EFESIOS 2:3 - Chatino Zona Alta Occidental

³ Nchgaan ni, chañi chaꞌ sa ñaꞌan nu ngiꞌni neꞌ kanꞌ chaꞌ kuxi, kwiꞌ ngwañaꞌan yꞌnian nu ngwa ti sꞌni; yꞌnian nchga chaꞌ kuxi nu mjñan kasiya ꞌñaan. Tñan nu ngwa tianꞌ kuꞌnian, ti ykwiinꞌ tian, xkwiꞌ tñan kanꞌ yꞌnian bra kanꞌ; nchga chaꞌ kuxi nu yan kean ti ykwiinꞌ tian, yꞌnian chaꞌ kanꞌ. Kanꞌ chaꞌ mdiꞌin chaꞌ ta Ndiose nu tiꞌí ꞌñaan, chaꞌ msinꞌ ꞌa tiꞌ Ni siꞌya chaꞌ kuxi nu yꞌnian; loꞌo suꞌwa ti ta Ndiose nu tiꞌí ꞌñaan loꞌo nchga nten chalyuu bra kanꞌ.

EFESIOS 2:3 Referans Kwoze

TITO 3:3

Nu ngwa sꞌni la, ja ndiꞌyaan kwenta siyaꞌ ti sa ñaꞌan nu ndiꞌin chaꞌ ꞌin Ndiose; ja ndukwaan ꞌaan chaꞌ ꞌin Ni bra kanꞌ, chaꞌ wa mñi lyoꞌo kuneꞌ xaꞌan ꞌñaan chaꞌ kuꞌnian nchga chaꞌ kuxi nu jñan kasiya ꞌñaan chaꞌ kuꞌnian. Mdiya ꞌa tianꞌ ngiꞌnian chaꞌ kuxi kanꞌ bra kanꞌ, liyeꞌ ꞌa tianꞌ ꞌin taꞌa ntean. Naꞌan tiꞌí nten ꞌñaan, kwiꞌ ngwañaꞌan nan, naꞌan tiꞌian ꞌin nten.

1 SAN PEDRO 1:14

Tukwa suꞌwe wan chaꞌ nu ykwiꞌ Ndiose, chaꞌ ka wan sñiꞌ nu suꞌwe ꞌa ngiꞌni; ja kuꞌni wan ya ñaꞌan ti chaꞌ kuxi nu ndiya tiꞌ wan, sa ñaꞌan nu yꞌni wan ti sꞌni, xa nu ja ya ka biyaꞌ tiꞌ wan chaꞌ suꞌwe nu ngiꞌni Ndiose.

EFESIOS 4:22

kanꞌ chaꞌ kuꞌni tyii wan chaꞌ kuxi nu yꞌni wan nu ngwa sꞌni. Kaꞌan ꞌa chaꞌ ndatsaa chaꞌ kuxi kanꞌ ꞌwan nu ngwa bra kanꞌ, mdiya ꞌa tiꞌ wan chaꞌ kuxi kanꞌ, loꞌo siyaꞌ ti kanaꞌ chalyuu ꞌwan siꞌya chaꞌ kuxi kanꞌ.

ROMANOS 13:14

Ta wan chabiyaꞌ chaꞌ ka ndloo la Jesucristo nu nka Xꞌnaan tyukwi ñaꞌaan wan, loꞌo ja kuꞌnian ꞌaan ya ñaꞌan ti chaꞌ kuxi nu mdiya ꞌa tianꞌ nu ngwa sꞌni chunꞌ lkaan nten chalyuu.

ROMANOS 6:12

Kanꞌ chaꞌ ni, ja ta wan chabiyaꞌ chaꞌ ka chaꞌ kuxi kanꞌ ndloo ꞌwan xa ndiꞌin wan lo chalyuu. Loꞌo ja suꞌwe kuꞌnian nchga chaꞌ kuxi nu jñan tiyean chaꞌ kuꞌnian, chaꞌ lkaan nten chalyuu.

