FILIPENSES 4:3 - Chatino Zona Alta Occidental

³ Loꞌo nuꞌwin ni, nu suꞌwe ꞌa taꞌa ndaꞌaǎn tñan, nchka tiǎnꞌ chaꞌ tayaaꞌ ꞌin taꞌa tyukwaa neꞌ kula kanꞌ, chaꞌ ka suꞌwe tiye neꞌ kanꞌ loꞌo taꞌa neꞌ. Taꞌa tyukwaa neꞌ kula kanꞌ wa yꞌni ꞌa neꞌ tñan chaꞌ kanen la chaꞌ suꞌwe ꞌin Jesús nu ngwa xkanꞌ; suꞌwa ti yꞌni neꞌ kanꞌ tñan loꞌoǔn, loꞌo Clemente, loꞌo xka neꞌ taꞌa ndaꞌan ba tñan. Wa mdaꞌan nin nchga neꞌ kanꞌ lo kityi ꞌin Ndiose, seꞌen ndukwa nin nten nu kaja chalyuu nu ja tsaa tii ꞌa ꞌin neꞌ.

FILIPENSES 4:3 Referans Kwoze

EL APOCALIPSIS 13:8

Loꞌo nchga nten tyukwi ñaꞌaan chalyuu yꞌni tnun neꞌ ꞌin ꞌni kanꞌ bra kanꞌ, nchga nten nu ja ndukwa nin lo kityi ꞌin Ndiose. Nu ngwa ti kulo, bra nu ti ji kwiñan Ni chalyuu, ti bra kanꞌ ngwaꞌan Ni nin nten nu ja tsaa tii ꞌa chalyuu ꞌin. Loꞌo wa nganun kityi kanꞌ chaꞌ ꞌin nu lka ñaꞌan tiꞌ slyaꞌ kanꞌ nu wa yjwi nten ꞌin ska yaꞌ nu ngwa sꞌni bra kanꞌ.

EL APOCALIPSIS 3:5

chaꞌ xkwiꞌ ngaten ꞌa teꞌ kuꞌ nten nu wa mdijin lyo ꞌin kuneꞌ xaꞌan bra kanꞌ” ndukwin Ni. “Ja kuloǔn nin neꞌ kanꞌ lo kityi seꞌen ngwaꞌaǎn nin nchga nten nu mjwi chalyuu kwi ꞌin ngwañaꞌan bra kanꞌ. Xa nu kalaǎn seꞌen ndiꞌin Stiǐn loꞌo angajle ꞌin Ni, chkwiǐnꞌ loꞌo Ni chaꞌ nten ꞌñaǎn lka neꞌ kanꞌ” ndukwin Ni.

SAN LUCAS 10:20

Loꞌo ni, ja nꞌni chaꞌ ka suꞌwe nka tiye wan chaꞌ nu ynan ti kwiꞌin kuxi kanꞌ tñan nu ngulo wan ꞌin ran, suꞌwe la ka tiye wan chaꞌ wa ngwaꞌan Ndiose nin wan nde seꞌen ndiꞌin Ni nde niꞌ kwan.

FILIPENSES 1:27

Kanꞌ chaꞌ ni, kiꞌya wan kwenta sa ñaꞌan ndiꞌin chaꞌ kuꞌni wan lo chalyuu xa wa msñi wan chaꞌ ꞌin Krixtu. Si ngwañaꞌan kuꞌni wan, bra kanꞌ ja nꞌni chaꞌ ni siya kaǎn kichen tyi wan, ni siya ja ka kaǎn. Ja chan kaja chaꞌ ꞌñaǎn chaꞌ ska ti chaꞌ nsuꞌwi tiye wan loꞌo taꞌa wan, chaꞌ nsuꞌwi ꞌa chaꞌ tlyu tiꞌ ꞌwan loꞌo nten nu nxuun loꞌo wan; ja chan suꞌwa ti ndaꞌan chaꞌ tiye wan loꞌo taꞌa wan, ni siya chan ꞌa nchkwiꞌ wan loꞌo neꞌ chaꞌ xñi neꞌ chaꞌ suꞌwe kanꞌ ꞌin Krixtu.

EL APOCALIPSIS 21:27

loꞌo ja ska la chaꞌ kuxi sten kichen kanꞌ. Kwiꞌ ngwañaꞌan, nchga nten nu ngiꞌni chaꞌ kuxi loꞌo ya ñaꞌan ti nten nu ja lka kwilyoꞌo neꞌ, loꞌo neꞌ kwiñi, ja kaja chabiyaꞌ sten neꞌ kichen kanꞌ. Ska lo ti nten nu ndukwa nin lo kityi nu ndukwa yaꞌ nu lka ñaꞌan tiꞌ slyaꞌ kanꞌ, kanꞌ ti nten kaja chabiyaꞌ tiyan kichen kanꞌ bra kanꞌ. Kityi kanꞌ lka nu nchkwiꞌ ti ka nu ja tsaa tii ꞌa chalyuu ꞌin.

