Esther 1:12 - De Beebaa Dabu

¹² Aagai de hine hodooligi go Vashti tee lodo e hai gi bei muna a de hodooligi ange gi de ia mai i daho denga eunuch. Gai de hodooligi gu lili mmao, ma de mahanahana iho ono lodo.

Esther 1:12 Referans Kwoze

Proverbs 19:12

De bole o de hodooligi e bei de hagangolo o de laiono, aagai dono abodonu e bei de mee suungia e hano iho laa gi honga helii.

1 Peter 3:1

E bei ai hogi, denga haahine dau bodu, goodou hagadubu ina oodou bodu. Gai noo hanu gilaadeu tigi hagadonusia muna a de Maadua, gai gilaadeu e gaavee naa olaadeu lodo i hiidinga dahulinga danuaa a olaadeu bodu, e dee go alaadeu muna e tala,

Ephesians 5:24

De nohoanga dabu e hagadubu Klisdo; gai e bei ai hogi, denga haahine gi hagadubu ina olaadeu bodu i mee alodahi.

Ephesians 5:22

Denga haahine dau bodu, goodou hagadubu ina oodou bodu bei doodou hagadubu Tagi Maolunga.

Nahum 1:6

Goai e bau ange gi dono bole? Goai e maua gi ola noo e kona dono lili? Dono bole e humai bei de ahi ula, denga hadu e mahangahanga i ono mada i mua.

Daniel 3:13

Gai Nebuchadnezzar gu lili mmao, ga hagadaba bolo gi gaamai Shadrak, ma Meshak, aama Abednego. Gai gu gaamai denga daane laa gi mada i mua o de hodooligi,

Daniel 2:12

Gai de hodooligi gu kona mmao de lili ma de bole, gai ia ga hagadaba bolo gi daia gi maakau denga daane heiangi alodahi o Babylon.

Proverbs 20:2

De bole o de hodooligi e bei de hagangolo o de laiono; tangada e haia ia ga lili e daa donu ga magau.

Psalm 79:5

Tagi Maolunga, dee hee maa taulooloa? Koe ga duudagi naa donu huu doo lili i gimaadeu ga hano ai? Dee hee maa taulooloa de kona doo maagoda bei de ahi ula?

Psalm 74:1

De Maadua, gu aha gu tili ai naa goe gimaadeu ga hano ai? Gu aha goe gu kona ai naa doo lili i au ssiibi, go ssiibi i dau mommee iai helii?

Deuteronomy 29:20

Gai Tagi Maolunga e dee degi ange naa donu gi de ia, aagai de lili o Tagi Maolunga ma dono maagoda e hai baasi ange donu gi tangada nei, bei dagodo o de useahi. Gai hagamalaia alodahi gu sisi laa i lo te beebaa nei, e hai ange naa gi de ia, gai Tagi Maolunga e hai naa gi dee manadua dono ingoo i lalo de langi.

Exodus 32:22

Gai Aaron ga hai ange, “Dogu dangada aamua, koe gi dee kona doo bole. Koe e iloo naa donu dagodo o de gau nei; gilaadeu e nnoho ange huu e hai de baubau.

Exodus 32:19

Gai ga hano iho huu Moses ga dae iho gi de mommee nnoho gaainga, gai ia gu gidee de kaau goolo laa ma denga aanunga a dangada e hai; aagai Moses gu kona mmao de lili, gai ia ga poo luu duu hadu laa ga maga iho gi gaogao de mounga gu maoha.

Genesis 3:16

Gai ia ga hai ange gi de hine laa, “Au e hai naa gi kona doo mmae i doo masavaa e hai ai oo hagalangona; koe e mmae naa i de masavaa oou e haanau ai. Koe e lodo mmao naa i doo bodu, ma de noho i lalo dana hainga.”

Daniel 3:19

Gai Nebuchadnezzar gu kona mmao dono lili, gai ia ne hagaago ange dono lili gi Shadrak, ma Meshak, aama Abednego. Ia ne hagadaba bolo gi dahua de ahi gi hidu hanonga e mmahi ange ai.

Esther 1:11

gilaadeu gi gaamai de hine hodooligi go Vashti, ma dono hau hodooligi, e hagaago ange ai gi dangada, ma denga dagi dagodo o dono mahamaha, go hiidinga ia se hine mahamaha.

Esther 1:13

Gai deenei tahulinga a de hodooligi e hai: ia e ssili i daho denga daane e iloo dagodo o de hainga ma de hagamodu soe, gai ia ne hai ange gi denga daane heiangi e tonu ange gi dagodo o de masavaa,

Esther 7:7

Gai de hodooligi ga duu age i de kona mmao de lili, ga hano gi lo te veelenga o de hale o de hodooligi. Aagai Haman gu donu iho bolo de hodooligi gu lava donu i de hagamodu e hagaduasala ia, deelaa ai, ia ne noho ga dangidangi ange gi de hine hodooligi go Esther gi hagaola ina dono mouli.