1 SAN JUAN 2:16

Nchga chaꞌ kuxi nu ngiꞌni chaꞌ ja xñi suꞌwe nten chaꞌ ꞌin Ndiose, siꞌi seꞌen ndiꞌin Ndiose Stian ndyoꞌo chaꞌ kanꞌ. Nchga chaꞌ kuxi nu ndiya tiꞌ nten, chaꞌ kalaꞌ chinꞌ tiꞌ neꞌ, loꞌo nchga chaꞌ kuxi nu nchka tiꞌ neꞌ kuꞌni neꞌ xa nu ñaꞌan neꞌ ꞌin ran, loꞌo nchga nan nu nchka tiꞌ neꞌ kaja ꞌin neꞌ, chaꞌ kuꞌni siyeꞌ neꞌ loꞌo taꞌa nten neꞌ, lo chalyuu ti ndyoꞌo nchga chaꞌ kuxi kanꞌ.

EFESIOS 2:2

Nu ngwa bra kanꞌ, loꞌo wan yꞌni wan nchga chaꞌ kuxi nu ngiꞌni nten chalyuu; mdukwa ꞌa wan tñan nu ngulo kuneꞌ xaꞌan nu nka ndloo la ꞌin nchga kwiꞌin kuxi nu nsuꞌwi lo chalyuu, ti kwiꞌ chaꞌ kuxi kanꞌ lka nu ndatsaa ꞌin nten chalyuu chaꞌ ja kunan neꞌ chaꞌ nu nchkwiꞌ Ndiose.

SAN JUAN 8:44

Ti kwiꞌ kuneꞌ xaꞌan lka sti wan, loꞌo nchka tiꞌ wan kuꞌni wan ti kwiꞌ tñan nu ngulo nu kanꞌ ꞌwan. Ti bra nu mdyisnan chalyuu, ti bra kanꞌ mdyisnan nu kanꞌ ngiꞌni ñuꞌun ꞌin nten ―ndukwin Jesús―. Ja mdoꞌo nu kanꞌ seꞌen ndukwa kiyaꞌ chaꞌ nu ñi, kanꞌ chaꞌ ja siyaꞌ ndiya chaꞌ nu ñi ꞌin nu kanꞌ ―ndukwin―. Xa nu kwiñi lyoꞌo nu kanꞌ ꞌin nten, chaꞌ ꞌin ti ykwiꞌ ti lka chaꞌ kwiñi nu nchkwiꞌ loꞌo neꞌ. Ska nu kwiñi tnun lka kuneꞌ xaꞌan, ti kwiꞌ kanꞌ lka sti nchga nu kwiñi.

2 CORINTIOS 7:1

ꞌWan taꞌaan, nu suꞌwe ꞌa nka tiyeěn ñaꞌaǎn ꞌwan, kanꞌ lka ska chaꞌ nu wa mskanꞌ Ndiose loꞌoan, chaꞌ ka ꞌñaan chunꞌ ndiꞌin la. Kanꞌ chaꞌ sikwa, ndiꞌin chaꞌ kulaa yaanꞌ nchga chaꞌ kuxi chaꞌ ja ka ñuꞌun kasiya ꞌñaan, ja ka ñuꞌun tyukwi ñaꞌaan. Kwiꞌ ngwañaꞌan, lye ꞌa kuꞌnian tñan chaꞌ kaan nten ꞌin Ndiose; nchga tñan nu kuꞌnian lo chalyuu, kuꞌnian ꞌin ran ñaꞌan tiꞌ si wa nduun Ndiose ñaꞌan kwiꞌya Ni ꞌñaan.

1 CORINTIOS 4:7

¿Ni chaꞌ lka chaꞌ ndloo ꞌa chaꞌ ꞌwan, ti ykwiꞌ ti wan, loꞌo ja nduwe tiꞌ wan chaꞌ ꞌin xka ta nten? Ndiose nda nchga nan nu nsuꞌwi ꞌwan, nchga tñan nu nchka ꞌwan; kanꞌ chaꞌ ja ndiꞌin chaꞌ kuꞌni siyeꞌ wan loꞌo taꞌa nten wan sikwa. Ja mxaꞌan chalyuu ꞌwan chunꞌ tñan nu ngiꞌni wan, ti ykwiꞌ ti wan; Ndiose ngiꞌni chaꞌ lka wan sa ñaꞌan nu lka wan ni.

