Ezekiel 8:16 - De Beebaa Dabu

¹⁶ Gai ia ne kave au gi lo te buibui e mua gi lodo o de hale o Tagi Maolunga, gai tilo, e dinolua ma dogolima daane e nnoho i gaogao de haitoga o de temple i kilaa, i magavaa de velanda ma de mommee o ssigidaumaha. Gai olaadeu dua e huuhuli ange gi de temple, olaadeu mada e huuhuli gi dua, gai gilaadeu e ino ange gi de laa e hanage laa i dua.

Ezekiel 8:16 Referans Kwoze

Deuteronomy 4:19

Goodou kana ange hogi gi dee kalo age goodou gi lo te langi ga gidee de laa ma de maasina, aama denga heduu, go mee alodahi i lo te langi, gai goodou gu llodo e daumaha ange ma de hai hegau ange gi gilaadeu, go mee a Tagi Maolunga doodou Maadua gu gaavange gi dangada alodahi i henua i lalo.

Jeremiah 32:33

Gilaadeu gu huuhuli mai olaadeu dua gi de au e dee go olaadeu mada; gai e dee galemu donu tee modu dagu agoago ange gilaadeu, aagai gilaadeu e dee hagallongo mai aabe daohi agu haelenga.

Deuteronomy 17:3

i dono hano ga daudali ange i denga diinonga ma de daumaha ange gi gilaadeu, be go dono daumaha ange gi de laa, be go de maasina, aabe go denga mee i lo te langi, go mee aagu gu hai adu goodou gi dee haia,

Ezekiel 11:1

Gai de Hagasaalunga ne hagamalanga age au ga kave gi de haitoga o de hale o Tagi Maolunga i de baasi gi dua. Gai e dinolua ma dogolima daane e nnoho i gaogao de haitoga laa. Au ne gidee hogi Jaazaniah tama daane a Azzur, ma Pelatiah tama daane a Benaiah i olaadeu magavaa, luu daane nei ni dagi niio dangada.

Jeremiah 2:27

Gilaadeu e hai ange gi de manu somo, ‘Go koe dogu damana,’ ma de hai ange gi dahi hadu, ‘Go koe ne hanaua au.’ Gilaadeu gu huuhuli mai olaadeu dua gi de au, e dee huuhuli mai olaadeu mada; gai de masavaa huu olaadeu e hai ngadaa ai, gai gilaadeu ga hagataba, ‘Hidi age hagaola ina gimaadeu!’

Joel 2:17

De gau haimeedabu e hai hegau laa i mada luu mada o Tagi Maolunga gi tangi i magavaa o de velanda o de temple ma de mommee o ssigidaumaha. Gilaadeu gi hagataba, “Tagi Maolunga, hagaola ina oo dangada. Koe gi dee haia gi hagangadi mee ina dangada o doo boolonga, aabe gi daalaa hakadanga i daho denga huaahenua. Gai gu aha gu hagataba ai denga huaahenua, ‘I hee iai delaadeu Maadua?’ ”

Ezekiel 43:5

Gai de Hagasaalunga ne langa age au ga kave gi lo te buibui e mua gi lodo; gai au ne gidee bolo de mahamaha o Tagi Maolunga gu hhao de temple.

Ezekiel 45:19

Gai tangada haimeedabu gi gaavee hanu dodo o de manu o ssigidaumaha o haisala gi hulu ina ange gi denga laagau i luu baasi haitoga o de temple, ma hiihii o de mommee o ssigidaumaha, ma laagau o haitoga o de buibui e mua gi lodo.

Ezekiel 40:28

Ia ne kave hogi au laa lo te haitoga i de baasi gi ngaage gi lo te buibui e mua gi lodo, gai ia ga haide de haitoga i de baasi gi ngaage; gai ono haidenga e bei hogi haidenga o denga haitoga ange laa.

Ezekiel 10:3

Gai denga cherubim laa ne tuu i baasi i ngaage de temple, gai de masavaa o taane laa ne ulu ai gi lodo, gai dahi giliiga gu hhao ga honu lo te buibui e mua gi lodo.

Jeremiah 44:17

Aagai gimaadeu e hagassula donu amaadeu mee gu lava i de hagatoo donu ai. Gimaadeu e dudu ange naa mee maanongi gi de hine hodooligi o de langi, ma de ssigidaumaha ange mee unu gi de ia, bei hegau amaadeu ma omaadeu dubuna madagidagi, ma omaadeu hodooligi ma omaadeu dagi ne hai i aduhale o Judah ma honga haiava o Jerusalem. De masavaa laa gai gimaadeu e lagolago amaadeu gai ma de duadonu, gai gimaadeu tee hai ngadaa donu.

2 Chronicles 29:6

Odaadeu dubuna madagidagi tee hai hegau i de muna abodonu; gilaadeu ne hai de baubau i mada luu mada o Tagi Maolunga, taadeu Maadua ma de tili ia. Gai gilaadeu ne daahuli gee i de mommee o Tagi Maolunga e noho ai, ga huuhuli ange olaadeu dua gi de ia.

