HEBREOS 12:15 - Chatino Zona Alta Occidental

¹⁵ Xñi wan kwenta ꞌin taꞌa wan chaꞌ ja ska wan kulaa yaꞌ ngwa ti ñaꞌan nchga chaꞌ suꞌwe nu wa yꞌni Ndiose loꞌoan. Nu kulaa yaꞌ wan ꞌin Ni, ja chan ka wan ñaꞌan tiꞌ ska loo yan nu kuꞌni tnaꞌ ꞌin xka la neꞌ taꞌa msñi wan chaꞌ ꞌin Jesús. Ñaꞌan tiꞌ ska kixinꞌ tlá nu kuꞌni ñuꞌun ꞌin nten chaꞌ lka ran yan, kwiꞌ ngwañaꞌan kaan loꞌo taꞌaan bra nu ndiꞌin ska chaꞌ kuxi ꞌñaan.

HEBREOS 12:15 Referans Kwoze

HEBREOS 3:12

ꞌWan taꞌa msñian chaꞌ ꞌin Jesús, kuꞌni wan kwenta ꞌwan, ti ykwiꞌ ti wan, chaꞌ ja ska wan xiꞌin chunꞌ wan chaꞌ ꞌin Ndiose ykwiꞌ, chaꞌ ja ka kuxi niꞌ kasiya ꞌwan, chaꞌ ja kulaa yaꞌ wan chaꞌ nu nchkwiꞌ Ni.

GÁLATAS 5:4

ꞌWan nu ndyaa ñaꞌan tiꞌ wan chaꞌ ka suꞌwe kasiya ꞌwan tloo Ndiose chaꞌ nu ngiꞌni kti wan chaꞌ kula kanꞌ, nan wa mxiꞌin chunꞌ wan chaꞌ ꞌin Krixtu bra kanꞌ; loꞌo ja nduwe ꞌa tiꞌ wan ꞌin Ndiose chaꞌ suꞌwe ꞌa nka tiye Ni loꞌoan.

2 CORINTIOS 6:1

Taꞌa ngiꞌnian tñan ꞌin Ndiose lka wan; kanꞌ chaꞌ nchkwiꞌ ꞌa ba loꞌo wan, chaꞌ ja tnaꞌ wan chaꞌ suꞌwe ꞌin Ndiose ngwa ti ñaꞌan, ti kwiꞌ chaꞌ suꞌwe kanꞌ nu wa nda Ni chaꞌ kanun niꞌ kasiya ꞌwan. Wa msñi wan chaꞌ kanꞌ ska yaꞌ, kanꞌ chaꞌ ti tukwa la wan chaꞌ kanꞌ ni.

2 SAN JUAN 1:8

Kanꞌ chaꞌ, chaꞌ tiya ti tiꞌ tyiꞌin wan lo chalyuu, chaꞌ ja kjlyaa tiꞌ wan ngwa ti ñaꞌan nchga chaꞌ nu wa ynan wan bra nu mdiꞌin ba seꞌen ndiꞌin wan. Bra kanꞌ kaja nchga chaꞌ suꞌwe nu nchka tiꞌ Ndiose ta Ni ꞌwan bra nu tyii chalyuu.

1 CORINTIOS 15:33

Chañi ꞌa lka chaꞌ re nu nchkwiꞌ nten: “Si xkwiꞌ loꞌo nten kuxi taꞌa ndaꞌaan, kulaa tiꞌian chaꞌ suꞌwe nu ngiꞌnian bra kanꞌ.” Kanꞌ chaꞌ ja tukwa ꞌa wan chaꞌ nu nchkwiꞌ nten nu ndukwin chaꞌ ja ka kuxi tiyean siꞌya ska chaꞌ kuxi nu ngiꞌniin tian.

2 SAN PEDRO 3:14

ꞌWan taꞌa suꞌwe nsuꞌwian, ndiꞌin ta wan ꞌin chaꞌ kanꞌ, kanꞌ chaꞌ ndiꞌin chaꞌ kuꞌni wan xkwiꞌ chaꞌ suꞌwe ti, xkwiꞌ chaꞌ luwi ti loꞌo taꞌa nten wan, chaꞌ tiin ti tyiꞌin niꞌ kasiya ꞌwan bra nu ñaꞌan Ndiose ꞌwan.

HEBREOS 4:1

Wa ykwiꞌ Ndiose ska chaꞌ loꞌoan sikwa, chaꞌ ka tsaan seꞌen ndiꞌin Ni, chaꞌ tyiꞌiin suꞌwean la kanꞌ. Kanꞌ chaꞌ ndiꞌin chaꞌ kuwe tianꞌ ꞌin nchga neꞌ taꞌaan, chaꞌ ja ska neꞌ kanꞌ tyoꞌo ntan neꞌ tuwiin nu ñi nu tsaa seꞌen tyiꞌian loꞌo Ni.