ROMANOS 7:18

Jlyo tianꞌ chaꞌ ja suꞌwe lka chaꞌ nu yuꞌwi niꞌ kasiya ꞌñaǎn, chaꞌ nten chalyuu ti lkaǎn; ni siya ngwa tiǎnꞌ kuꞌniǐn xkwiꞌ chaꞌ suꞌwe nu ngwa xkanꞌ, ja ngwa ꞌñaǎn siyaꞌ ti.

SAN MARCOS 4:19

loꞌo kaꞌan ꞌa chaꞌ ndaꞌan tiye neꞌ sa ñaꞌan kuꞌni neꞌ chaꞌ ka kuliyaꞌ neꞌ bra kanꞌ. Ndaꞌan naan ꞌa neꞌ sa ñaꞌan ka kaja kaꞌan ꞌa chaꞌ suꞌwe nu nsuꞌwi chalyuu re ꞌin neꞌ, chaꞌ ka suꞌwa neꞌ loꞌo nten nu tnun la nchka; kanꞌ chaꞌ ja nchka kanun chaꞌ suꞌwe niꞌ kasiya ꞌin neꞌ kanꞌ.

ROMANOS 11:30

Kwiꞌ ngwañaꞌan ꞌwan, ja ynan wan chaꞌ ꞌin Ndiose nu ngwa ti sꞌni; loꞌo ni, nchka tꞌnan tiꞌ Ni ꞌwan chunꞌ nu ja ndyaa ñaꞌan tiꞌ neꞌ judío ꞌin Ni.

ROMANOS 9:22

Ngwa tiꞌ Ndiose kwaꞌu ꞌñaan sa ñaꞌan ta Ni nu tiꞌí ꞌin nten xaꞌan, chaꞌ ka biyaꞌ tianꞌ chaꞌ ngula ꞌa ngiꞌni Ni tñan lo chalyuu. Wa sꞌni ꞌa ndalo Ni ꞌin nten xaꞌan kanꞌ, ni siya nsuꞌwi ꞌa chabiyaꞌ ꞌin Ndiose chaꞌ kasinꞌ tiꞌ Ni ꞌin neꞌ, chaꞌ kuꞌni tyii Ni ꞌin neꞌ siyaꞌ ti.

SAN JUAN 1:13

Loꞌo nten nu lka sñiꞌ Ndiose ni, ja ndlya neꞌ kanꞌ sa ñaꞌan nu ndlya nchga sñiꞌ nten; sñiꞌ Ndiose lka neꞌ kanꞌ, siꞌi ska nten chalyuu lka nu yꞌni kwi kasiya ꞌin neꞌ kanꞌ.

2 SAN PEDRO 2:18

Jlyo ꞌa tiꞌ neꞌ kwiñi kanꞌ chaꞌ chkwiꞌ loꞌo nten sa ñaꞌan ka kwiñi lyoꞌo neꞌ kanꞌ ꞌin nten nu tka msñi ti chaꞌ suꞌwe ꞌin Jesucristo. Nchka ꞌa tiꞌ neꞌ kwiñi kanꞌ chaꞌ loꞌo nten kanꞌ kuꞌni chaꞌ chen ñaꞌan. Sa ñaꞌan yꞌni neꞌ chaꞌ kuxi ti kulo, bra nu ja ya kunan neꞌ chaꞌ suꞌwe ꞌin Ndiose, kwiꞌ ngwañaꞌan nchka tiꞌ neꞌ kwiñi kanꞌ kuꞌni neꞌ xiyaꞌ.

2 SAN PEDRO 2:14

Xkwiꞌ chaꞌ kuxi ndaꞌan tiye neꞌ kwiñi kanꞌ bra nu ñaꞌan neꞌ ꞌin ska nu kunaꞌan, chaꞌ ja tyii chaꞌ xitukwi tiꞌ neꞌ ꞌin nu kunaꞌan chaꞌ kuꞌni neꞌ chaꞌ kuxi loꞌo. Kwiꞌ ngwañaꞌan, bra ti kwaꞌu neꞌ kanꞌ chaꞌ kuxi ꞌin xka ta nten nu ja ya ka biyaꞌ suꞌwe tiꞌ chaꞌ ꞌin Jesucristo. Wa yꞌni xaꞌan ꞌa neꞌ kwiñi kanꞌ nchga lo chaꞌ kuxi, kanꞌ chaꞌ lye ꞌa nxitukwi tiꞌ neꞌ ska nan; loꞌo ja ngalaꞌ tiꞌ neꞌ kanꞌ siyaꞌ ti. Wa lka ngulo Ndiose yuweꞌ ꞌin neꞌ kwiñi kanꞌ.