2 Kings 23:11

Ia ne kave gee hogi denga hoosa i gaogao de haitoga o de hale o Tagi Maolunga, a denga hodooligi o Judah ne gaavange e daumaha ange ai gi de laa. Mee nei ne dugu i lo te buibui i gaogao de aabi o tagi go Nathan-Melek. Gai Josiah ne dudu denga hada ne gaavange laa e daumaha ange ai gi de laa.

2 Kings 23:5

Gai ia ne aau gee de gau haimeedabu a denga hodooligi o Judah ne hili laa, gi duungia mee maanongi i denga mommee daumaha o denga aduhale o Judah ma mommee i luu baasi o Jerusalem — go gilaadeu ne duungia denga mee maanongi ange gi Baal, ma de laa, ma de maasina, ma denga heduu aama mee alodahi i lo te langi.

Ezekiel 23:35

Deenei ai, e hagadaba de Ia Aamua go Iahweh: Go hiidinga koe ne ngalo au ma de huli mai doo dua gi de au, deelaa ai, koe e kave naa donu de hagaoanga o au dahulinga hakino gee ma doo hai be se manu.”

2 Chronicles 7:7

De masavaa laa gai Solomon ne hagadabu de mommee i lo te ungaalodo o de buibui i ma te hale o Tagi Maolunga, ga hai ai denga sigidaumaha dudu, ma kiliisi o denga manu o ssigidaumaha hagadanuaa magavaa, go hiidinga de mommee o ssigidaumaha bronze i lo te buibui o de hale o Tagi Maolunga gu dee oo i de hai ai denga sigidaumaha dudu, ma ssigidaumaha o grain, aama kiliisi.

2 Kings 16:14

Gai ia ne hagangalue de mommee o ssigidaumaha bronze e duu laa i mada luu mada o Tagi Maolunga i ma te temple, i magavaa o de mommee o ssigidaumaha hoou ma de temple o Tagi Maolunga, ga kave ga hagaduu i baasi ngaiho o de mommee o ssigidaumaha hoou.

1 Kings 8:29

Gai koe daumada ina de hale nei i de laangi ma de boo, go de mommee aau ne hagadaba laa bolo e hagadubu ai doo ingoo. Gai koe e hagallongo naa talodalo a doo dangada hai hegau, i de masavaa oona e dalodalo ai ga huli mai gi de mommee nei.

Ezekiel 8:15

Gai ia ne hai mai gi de au, “Tama a tangada, koe gu gidee mee baubau nei? Gai koe e gidee ange naa denga hegau e kii ange de hakino gee i mee nei.”

Ezekiel 23:39

De masavaa alaau ne daa ai alaau dama ga sigidaumaha ange gi olaau diinonga, de laangi laa gai gilaau ne ulu hogi i dogu mommee dabu ga hai gu dee gilimalali. Aanei alaau mee ne hai i lo togu hale.

Ezekiel 40:6

Ia ne hano gi de haitoga i de baasi gi dua. Gai ia ne gage age i de gaagenga, ga haide laagau i ma te haitoga laa; gai se dahi laagau haide laa de lahalaha.

Ezekiel 43:8

Gilaadeu ne hagatuu olaadeu haitoga ma laagau o olaadeu haitoga i gaogao laagau o dogu haitoga, gai se dahi donu huu buibui e vaaea omaadeu magavaa. Gilaadeu ne hagangadi mee dogu ingoo dabu i alaadeu hegau hakino gee alodahi. Deelaa ai, au ne daa gilaadeu ga maakau i dogu bole.

Ezekiel 46:1

E hagadaba de Ia Aamua go Iahweh: De haitoga i de bido gi dua o de buibui e mua gi lodo e pono i laangi e ono o dangada e hai hegau ai laa; aagai e hhuge i de laangi o Sabbath, ma taonga o de duu de maasina i dai.

2 Kings 21:5

Gai ia ne hagatuu denga mommee o ssigidaumaha ange gi denga heduu alodahi i lo te langi, i lo te buibui o de hale o Tagi Maolunga.

Jeremiah 7:18

Denga dama e hagabudu lahhie, denga damana e dahu de ahi, gai denga haahine e labu pelaoaa e hai ai pelaoaa e sigidaumaha ange gi de Hine Hodooligi o de Langi. Gilaadeu e llingi ange ssigidaumaha o mee unu gi denga diinonga e hai ai gi lili au.

Jeremiah 8:2

Gai olaadeu ivi e daakodo saele naa i lalo de laa ma de maasina aama denga heduu o de langi, go mee olaadeu ne llodo e hai hegau ange aagena, ma de daudali ai aama de daumaha ange aagena. Gai olaadeu ivi e dee hagabudu naa donu aabe e danu, aagai e bei naa denga duudae e daakodo saele laa i honga de gelegele.

Ezekiel 7:23

Hagadabena ina denga daula baalanga, go hiidinga de henua gu honu i de gau daa dangada, gai gu kona de vaivai haia dangada i de aduhale.