1 CORINTIOS 5:6

Siꞌi chaꞌ suꞌwe ngiꞌni wan bra nu ngiꞌni siyeꞌ wan loꞌo taꞌa wan. ¿Ja jlyo tiꞌ wan sa ñaꞌan ngiꞌni skwan tiyeꞌ a? Ni siya chinꞌ ti skwan tiyeꞌ xuꞌwi lo kata jaxlya, loꞌo kuꞌni ran chaꞌ skwen kaꞌan ꞌa skwan bra kanꞌ.

HEBREOS 4:11

Nchga tsan lye kuꞌnian tñan sikwa, chaꞌ ti xuꞌwi chaꞌ ꞌñaan loꞌo Ndiose, chaꞌ ka tyiꞌiin suꞌwean bra kanꞌ. Ja kuꞌnian sa ñaꞌan nu yꞌni ayman kula kanꞌ, nu ja mdukwa chaꞌ nu ykwiꞌ Ndiose siyaꞌ ti, loꞌo ja ngwa ꞌa ꞌin neꞌ tsaa neꞌ seꞌen ndukwin Ni chaꞌ tsaa neꞌ bra kanꞌ.

2 CORINTIOS 13:5

¡Kuꞌni biyaꞌ wan ꞌwan, ti ykwiꞌ ti wan sikwa! Ngwañaꞌan ka biyaꞌ tiꞌ wan si chañi chaꞌ ti nganun tyukwi chaꞌ ꞌin Jesucristo niꞌ kasiya ꞌwan. Ndiꞌin chaꞌ tyaa yuꞌwi tiꞌ wan chaꞌ nganun Tyiꞌi Jesucristo niꞌ kasiya ꞌin ska wan; ska ti si chaꞌ kwiñi ti msñi wan chaꞌ ꞌin Ndiose, ja kanun Ni loꞌo wan bra kanꞌ.

1 CORINTIOS 10:12

kanꞌ chaꞌ suꞌwe si kuwe tiꞌ wan, chaꞌ ja tyoꞌo ntan wan ꞌin tuwiin nu ñi ka, si nchka tiꞌ wan chaꞌ suꞌwe ti tyiꞌin kasiya ꞌwan, chaꞌ ja tyukwa wan ska chaꞌ kuxi siyaꞌ ti.

HEBREOS 6:11

Loꞌo nchka tiꞌ ba chaꞌ ti kuꞌni wan ngwañaꞌan tyukwi tyempu nde loo la, laja nu ndiꞌin ta wan ꞌin Ndiose sa ñaꞌan bra nu tsaa toꞌo nchga chaꞌ nu wa ykwiꞌ Ni loꞌoan bra kanꞌ.

2 SAN PEDRO 2:18

Jlyo ꞌa tiꞌ neꞌ kwiñi kanꞌ chaꞌ chkwiꞌ loꞌo nten sa ñaꞌan ka kwiñi lyoꞌo neꞌ kanꞌ ꞌin nten nu tka msñi ti chaꞌ suꞌwe ꞌin Jesucristo. Nchka ꞌa tiꞌ neꞌ kwiñi kanꞌ chaꞌ loꞌo nten kanꞌ kuꞌni chaꞌ chen ñaꞌan. Sa ñaꞌan yꞌni neꞌ chaꞌ kuxi ti kulo, bra nu ja ya kunan neꞌ chaꞌ suꞌwe ꞌin Ndiose, kwiꞌ ngwañaꞌan nchka tiꞌ neꞌ kwiñi kanꞌ kuꞌni neꞌ xiyaꞌ.

COLOSENSES 3:5

Kuꞌni tyii wan nchga chaꞌ kuxi nu ndiya ꞌa tiꞌ wan sikwa: ja kuꞌni wan chaꞌ kuxi loꞌo kwilyoꞌo xka nten, ja kuꞌni wan chaꞌ chen ñaꞌan loꞌo taꞌa nten wan, ja xitukwi tiꞌ wan ꞌin taꞌa nten wan, kuꞌni tyii wan nchga lo chaꞌ kuxi nu ndaꞌan ꞌa chaꞌ tiye wan chaꞌ kuꞌni wan, ja xitukwi tiꞌ wan skaa chaꞌ suꞌwe nu nsuꞌwi ꞌin nten chalyuu. Ska nan nu nxitukwi tianꞌ ni, suꞌwa ti lka chaꞌ kuxi kanꞌ ñaꞌan tiꞌ si kuꞌni tnuan ꞌin ska nkwin joꞌo.

