EFESIOS 3:20 - Chatino Zona Alta Occidental

²⁰ Suꞌwe sikwa. Chkwianꞌ chaꞌ tlyu ꞌa lka Ndiose. Nchka ꞌa ꞌin Ni, ngiꞌni Ni kwenta ꞌin nchga chaꞌ nu njñaan ꞌin Ni, ni siya ti ji chkwianꞌ loꞌo Ni; ja nchka ka biyaꞌ tianꞌ sa ñaꞌan ngiꞌni Ni nchga chaꞌ kanꞌ. Ti kwiꞌ Ndiose ngiꞌni tñan loꞌoan, la niꞌ kasiya ꞌñaan siyaꞌ ti, chaꞌ kuꞌni Ni nchga tñan nu nchka tiꞌ Ni kuꞌni Ni loꞌoan.

EFESIOS 3:20 Referans Kwoze

2 CORINTIOS 9:8

Loꞌo nchka ꞌa ꞌin Ndiose tayaꞌ Ni ꞌwan loꞌo kaꞌan la lo nan, chaꞌ kaja nchga nan nu lyiji ꞌwan; ti kaja la ñaꞌan tayaꞌ wan ꞌin xka ta nten loꞌo nchga tñan suꞌwe bra kanꞌ.

ROMANOS 4:21

chaꞌ jlyo tiꞌ yu chaꞌ ka ꞌin Ni kuꞌni tyii Ni ska chaꞌ nu mskanꞌ Ni loꞌo yu.

SAN JUDAS 1:24

Ska ti Ndiose nsuꞌwi lo chalyuu. Loꞌo kulaa Ni ꞌñaan chabiyaꞌ ꞌin Jesucristo nu nka Xꞌnaan; ska ti Ndiose nchka ꞌin Ni xñi Ni kwenta ꞌñaan, bra nu ndaꞌaan tuwiin suꞌwe nu ngwaꞌu Ni ꞌñaan. Tayaꞌ Ni ꞌñaan chaꞌ ja tyijin snan kiyaanꞌ, chaꞌ ja tyoꞌo tsuanꞌ tuꞌwa tuwiin kanꞌ, sa ñaꞌan bra nu kalaan suꞌwe ti seꞌen luwi ꞌa xaa, seꞌen ndiꞌin Ndiose. Luwi siyaꞌ ti ka kasiya ꞌñaan bra nu wa ngalaan seꞌen ndiꞌin Ni; kwiꞌ ngwañaꞌan, suꞌwe ꞌa ka tiyean bra kanꞌ. Kanꞌ chaꞌ ni, kuꞌniin tnuan ꞌin Ndiose nu ndukwa seꞌen tlyu la nde niꞌ kwan, chaꞌ ska ti Ndiose nsuꞌwi nu tlyu ꞌa lka; ska ti Ndiose lka ndloo la ꞌin nchga loo nan nu nsuꞌwi lo chalyuu, kwiꞌ ngwañaꞌan ska ti Ndiose nchka ꞌin Ni kuꞌni Ni nchga loo chaꞌ tnun siyaꞌ ti. Luꞌu Ndiose ti bra nu ja ya tyaꞌ chalyuu, kwiꞌ ngwañaꞌan ti luꞌu Ni sa bra ni; loꞌo ja tsaa tii ꞌa chaꞌ luꞌu Ni nde loo la. Ngwañaꞌan ka sikwa.

1 CORINTIOS 2:9

Sa ñaꞌan lka chaꞌ re nu ndukwa lo kityi kula, ngwañaꞌan lka chaꞌ kanꞌ: Wa yꞌni xuꞌwe Ndiose chaꞌ suꞌwe nu kaja ꞌin nten nu nsuꞌwi tiye ꞌin Ni; kanꞌ lka chaꞌ nu ja ya ñaꞌan nten chalyuu, chaꞌ nu ja ya kunan nten, ti kwiꞌ ti chaꞌ, ja mgii tiꞌ neꞌ chaꞌ ka chaꞌ kanꞌ.

EFESIOS 1:19

Njnaǎn ꞌin Ni chaꞌ ka biyaꞌ suꞌwe tiꞌ wan nchga chaꞌ re, chaꞌ nu ngiꞌni ꞌa Ni tñan niꞌ kasiya ꞌñaan, nchgaan nu msñian chaꞌ ꞌin Ni. Tñan nu ngiꞌni Ni loꞌoan chaꞌ kaan nten ꞌin Ni,

HEBREOS 7:25

Nchga bra, ni siya ni, ni siya nde loo la, ka ꞌin Ni kulaa Ni ꞌin nchga nten nu xñi chaꞌ ꞌin Ndiose. Nchga tyempu ndiꞌin Jesús nde seꞌen ndiꞌin Ndiose, chaꞌ chkwiꞌ Ni loꞌo Sti Ni chaꞌ ꞌñaan.

