dono gaogao ne humai, ga hagadaba, “Au gu hai ma gu bei au mee ne tala mai.”

Daniel 10:5

gai au ne galo age gu gidee dahi daane e gahu i malo linen, ma de nnoa dono ungaalodo i dahi mee nnoa e hai i goolo mai i Uphaz.

Daniel 12:6

Gai dahi gilaau ne ssili ange gi taane e gahu laa i malo linen, go de ia e duu laa i honga ssaalingaa vai, “Dee hee maa taulooloa i mua de hagassula denga mee hagalele mouli nei?”

Jeremiah 4:6

Hagaduulia de hagailonga e hulo ai gi Zion! Goodou aude nnoho, gai saavini mage hulo mmuni! Go hiidinga au e hai naa gi humai dahi hai ngadaa i ngaiho, gai se mee e haia de oha laumalie.”

Ezekiel 8:3

Gai ia ne haalo mai dono mee be se lima ga poo ai ngaangaaulu o dogu biho. Gai de Hagasaalunga ne hagamalanga age au gi magavaa o henua i lalo ma de langi, ga kave gi Jerusalem i de masavaa o denga midi hagaago ange a de Maadua, gi de haitoga i de baasi gi ngaiho, i lo te buibui e mua gi lodo, go de mommee e duu ai dahi diinonga e hidi mai ai de maagoda.

Amos 9:1

Au ne gidee de Ia Aamua e duu i gaogao de mommee o ssigidaumaha, gai ia ne hagadaba, “Hagailiilihia de ulu o denga duludulu gi ngalungalue ai de hale alodahi, ma de maoha iho gi honga biho o dangada alodahi. Gai dangada e doe gai au e daa naa gi maakau i de gadilaasa; e deai donu se gilaadeu e maua i de savini e hano; e deai donu se gilaadeu e hagaola.