Deuteronomy 32:16 - De Beebaa Dabu

¹⁶ Gilaadeu ne hai ia ga maagoda i olaadeu diinonga, ma de hai ga lili ia i alaadeu hegau hakino gee.

Deuteronomy 32:16 Referans Kwoze

Psalm 78:58

Gilaadeu ne hai ia ga lili i hiidinga olaadeu mommee daumaha; gilaadeu ne hai ia ga maagoda i hiidinga olaadeu diinonga.

1 Corinthians 10:22

E aha, gidaadeu e llodo e hai gi lodo gaiaa Tagi Maolunga? E aha, gidaadeu e mmahi ange laa i de ia?

2 Kings 23:13

De hodooligi ne oha hogi denga mommee daumaha i baasi i dua o Jerusalem, ma baasi ngaage o de Mounga o denga Olive, go mommee a Solomon, de hodooligi o Israel ne hagatuu e daumaha ange ai gi Ashtoreth, tiinonga hakino gee o de gau Sidon, ma Chemosh, tiinonga hakino gee o de gau Moab, aama Milcom, tiinonga hakino gee o de gau Ammon.

1 Kings 14:22

Gai dangada o Judah ne hai de baubau i mada luu mada o Tagi Maolunga; alaadeu hegau dee heohi ne kii ange donu de hai Tagi Maolunga ga maagoda i hegau a olaadeu dubuna madagidagi ne hai.

Deuteronomy 7:25

Gai goodou duungia olaadeu diinonga i de ahi; gai goodou aude nnoo ange gi denga selevaa ma goolo e hai ai diinonga laa, aabe gi gaavee mee nei e hai ai oodou goloa, kana noodia ai goodou, go hiidinga Tagi Maolunga doodou Maadua e kino mmao i mee nei.

Deuteronomy 5:9

Aude daumaha ange gi gilaadeu, aabe gi hai hegau ange gi gilaadeu, i hiidinga go au go Iahweh doo Maadua, au se Maadua e maagoda. Au e hagaduasala denga dama, i hiidinga baubau o olaadeu maadua, ga dae ai loo gi tolu ma de haa atangada, o dangada e kino i de au,

Leviticus 18:27

go hiidinga aanei dahulinga a dangada nogo nnoho i de henua i oodou mada i mua, gai de henua alodahi gu hakino gee.

Deuteronomy 32:21

Gilaadeu ne hai au ga maagoda i denga diinonga e dee ni maadua abodonu; gilaadeu gu hai au gi lili i olaadeu ngadi diinonga. Au e hai naa gilaadeu gi llodo gaiaa i dangada tigi se huaahenua; au e hai naa gilaadeu gi llili i dahi huaahenua dee heiangi.

Psalm 106:29

gai gilaadeu ne hai ga lili Tagi Maolunga i alaadeu hegau baubau, gai de mee hagamaakau gu humai gi gilaadeu.

Isaiah 43:12

Au gu hagaago adu, ma de hagaola, aama de tala adu gi goodou — go au donu, e dee go dahi diinonga i oodou magavaa. Go koe dogu dangada hagadonu, go Tagi Maolunga e hagadaba, gai go au donu de Maadua.

Jeremiah 2:25

Aude savini saele ga dae ai gi teai oo mee vae, gai doo hakii gu mmasa gee. Aagai koe e hagadaba, ‘E deai donu haigamaiana! Au e vaasuu i denga diinonga o denga henua gee, au e daudali ange naa donu i gilaadeu.’

Jeremiah 7:18

Denga dama e hagabudu lahhie, denga damana e dahu de ahi, gai denga haahine e labu pelaoaa e hai ai pelaoaa e sigidaumaha ange gi de Hine Hodooligi o de Langi. Gilaadeu e llingi ange ssigidaumaha o mee unu gi denga diinonga e hai ai gi lili au.

Ezekiel 8:3

Gai ia ne haalo mai dono mee be se lima ga poo ai ngaangaaulu o dogu biho. Gai de Hagasaalunga ne hagamalanga age au gi magavaa o henua i lalo ma de langi, ga kave gi Jerusalem i de masavaa o denga midi hagaago ange a de Maadua, gi de haitoga i de baasi gi ngaiho, i lo te buibui e mua gi lodo, go de mommee e duu ai dahi diinonga e hidi mai ai de maagoda.

1 Kings 14:9

aagai koe ne kii ange donu de baubau au hegau ne hai, i dangada alodahi gu hulo i oo mada i mua. Koe ne hai denga diinonga baalanga ga daumaha ange aagena, ma de hai ai au ga lili i doo huli gee i de au.

2 Kings 17:11

Gai gilaadeu ne dudu mee maanongi i denga mommee daumaha alodahi, bei hegau a denga huaahenua a Tagi Maolunga ne aau gee laa i olaadeu mada i mua. Gilaadeu ne hai ga lili Tagi Maolunga i alaadeu hegau baubau alodahi.

2 Kings 17:17

Gilaadeu ne sigidaumaha alaadeu dama daane ma damaa hine i lo te ahi. Gilaadeu ne tala hogi mee e dee iloo, ma de ssala denga hagailonga, ma de hai denga hegau baubau alodahi i mada luu mada o Tagi Maolunga, ga hai ai ia ga lili.

2 Kings 21:6

Ia ne dudu dana dama daane i lo te ahi, ga hai ai ssigidaumaha, ia ne hai denga huuhuaa mee, ma de tala mee e loomai, ma de ssala de bale i daho denga hilohilo ma eidu, ma denga hagasaalunga o de gau maakau. Gai ne lagolago donu ana hegau baubau ne hai i mada luu mada o Tagi Maolunga ga hai ai ia ga lili.

Jeremiah 2:11

Gu dahi laa huaahenua ne suuia olaadeu diinonga? (Olaadeu diinonga e dee ni diinonga abodonu.) Aagai ogu dangada gu hagahesuihagi de mahamaha o delaadeu Maadua i denga diinonga e deai olaadeu haigamaiana.

Jeremiah 8:19

Hagalaangona adu leo o ogu dangada e tangi ai i honga de henua alodahi: “E aha, Tagi Maolunga gu dee noho nei i Zion? E aha, dono Hodooligi gu dee maleva laa i kilaa?” ⌊E hagadaba Tagi Maolunga,⌋ “Gu aha gilaadeu gu hai ai au gi lili i olaadeu diinonga, ma olaadeu diinonga henua gee deai haigamaiana?”