EFESIOS 5:3

Loꞌo ni, chaꞌ lka wan nten ꞌin Ndiose, ja suꞌwe si xkwiꞌ chaꞌ ꞌin nu kunaꞌan ndaꞌan chaꞌ tiye wan, ja ska chaꞌ chen ñaꞌan kuꞌni wan loꞌo nten; ni ja siyaꞌ chkwiꞌ wan chaꞌ kanꞌ loꞌo taꞌa nten wan, ja xitukwi tiꞌ wan chaꞌ suꞌwe nu nsuꞌwi ꞌin nten.

GÁLATAS 2:13

Loꞌo kanꞌ kwiꞌ ngwañaꞌan yꞌni xka ta neꞌ judío taꞌa ndyaa ñaꞌan tianꞌ ꞌin Krixtu, ska ti chaꞌ yꞌni neꞌ loꞌo Tyu; kwiꞌ loꞌo Bernabé nka tiye yu kuꞌni yu sa ñaꞌan nu yꞌni neꞌ kanꞌ, chaꞌ tukwa chaꞌ ndaꞌan tiye neꞌ.

1 CORINTIOS 13:8

Ja ndiꞌin chaꞌ tyii chaꞌ ka suꞌwe ka tiyean ñaꞌaan ꞌin nten. Nde loo la tiya bra nu ja chkwiꞌ ꞌa Ndiose loꞌoan lo chalyuu, kwiꞌ ngwañaꞌan ja ndiꞌin ꞌa chaꞌ chkwianꞌ laan chaꞌ nu nchkwiꞌ nten xka la kichen, loꞌo ja ndiꞌin ꞌa chaꞌ ka biyaꞌ tianꞌ nchga chaꞌ ꞌin Ndiose xa nu tiya bra kanꞌ; loꞌo ja siyaꞌ tsaa tii chaꞌ ka suꞌwe ka tiyean ñaꞌaan ꞌin nten.

2 SAN PEDRO 3:11

Tyii nchga nan bra nu tiya tsan kanꞌ, kanꞌ chaꞌ ꞌwan ni, ¿ni sa ñaꞌan tyiꞌin wan lo chalyuu sikwa? Ndiꞌin chaꞌ ka wan nten nu luwi kasiya ꞌin, chaꞌ ka wan nten nu ngwa suꞌwe kasiya ꞌwan chaꞌ ꞌin Ndiose.

2 SAN PEDRO 1:10

Kanꞌ chaꞌ ti kuꞌni la wan nchga chaꞌ suꞌwe kanꞌ, sa ñaꞌan chaꞌ ngwaꞌaǎn lo kityi ti kulo; kwiꞌ ngwañaꞌan, tyuꞌwi la tiꞌ wan chaꞌ wa ngulo suwi Ndiose ꞌwan, chaꞌ ka wan nten ꞌin Ni. Loꞌo bra kanꞌ ja ndiꞌin chaꞌ kanaꞌ kasiya ꞌwan, si ngwañaꞌan kuꞌni wan nchga lo chaꞌ suꞌwe kanꞌ.

SAN LUCAS 22:32

Bra kanꞌ wa mjñaǎn ꞌin Ndiose Stiǐn chaꞌ ꞌiin, Tyu, chaꞌ ja tsaa tii chaꞌ tsaa ñaꞌan tiiꞌ ꞌñaǎn. Bra wa mdijin chaꞌ kuxi kanꞌ ꞌiin, chaꞌ xiyaꞌ chkwiiꞌ chaꞌ ꞌñaǎn, bra kanꞌ ka tayaaꞌ ꞌin xka la taꞌa wan chaꞌ suꞌwe la xñi neꞌ chaꞌ ꞌñaǎn.

TITO 1:15

Luwi ꞌa nchga loo nan, lka chaꞌ nu ndaꞌan tiye nchga nten nu luwi kasiya ꞌin tloo Ndiose; loꞌo nten nu kuxi kasiya ꞌin, ja ska nan luwi ndiya lo chalyuu, nxkeꞌ tiꞌ neꞌ, chunꞌ ja ndyaa ñaꞌan tiꞌ neꞌ chaꞌ nu ñi ꞌin Ndiose. Ngiꞌni neꞌ kanꞌ chaꞌ kuxi, loꞌo ja ndiꞌya yu kwenta chaꞌ kuxi ran, chunꞌ ndiꞌin ꞌa chaꞌ kuxi niꞌ kasiya ꞌin neꞌ.