1 TIMOTEO 6:9

Ndiya nten nu nchka ꞌa tiꞌ chaꞌ ka kuliyaꞌ la neꞌ. Ja suꞌwe chaꞌ kanꞌ, chaꞌ bra kanꞌ tatsaa ꞌa kuneꞌ xaꞌan ꞌin neꞌ chaꞌ sten la neꞌ chaꞌ kuxi; chunꞌ ndiꞌin la tyii chalyuu ꞌin neꞌ bra kanꞌ, kanaꞌ kasiya ꞌin neꞌ.

GÁLATAS 3:22

Nchkwiꞌ kityi ꞌin Ndiose chaꞌ nu chaꞌ kuxi nu ngiꞌni nchga nten chalyuu, kanꞌ nka ndloo la ꞌin neꞌ, ñaꞌan tiꞌ si nu wa lka neꞌ presu ꞌin ran. Bra nu jlyo tianꞌ chaꞌ ti kwiꞌ chaꞌ kuxi nu ngiꞌnian, kanꞌ lka ndloo la ꞌñaan, bra kanꞌ ka ꞌin Ni kulaa Ni ꞌñaan bra kanꞌ; ta Ni chalyuu kwi ꞌñaan bra kanꞌ, bra nu tsaa ñaꞌan tianꞌ ꞌin Jesucristo. Kanꞌ lka chaꞌ suꞌwe nu wa mskanꞌ Ndiose loꞌoan.

ROMANOS 1:24

Kanꞌ chaꞌ wa ngulaa yaꞌ Ndiose ꞌin neꞌ xaꞌan kanꞌ; ti nda Ni chinꞌ tyempu ꞌin neꞌ chaꞌ kuꞌni neꞌ chaꞌ chen ñaꞌan loꞌo taꞌa neꞌ, ska lo chaꞌ kuxi nu njyuꞌu ꞌa tianꞌ chkwianꞌ sa ñaꞌan ngiꞌni neꞌ.

1 SAN JUAN 2:8

Siꞌi ngwañaꞌan ngiꞌni nten chalyuu, kanꞌ chaꞌ nchkwiǐnꞌ chaꞌ ska tñan kwi lka ran. Nu ngwa xkanꞌ ti mdyisnan Jesucristo ngwaꞌu yu ꞌñaan sa ñaꞌan ndiꞌin chaꞌ ka suꞌwe tiyean ñaꞌaan ꞌin xka la taꞌa ntean, loꞌo wa yꞌni Jesús chaꞌ ka kuꞌnian tñan kanꞌ. Ska tñan kwi lka chaꞌ kanꞌ, chaꞌ wa tyii ti chaꞌ tla niꞌ kasiya ꞌñaan; loꞌo ni, kanun chaꞌ suꞌwe nu ndiꞌin ꞌin Jesucristo niꞌ kasiya ꞌñaan, ñaꞌan tiꞌ ska xaa ndyuwi nu ngiꞌni xaa seꞌen ndiꞌian.

LOS HECHOS 14:16

Nu ngwa sꞌni la mdalo ꞌa Ndiose ꞌin nchga nten chalyuu, ni siya yꞌni neꞌ nchga lo chaꞌ kuxi nu nchka tiꞌ neꞌ kuꞌni neꞌ.