EFESIOS 3:7

Wa nda Ndiose tñan kanꞌ ꞌñaǎn chaꞌ tsaꞌaǎn chkwiǐnꞌ loꞌo nten, ni siya tijyuꞌ ndiꞌin neꞌ, chunꞌ chaꞌ suꞌwe ꞌa nka tiye Ndiose ñaꞌan Ni ꞌñaǎn. Tlyu ꞌa tñan yꞌni Ni loꞌoǔn chaꞌ kaǎn tñan kanꞌ,

ROMANOS 16:25

Kuꞌni tnuan ꞌin Ndiose sikwa. Ka ꞌin Ni kuꞌni Ni chaꞌ ngula tiye wan, chaꞌ tyiꞌin wan sa ñaꞌan nu ndiꞌin chaꞌ tyiꞌian lo chalyuu, xa nu yteen suꞌwean chaꞌ ꞌin Jesús. Chaꞌ suꞌwe nu ndiꞌin ꞌin Jesucristo ni, kanꞌ lka chaꞌ nu nchkwiǐnꞌ loꞌo nten, ni siya tyun ꞌa siyentu yijan yuꞌwi kutsiꞌ chaꞌ nu nchkwiꞌ sa ñaꞌan nu kuꞌni Ndiose nde loo la.

COLOSENSES 1:29

Kanꞌ chaꞌ lye ꞌa ngiꞌniǐn tñan; ngula ꞌa tñan ngiꞌniǐn, loꞌo ngwañaꞌan tlyu ꞌa jwersa nda ykwiꞌ Krixtu ꞌñaǎn chaꞌ xuꞌwi niꞌ kasiya ꞌñaǎn, chaꞌ taloǔn kuꞌniǐn tñan re.

SAN JUAN 10:10

’Xkwiꞌ tñan kunan ngiꞌni neꞌ kwiñi kanꞌ ―ndukwin Jesús―. Ndaꞌan neꞌ kanꞌ chaꞌ kuꞌni ñuꞌun neꞌ ꞌin nten, chaꞌ kanaꞌ kasiya ꞌin nten kanꞌ; loꞌo naꞌ ni, wa ndijyaǎn chaꞌ taǎn chalyuu suꞌwe ꞌin nten, seꞌen ka tyiꞌin neꞌ tyukwi ti tiye neꞌ bra kanꞌ ―ndukwin―.

SANTIAGO 4:12

Loꞌo Ndiose ni, ska ti Ndiose ngulo tñan kanꞌ ꞌin nten ti kulo; kwiꞌ ska ti Ndiose kuꞌni biyaꞌ ꞌin nchga nten loꞌo chaꞌ kanꞌ nde loo la. Ska ti Ndiose nchka ꞌin Ni kulaa Ni ꞌin nten, xa nu kuꞌni tyii Ni kiꞌya nu ndiꞌin ꞌin neꞌ; kwiꞌ ngwañaꞌan, Ndiose lka nu nchka kuꞌni tyii ꞌin nten siyaꞌ ti, xa nu nchka tiꞌ ti Ni kuꞌni Ni. Ja suꞌwa wan loꞌo Ndiose, kanꞌ chaꞌ ja nsuꞌwi chabiyaꞌ ꞌwan chaꞌ kuꞌni biyaꞌ wan ꞌin taꞌa nten wan.

1 TIMOTEO 1:14

Loꞌo suꞌwe ꞌa ngwa tiye Xꞌnaan naꞌan Ni ꞌñaǎn, kanꞌ chaꞌ loꞌoǔn, msñiǐn chaꞌ ꞌin Jesucristo bra kanꞌ; loꞌo ni, suꞌwe ꞌa nka tiyeěn naꞌaǎn ꞌin Jesús, kwiꞌ ngwañaꞌan suꞌwe nka tiyeěn naꞌaǎn ꞌin nchga nten.

HEBREOS 11:19

Nchka ꞌin Ndiose kuꞌni chaꞌ tyuꞌu Isaac xiyaꞌ si wa ngujwi, nka tiye Abraham; kanꞌ chaꞌ mslyaa yu yꞌni yu ngwañaꞌan loꞌo sñiꞌ yu. Ti kwiꞌ bra nu nskwa Isaac lo msaa chaꞌ kaja, ngulaa Ni ꞌin nu xuwe kanꞌ, xiyaꞌ ndya Ni ꞌin yu ꞌin Abraham sti yu bra kanꞌ; ja ngujwi nu xuwe kanꞌ bra kanꞌ.

2 SAN PEDRO 1:11

Kanꞌ ka tyaꞌan suꞌwe la wan tuwiin ꞌin Ndiose bra kanꞌ. Jesucristo, Xꞌnaan nu nka ndloo la ꞌwan, ti kwiꞌ lka nu ngulaa ꞌñaan ꞌin nchga chaꞌ kuxi. Loꞌo ja tsaa tii ꞌa tsan chaꞌ ka Ni ndloo la. Bra kanꞌ suꞌwe ti stean seꞌen ndiꞌin Ndiose nde niꞌ kwan.

SAN MATEO 3:9

Ja xkeꞌ ꞌa tiꞌ wan chaꞌ ka suꞌwe ꞌwan tloo Ndiose si xkwiꞌ ndyuꞌwi tiꞌ wan ꞌin ayman kula ꞌwan, ñaꞌan tiꞌ ayman kula Abraham kanꞌ. Ja talo Ndiose ꞌin chaꞌ kuxi nu ngiꞌni wan siyaꞌ ti, ni siya nten taꞌa ayman Abraham lka wan, nchkwiꞌ wan. Nan kwiñi wan. Si nchka tiꞌ Ndiose, ka ꞌin Ni kwiñan Ni xka ta nten loꞌo kee ndiꞌin tuꞌwa chku re, chaꞌ ka neꞌ taꞌa ayman Abraham; ka ꞌin Ni si nchka tiꞌ Ni. Loꞌo ja tukwa Ndiose chaꞌ ꞌwan bra kanꞌ.