EL APOCALIPSIS 17:8

ꞌNi nu wa naꞌaan kwa, luꞌu iꞌ nu ngwa sꞌni, loꞌo ja luꞌu iꞌ ni; kwiꞌ ngwañaꞌan, ndse ti tyuꞌu iꞌ xiyaꞌ, ni siya ndiꞌin iꞌ tu tiyu kiꞌñi kanꞌ. Tyuꞌu iꞌ ti xiꞌi chaꞌ tyaa iꞌ la chalyuu tla seꞌen tyii chaꞌ ꞌin iꞌ siyaꞌ ti ―ndukwin―. Loꞌo nchga nten nu ja ndukwa nin lo kityi ꞌin Ndiose ni, kaꞌan ꞌa chaꞌ tyaꞌan tiye neꞌ bra nu ñaꞌan neꞌ ꞌin ꞌni kanꞌ bra kanꞌ. Ti kulo xa nu ti ji tyisnan chalyuu re, wa ngwaꞌan Ndiose nin nten nu wa mda Ni chalyuu nu ja tsaa tii ꞌa ꞌin neꞌ. ꞌNi kanꞌ ni, luꞌu iꞌ nu ngwa sꞌni, ni siya ja luꞌu iꞌ ni; loꞌo ti tyuꞌu la iꞌ xiyaꞌ ni siya ti xiꞌi ti.

FILIPENSES 4:2

Loꞌo ꞌwan Evodia loꞌo Síntique ni, kuꞌni wan chaꞌ tlyu tiꞌ ꞌñaǎn chkwiǐnꞌ ska chaꞌ loꞌo wan: Ndiꞌin chaꞌ suꞌwa ti xuꞌwi tiye wan loꞌo taꞌa wan. Jesús nu nka Xꞌnaan yꞌni chaꞌ lka wan taꞌaan, kanꞌ chaꞌ kuꞌni wan chaꞌ katin chaꞌ wsuun nu nsuꞌwi ꞌwan loꞌo taꞌa wan.

ROMANOS 16:12

loꞌo Trifena loꞌo Trifosa, nu ngiꞌni ꞌa tñan ꞌin Xꞌnaan; loꞌo Pérsida taꞌa suꞌwe nsuꞌwiǐn, chaꞌ kaꞌan ꞌa tñan suꞌwe ꞌin nu nka Xꞌnaan wa yꞌni neꞌ kanꞌ;

ROMANOS 16:9

loꞌo Urbano, taꞌa ngiꞌniǐn tñan ꞌin Jesucristo; loꞌo Estaquis, kwiꞌ ngwañaꞌan ndiya ꞌa tiǎnꞌ ꞌin yu;

ROMANOS 12:1

ꞌWan taꞌa ndiꞌin chaꞌ ꞌñaan loꞌo Krixtu, chaꞌ lye ꞌa nchka tꞌnan tiꞌ Ni ꞌñaan, kanꞌ chaꞌ nchkwiǐnꞌ loꞌo wan ni. Ta wan tyukwi ñaꞌaan wan ꞌin Ndiose, chaꞌ kuꞌni wan nchga tñan nu nchka tiꞌ Ni chaꞌ kuꞌni wan lo chalyuu; ta wan tyukwi ñaꞌaan wan ꞌin Ndiose chaꞌ xkwiꞌ chaꞌ ꞌin Ni tyiꞌin wan lo chalyuu, chaꞌ wa lka wan sa ñaꞌan lka ska lomstan nu luꞌu. Ndiya tiꞌ Ndiose chaꞌ kuꞌni wan ngwañaꞌan; chaꞌ nu lka wan nten ꞌin Ni, ndiꞌin chaꞌ kuꞌni wan ngwañaꞌan.