ROMANOS 2:14

Ndiya nten, neꞌ xka laꞌa tsuꞌ, nu chaꞌ ꞌin ti neꞌ ngiꞌni sa ñaꞌan nu ndukwa lo kityi ꞌin Ndiose, ni siya ja ya kunan neꞌ chaꞌ kanꞌ. Ngwañaꞌan ka jlyo tianꞌ chaꞌ nchka biyaꞌ tiꞌ neꞌ kanꞌ sa ñaꞌan tñan nu nchka tiꞌ Ndiose, chunꞌ chaꞌ tyukwi ti tiye neꞌ ngiꞌni neꞌ nchga chaꞌ nu ykwiꞌ Ndiose loꞌo neꞌ judío nu ngwa sꞌni, ni siya ja ya katsaꞌ Ndiose chaꞌ kanꞌ ꞌin neꞌ xka laꞌa tsuꞌ kanꞌ; ke ti neꞌ kanꞌ ndiꞌya chaꞌ suꞌwe nu ngiꞌni neꞌ loꞌo taꞌa nten neꞌ. Kwiꞌ ngwañaꞌan, bra ti ndiꞌya neꞌ kanꞌ kwenta chaꞌ kiꞌya lka bra nu ngiꞌni neꞌ ska chaꞌ kuxi, loꞌo ja ndiꞌin chaꞌ kuwe ꞌa tiꞌ neꞌ bra nu ngiꞌni neꞌ ska chaꞌ suꞌwe.

ROMANOS 5:9

Suꞌwe sikwa. Wa lka ngwa suꞌwe kasiya ꞌñaan loꞌo Ndiose, chunꞌ chaꞌ ngalu tnen ykwiꞌ Krixtu xa wa ngujwi yu lo wsi. Kwiꞌ ngwañaꞌan, wa ngulaan ꞌin nchga chaꞌ kuxi chunꞌ chaꞌ ndyuꞌu Krixtu xiyaꞌ, loꞌo ja ta Ndiose nu tiꞌí ꞌñaan bra nu tsaa tii chalyuu.

ROMANOS 5:10

Msuun taꞌaan loꞌo Ndiose nu ngwa sꞌni la; loꞌo ni, ngwa suꞌwa chaꞌ ꞌñaan loꞌo Ni, chaꞌ wa ngujwi Sñiꞌ Ni lo wsi. Kanꞌ chaꞌ ni, ngwa tiin chaꞌ ꞌñaan loꞌo Ndiose, loꞌo ngwañaꞌan, kulaa Ni ꞌñaan ꞌin nchga chaꞌ kuxi chaꞌ wa ndyuꞌu Jesús xiyaꞌ.

COLOSENSES 1:21

Nu ngwa sꞌni la, tijyuꞌ ꞌa mdaꞌan wan ꞌin Ndiose; taꞌa wsuun Ndiose ngwa wan bra kanꞌ siꞌya chaꞌ kuxi nu mdaꞌan chaꞌ tiye wan, siꞌya chaꞌ kuxi nu yꞌni wan. Loꞌo ni, wa yꞌni Ni chaꞌ katin kiꞌya nu ndukwi wan ꞌin Ndiose,

1 TESALONICENSES 4:13

Loꞌo ni, ꞌwan taꞌa msñi wan chaꞌ ꞌin Jesús, chkwiꞌ ba chinꞌ loꞌo wan chaꞌ ꞌin taꞌaan nu wa ngujwi, chaꞌ ka biyaꞌ tiꞌ wan chaꞌ sa ñaꞌan lka si wa lajaꞌ neꞌ, ngwañaꞌan lka ꞌin ayman kanꞌ. Ja ka xiꞌin tiꞌ wan chaꞌ ꞌin ayman taꞌa wan nu wa ngujwi; ja kuꞌni wan sa ñaꞌan ngiꞌni nten nu ja ya kunan chaꞌ ꞌin Krixtu.

1 TESALONICENSES 5:6

Kanꞌ chaꞌ ndii ti tianꞌ tyiꞌian lo chalyuu; ja ndiꞌin chaꞌ tyiꞌian lajaanꞌ lo chalyuu, ni siya ngwañaꞌan ngiꞌni xka ta nten nu ja ndiꞌin chaꞌ ꞌin Jesucristo siyaꞌ ti. Kwiꞌ ngwañaꞌan kuꞌnian kwenta ꞌñaan ti ykwiinꞌ tian chaꞌ ja kaan yu kuꞌwi.