1 Corinthians 12:2 - De Beebaa Dabu

² Goodou e iloo bolo doodou masavaa ni Gentile ai, gai goodou ne hagasengalia i denga diinonga e dee maua laa i de pasa.

1 Corinthians 12:2 Referans Kwoze

1 Peter 4:3

Gu odi de masavaa e hai hegau ai bei denga Gentile — go de hai denga dahulinga baubau, ma lodo o de angaanga, ma de unu gi senga, ma de hai daonga e unu ai ga ssenga dangada ma de hagalongaa, aama de daumaha ange gi denga diinonga hakino gee.

1 Thessalonians 1:9

Gai dangada gu tala dagodo o doodou abodonu mai gi gimaadeu, ma doodou daahuli gee mai i denga diinonga ga hai daumaha ange gi de Maadua abodonu e mouli laa,

Psalm 115:5

E hanu olaadeu ngudu, aagai e dee maua i de pasa; e hanu olaadeu ganomada, aagai e dee maua gi gidee;

Galatians 4:8

I mua gai goodou e dee iloo de Maadua, goodou ni dangada hai hegau niio mee e dee ni Maadua abodonu.

1 Corinthians 6:11

I mua gai hanu goodou e dagodo bee nei. Aagai iainei goodou gu hagagilimalali ma gu vvae gee ma gu hai gi dabu, goodou gu hagaheohi i de ingoo o Tagi Maolunga go Iesu Klisdo aama ssauaa o de Hagasaalunga o taadeu Maadua.

Jeremiah 10:5

Olaadeu diinonga e bei de mee e dugi ai laa denga manu i lo te veelenga kiulii; olaadeu diinonga e dee maua i de pasa; gai dangada e saabai saele gilaadeu, i hiidinga gilaadeu e dee maua i de seesee. Goodou aude maatagu i denga diinonga nei; gilaadeu e dee maua donu i de hai adu dahi baubau aabe se danuaa daudahi gi goodou.”

1 Peter 1:18

Goodou e iloo bolo goodou ne hagaola mai i oodou mouli dee haigamaiana, go mee oodou ne ago mai i daho oodou damana madagidagi, gai tee hagao i hanu mee e moolau laa de llilo, bei selevaa ma goolo,

Titus 3:3

Go hiidinga i mua gai gidaadeu alodahi ni dangada llodo ssenga, ma tee hagallongo i muna, gai ne daahangadia, ma de noodia i denga hagadaagangaa lodo odaadeu e malangilangi ai. Gidaadeu ne mouli i de kino ma de lodo gaiaa, gai e hai hegau i de lili ma de hagadau kino.

Matthew 15:14

Goodou aude anga ange, gilaadeu ni dagi e dee kide, e dagina de gau dee kide. Noo dahi dangada dee gide e dagidahi dangada dee gide, gai gilaau ngaadahi e too ange donu gi dahi geelinga.”

Isaiah 46:7

Gilaadeu e hagauda delaadeu diinonga ma de saabai i honga olaadeu eu; ga kave ga hagaduu i dono mommee gi duu ai, gai e dee maua donu i de ngalue gee i dono duulanga. Gai ga dalodalo ange naa donu dahi dangada aagena, aagai e dee basa ange donu, aabe maua i de hagaola tangada mai i ono hai ngadaa.

Psalm 135:16

e hanu olaadeu ngudu, aagai e dee maua i de pasa, e hanu olaadeu ganomada, aagai e dee gidee;

Psalm 115:7

e hanu olaadeu lima, aagai e dee maua i de poo ange dahi mee; e hanu olaadeu vae, aagai e dee maua i de seesee; aagai e dee maua hogi i de hai dahi damaa leo daudahi.