EL APOCALIPSIS 20:12

Loꞌo naꞌaǎn chaꞌ la kwa ndiꞌin nchga nten nu wa ngujwi, ni siya neꞌ kula, ni siya neꞌ kuneꞌ, ndiꞌin neꞌ tloo yka xlya tnun seꞌen ndukwa Ndiose bra kanꞌ. Kwiꞌ ngalaa kityi kanꞌ bra kanꞌ, loꞌo ngalaa xka kityi kanꞌ seꞌen ndukwa nin nten, nchga nten nu wa mjwi chalyuu nu ja tsaa tii ꞌa ꞌin neꞌ, chaꞌ wa ndyuꞌu neꞌ xiyaꞌ bra kanꞌ. Loꞌo chunꞌ kityi nu ngwaꞌan Ndiose yꞌni biyaꞌ Ni ꞌin nchga nten nu wa ngujwi kanꞌ, chaꞌ lo kityi kanꞌ ndukwa nchga tñan nu yꞌni neꞌ xa nu yan neꞌ lo chalyuu.

COLOSENSES 1:7

Wa ynan wan chaꞌ kanꞌ bra nu ngwaꞌu Epafras ꞌwan; suꞌwe ꞌa ngiꞌni yu kanꞌ tñan ꞌin Krixtu loꞌo ba. Jlyo tiꞌ ba chaꞌ suꞌwe ꞌa nchkwiꞌ yu chaꞌ ꞌin Krixtu loꞌo neꞌ nchga seꞌen ndaꞌan yu chaꞌ ꞌwa.

EL APOCALIPSIS 20:15

Kwiꞌ nde kwa xkwan Ndiose ꞌin nchga nten nu ja ndukwa nin lo kityi ꞌin Ni, tsaa neꞌ la lo tiyuꞌ seꞌen ndiꞌin kiiꞌ kanꞌ. Wa ytsaꞌ kityi kanꞌ ti ka nu ja tsaa tii ꞌa chalyuu ꞌin.

FILIPENSES 1:5

Ti bra nu ynan wan chaꞌ suꞌwe ꞌin Krixtu ti kulo, ñaꞌan ti ja ya tyii chaꞌ ndayaꞌ wan ꞌñaǎn chaꞌ chkwiǐnꞌ chaꞌ kanꞌ loꞌo xka ta nten nu ndiꞌin tijyuꞌ la;

FILIPENSES 1:7

Suꞌwe chaꞌ ngwañaꞌan ndaꞌan chaꞌ tiyeěn chaꞌ ꞌwan, chaꞌ nchga tsan suꞌwe ꞌa nka tiyeěn naꞌaǎn ꞌwan; suꞌwa ti nka tiye wan loꞌoǔn, suꞌwe ꞌa ngiꞌni wan loꞌoǔn chaꞌ ngiꞌnian tñan ꞌin Jesucristo. Lye ꞌa ndayaꞌ wan ꞌñaǎn nu ngwa xkanꞌ bra nu mdiꞌiǐn tloo neꞌ nu nka ndloo, chaꞌ mdoꞌoǔn luwiǐn tloo neꞌ kanꞌ. Bra kanꞌ ykwiǐnꞌ loꞌo neꞌ chaꞌ suꞌwe ꞌa lka chaꞌ nu wa ytsaꞌ Ndiose ꞌñaǎn, loꞌo ngwañaꞌan ytsaǎnꞌ ñi ꞌin neꞌ sa ñaꞌan lka chaꞌ nu ñi kanꞌ. Loꞌo ni, ti ndayaꞌ ꞌa wan ꞌñaǎn, ni siya nsuꞌwiǐn niꞌ ñaꞌan chkwan chunꞌ chaꞌ nchkwiǐnꞌ chaꞌ ꞌin Jesús loꞌo nten.

FILIPENSES 1:12

ꞌWan taꞌa msñian chaꞌ ꞌin Krixtu, nchka tiǎnꞌ chaꞌ ka biyaꞌ suꞌwe tiꞌ wan chaꞌ wa ynen la chaꞌ suꞌwe ꞌin Jesús lo kichen re, chunꞌ nu tiꞌí nu ndijiǐn re.

FILIPENSES 1:16

Suꞌwe ꞌa nka tiye neꞌ kanꞌ ñaꞌan neꞌ ꞌin Ndiose, loꞌo ngwañaꞌan jlyo tiꞌ neꞌ chaꞌ wa nda Ni tñan ꞌñaǎn chaꞌ xkweěn ꞌin nten nu nxuun loꞌoan chaꞌ suꞌwe nu ꞌin Krixtu. Nten nu chen nka tiye ni, siꞌi tyukwi ti tiye neꞌ nchkwiꞌ neꞌ chaꞌ ꞌin Krixtu; nchka tiꞌ neꞌ tyijin lyo neꞌ ꞌin taꞌa nten neꞌ. Loꞌo ngwañaꞌan, nchka ꞌa tiꞌ neꞌ kanꞌ ta la neꞌ nu tiꞌí ꞌñaǎn laja nu nsuꞌwiǐn niꞌ ñaꞌan chkwan re.