Ezekiel 7:11 - De Beebaa Dabu

¹¹ De vaivai haia o dangada gu hagadagadaga ange donu de baubau; gai e deai naa donu gilaadeu e ola, e deai naa hogi olaadeu goloa e doe, aabe go hanu alaadeu mee hagamogomogo.

Ezekiel 7:11 Referans Kwoze

Zephaniah 1:18

Alaadeu selevaa ma alaadeu goolo e dee maua naa donu i de hagaola gilaadeu i de laangi o Tagi Maolunga e bole ai. Dono magiaa e bei naa de ahi e dudu naa ga odi henua i lalo alodahi, gai ia e moolau naa donu dana daa ga maakau dangada alodahi i henua i lalo.

Ezekiel 7:23

Hagadabena ina denga daula baalanga, go hiidinga de henua gu honu i de gau daa dangada, gai gu kona de vaivai haia dangada i de aduhale.

James 2:13

Go hiidinga de Maadua e dee degi ange donu gi tangada e dee degi ange laa gi dangada i de masavaa hagamodu muna; aagai tegi e kii i de hagamodu muna.

Micah 6:12

De gau lava o de aduhale e vaivai hai dangada, gai dangada e nnoho i oo daha e hadu muna, ma de tala muna hagasenga i olaadeu ngudu.

Micah 3:3

Goodou e gai kano o ogu dangada ma de holehole olaadeu gili, gai e hadihadi olaadeu ivi gi too dagidahi; goodou e duuduu gilaadeu bei kano manu i lo te anibada, ma kano e hhao ange laa gi lo te kamaa.”

Micah 2:2

Gilaadeu e nnoo ange ma de hai gi de mahi denga alahenua, ma denga hale, ma de kave mee nei. Gilaadeu e vaivai hai tangada ma dono huaabodu, aama de boolonga o dono dangada.

Amos 6:3

Goodou gu hagangalo de laangi hai ngadaa laa, gai gu hai gi moolau mai de hagaduasala laa.

Amos 3:10

“Gilaadeu e dee iloo de hai de mee heohi, go Tagi Maolunga e hagadaba. Gilaadeu e hagabudu mee alaadeu e gaiaa ma de vaivai hai ai dangada i lodo olaadeu mommee buibui makaga.”

Ezekiel 7:16

Gai dangada e ola laa e saavini naa ga hulo gi denga mounga, gilaadeu e tangi naa bei denga manu kono i lodo geelonga, dahi ma dahi e dangi naa i hiidinga o ono baubau.

Ezekiel 7:2

“Tama a tangada, daalaa ange muna a de Ia Aamua go Iahweh gi de henua o Israel: De hagaodi! De hagaodi gu dae mai donu gi denga dege e haa o de henua.

Ezekiel 6:11

E hagadaba de Ia Aamua go Iahweh: Hagadau dugidugia luoo lima, ma de daakai luoo vae aama de hagadaba, “Gu vakaa loo gilaadeu!” go hiidinga o denga hegau baubau ma dahulinga hakino gee alodahi a dangada o Israel. Gilaadeu e daia naa ga maakau i de gadilaasa, ma de onge aama de mee hagamaakau.

Ezekiel 5:11

Deenei ai, au e hagatoo donu i dogu mouli, go de Ia Aamua go Iahweh e hagadaba, go hiidinga goodou gu hai gi hakino gee dogu mommee dabu i oodou diinonga hakino gee lagolago, ma oodou hegau hakino gee alodahi, au e tili naa goodou; au e dee lodo aloha adu naa gi goodou aabe hagaola goodou.

Ezekiel 5:4

Gaavee hogi hanu momo ngaangaaulu laa dilia ange gi lo te ahi ga dudu ai; gai de ahi e daamada mai naa i kilaa ga hano gi lodo hale o Israel alodahi.

Jeremiah 25:33

Gai dangada a Tagi Maolunga e daa ga maakau i de laangi laa e gidee mai loo i dahi bido o henua i lalo ga dae ai gi de bido laa. Gai e deai naa donu dangada e tangi i gilaadeu aabe e hagabudulia gilaadeu ga danumia. Gai gilaadeu e bei naa denga duudae e daakodo saele laa i honga de gelegele.

Jeremiah 22:18

Deenei ai, e hagadaba Tagi Maolunga i dagodo o Jehoiakim tama a Josiah, de hodooligi o Judah: “Dangada e dee tangi naa i de ia, ga hagataba, ‘Gu aloha ai loo i dogu daina daane! Gu aloha ai loo i dogu daina hahine!’ Gilaadeu e dee tangi naa hogi i de ia, ga hagataba, ‘Gu aloha ai loo i dogu dangada aamua! Gu hagaaloha dagodo o dono mahamaha!’

Jeremiah 6:7

De aduhale nei e honu malingilingi i de baubau, bei de vai geli e honu baabaa laa i vai. De alasala ma de oha mee e hai i kilaa; gai au e gidee dagodo o dono magi ma ono maanuga i masavaa alodahi.

Isaiah 14:29

De gau Philistia alodahi, goodou aude malangilangi, i de hadi de laagau ne hagaili ai laa goodou; go hiidinga de labodo e hagadili naa dahi labodo hagammau, gai dana dama e lele gai e hagammau.

Isaiah 9:4

Go hiidinga koe gu hadihadi de laagau e hagahai hegau aana e hagauda, ma togo i honga dono eu, go de laagau a de ia e vaivai haia gilaadeu, bei de laangi aau ne hagadee kii ai de gau Midian.

Isaiah 5:7

De veelengaa grape a Tagi o denga hagabuulinga hebagi go de hale o Israel, gai dangada o Judah go de veelenga oona e malangilangi ai laa. Ia ne ssala de hagamodu muna heohi i kilaa, aagai tilo, go de daa dangada donu huu aana ne gidee; ia ne saalaa de heohi, aagai tilo, go de tangi donu huu o dangada aana ne langona!

Psalm 78:64

Olaadeu dangada haimeedabu ne maakau i de gadilaasa, gai olaadeu bodu tee maua i de tangi.

Psalm 73:8

Gilaadeu e doo mee ma de pasa baubau i dangada; gilaadeu e hagamaatagu dangada i de hagamaolunga.

Psalm 125:3

De laagau a de gau baubau e dagi ai e dee maua donu gi dagodo daulooloa i honga de henua o olaadeu e heohi, gai gi dee haia ai e de gau heohi de baubau.

Ezekiel 8:17

Gai ia ne hai mai gi de au, “Tama a tangada, koe gu gidee naa mee nei? Dangada o Judah e dee anga ange donu gi denga hegau hakino gee alaadeu gu hai i kinei; gilaadeu gu hai ma gu dohu honga de henua i denga dahulinga hakino gee, ga hai ai gi kii ange dogu lili. Galo ange diiloo gilaadeu e dugu ange de laa manu gi mada olaadeu usu.

Ezekiel 45:9

“E hagadaba de Ia Aamua go Iahweh: Denga dagi o Israel, goodou gu gona odi oodou mee e hai! Gu lava oodou vaivai hai ma de hagaduasala dangada, gai hai hegau i hagamodu heohi ma de mee heohi. Goodou aude alualumia dangada mai honga olaadeu mommee, go de Ia Aamua go Iahweh e hagadaba.

Jeremiah 7:34

Gai au e hai naa gi dee langona leo o de hine ma taane gu dai hagahai bodu e llodo danuaa ai, aabe e malangilangi ai i lodo aduhale o Judah, aama honga haiava o Jerusalem, gai de henua e ngadi dagodo naa.”